Ezayi 5 - Cebaara Bible 2010

Yawe ɛrɛzɛn ségi kéele

¹ Ki si n yɛlɛ mii í mii tàannyɛnw ŋúnugo ŋùu mii syɛɛn-nidaanmaw ma wi ɛrɛzɛn ségi kéele na. Ɛrɛzɛn séʔe n pye mii tàannyɛnw ma dǎndáma-tànʔa na.

² Wi maa gi túgu n yìrige níì kàdɛnɛri láa n yirige gi ni, níì ɛrɛzɛn tíricànra cɔ́rɔ gi ni, níì kpaataʔa-tɔ́nɔgɔ faan gi níngi ni, ní caà ɛrɛzɛn lɔ́ʔɔ tɛɛnùgugo sámaga gi ni. A wi i wéle gi ma ní i sɔ̀ngí ki a ɛrɛzɛncàɔn san, kàjáa a gi yasanbeere san.

³ «Tɔ́ɔliw ni doò, Zyerusalɛmi yé, ní Zyuda nǎnbèle, ki n yɛlɛ ye kútiiw ceri mii ní mii ɛrɛzɛn ségi nínge ni.

⁴ Nyàʔá ki da yɛlɛ mii í ní kpéʔele mii ɛrɛzɛn ségi ma, mii si ga gi kpéʔele gi ma í? Mii sɔ̀ngumi maa pye ɛrɛzɛncàɔn na gi ma, nyàʔá na si gi yasanbeere san?

⁵ Koro na, gee mii a kpéʔele mii ɛrɛzɛn ségi na lè, mii a gi tɛ̀ɛn yele na tɔ́ɔliw ni. Mii a gi jásaaw láʔa gi na, yaweeri si gi káa. Mii a gi kàkɔlɔgi wálagi cáan, jàngó pe gi tánʔana ní tɔ́lɔyi ní.

⁶ Mii a gi kálagi, gi káganbiigèle a ní nyáma í, pe a ní gi fála í. Wúuro tiipiire, ní wúuro a fìin yaà gi ni. Mii a gi joo bi gbàn fàfaanyi ma, koro ga pye yi a ní kɔ́ zàʔá cáan gi ni í.»

⁷ Yawe wi lè Nyɛ̀ʔɛni Sùlasiibéle Kafɔlɔ, wi ɛrɛzɛn ségi gi nyɛ Isirayɛli kpáagi, Zyuda nǎnbèle si i nyɛ wi ɛrɛzɛn tíriri, dee kéele li da wi dɛ́nɛ lè. Wi sɔ̀ngumi maa pye kányɛɛgi na be ma, kàjáa wéle, kanaa-sìnbyeyi yi yaà! Wi maa ni sínnɛ wéle yaà, kàjáa wéle, wɔʔɔgɔ supiiwáara di yaà!

Bele be Yawe fundanʔari yìrigí lè

⁸ Wɔʔɔli a pye bele na be kpáayi faanri ni sígi yiyɛɛ na lè, ní wɔ́ɔ i séyi fála ni soʔolo yiyɛɛ na lè, fwɔɔ ki n pye lariwaʔa a ní pye yaà í. Tɛɛkòrogo ní o nyɛ tári nínge ni kapye yele yagwɔɔlɔ má ban í.

⁹ Gee naa Nyɛ̀ʔɛni Sùlasiibéle Kafɔlɔ Yawe joo n kàli mii líiyi taana, wi n jo: «Kàkabalaga o nyɛ gi na í, kpaanɛʔɛyi naa a tɔ̀nɔ́ kàri gurubɛɛrɛ, syɔɔn faala a ní tɛ́ɛn kpaakpolocǎnyi naa ni í.

¹⁰ Ɛrɛzɛn séʔe ɛkitaribéle taanri a pye dùvɛɛn líitiribéle togoye siin ní kpɔrigɔ, cúlobéle dabata lùguro ga baa láa, ti a pye cúlobéle kɛɛ.»

¹¹ Wɔʔɔli a pye bele na be sɔ̀ɔ́ ni yìrigí lè n ní ni singbǎnmi caa, ní i tàgatága ni máari yébiligi ni, dùvɛɛnw còlo báriga ni.

¹² Kɔ̀ríw, ní dǎngbogèle, ní tàmáw, ní máani, ní dùvɛɛnw n be kaan a pe i muguri pe lìigboloyi tɛ́ɛyɛ ni. Kàjáa pe o sɔ̀ngí Yawe fáliw kéele na í, pe o wi kɔ́yi fáli wéle í.

¹³ Koro na mii syɛ́ɛnbèle a cò bi kári pe kanaa-sìnjánmi kéele na, kateegi a ra be mɛ́ɛyi fɔ̀ɔlɔ kúu, lògbaalaagi sáā be syɛɛnnɛʔɛmi káagi.

¹⁴ Koro na kúbèle tɛɛkòrogo i gi yákpodirigi múru ni yaari, ki i gi nyɔ́ɔgi múru wogbɔʔɔ ní tɛɛ̀laʔala fun. Koro ga pye bi jàbɔbèle, ní syɛɛnnɛʔɛmi, ní bi tìngbɔɔmi, ní bi fundaanri yákpowáara jɔ́ɔ.

¹⁵ Wee wi lè syɔɔn, wi n kùru, syɔɔn n tìrige táàma. Kpɔ́ɔmi wéleganma fɔɔlɔ nyúnyo a jùngu.

¹⁶ Yawe wi lè Nyɛ̀ʔɛni Sùlasiibéle Kafɔlɔ, woro a ra kpɔ̀ʔɔrɔ́ kútiisinw báriga ni, Kolocɔlɔɔ wi lè Wojanw wi a wi cǎnmi tɛ̀ɛn sínni báriga ni.

¹⁷ Bàala a ra náari yaà móō be nyàákáa-tɛ́ɛgi gii, nibɔɔnnɔ sáā lɔrɔfɔbèle kataya líi, yee yi kálagi lè.

¹⁸ Wɔʔɔli a pye bele na be sìnzinmi pwɔɔ ni kíle ní jànvaaw mɛ́ɛngéle ní lè, ní wɔ́ɔ i kapeeli kíle mɔ a jo wòtoro be kíle.

¹⁹ Pe si i gi nyuu níì jo: «Ki n yɛlɛ wi tɔlɔyɔ wári, ki n yɛlɛ wi kɔlɔ̀ wári ní wi kapyeli ní, koro ga pye wolo í li nyaa! Ki n yɛlɛ Isirayɛli ye Wojanw katimanana í da maa kelekele bi ba foro, koro ga pye wolo í li cán!»

²⁰ Wɔʔɔli a pye bele na be kapeʔe yiri lè kacànna, ní i kacànna yiri kapeʔe, poro bele be yébilimi kàragí lè gbɛ̀ɛnmɛ, ní i gbɛ̀ɛ́nmi kàragí yébilimɛ, poro bele be yasorogo kàragí lè yatanʔa, ní i yatanʔa kàragí lè yasorogo!

²¹ Wɔʔɔli a pye bele na be peyɛɛ wéle lè sícilibēle, ní i peyɛɛ sɔ̀ngí kacanbèlē.

²² Wɔʔɔli a pye bele na be nyɛ lè nànniribēle dùvɛɛnw gbaala na, ní bele na be nyɛ lè sànbalibéle singbǎnmi nyáʔamina ni.

²³ Pe i námara kpɔ́ʔɔrɔ syoo, ní i tànʔa kaangi kolomɔfɔlɔ ma, ní i syɛɛnsiɔn táangi syoo wi ma.

²⁴ Koro na àmɛɛ naàpiipiile nyàácere sórogi lè, ní àmɛɛ naanyìnge nyàákɔnigɔ sórogi lè, kánmi bee na pe nǐnri a pye àmɛɛ yafɔnʔɔgɔ nyɛ lè, pe fyɛ́ɛnri a cariga bi kári àmɛɛ cíbige nyɛ lè. Níì cán Yawe wi lè Nyɛ̀ʔɛni Sùlasiibéle Kafɔlɔ, pe n woro làlwaw cée, pe n Isirayɛli ye Wojanw syɛ́ɛnrɛ faʔa.

Yawe fundanʔari kágunnɔ

²⁵ Koro na Yawe fundanʔari cò naà wi syɛ́ɛnbèle kánma na, a wi kɔ́gi sánʔa be kánmi na n be kpúmɔn. Nyanbeleyi i cɛ̀lɛ́, kúbèle si i nyɛ àmɛɛ kànyaʔara nyɛ lè kàlari-kóloyi ni. Koro ní gi myɛ ní, wi fundanʔari ga láʔa í, wi kɔ́gi sèʔé i nyɛ wozánʔaga ní.

²⁶ Syɛɛnfeleyi yi nyɛ lè léelige, wi i dìrapo yìrigí yi ma. Wi i kàa yiri féfeele ni yaà tári láʔala ma, wéle, a gi tɔlɔyɔ wári ni maa kelekele.

²⁷ Wàa faala ga fɔ̀rɔ gi ni í, wàa faala o kpírigi í, wàa o ŋúnɔ ni gbègí í, wàa o ŋúnɔ í. Wàa sɛntiiri ga sánʔa wi sárigèle ni í, wàa taʔalaya mɛ́ɛngéle ga cɛnɛ í.

²⁸ Ki ŋáayi n fìrige, a gi sedeyi myɛ pwɔɔ n kwɔ́ɔ. Ki syɔ́ɔnyi fèriye i nyɛ móō kàdɛnɛyɛ yii, ki wòtorobèle sàkoyo i céregi móō káfala-sìnjinnɛ lii.

²⁹ Ki kaanami i nyɛ àmɛɛ càarajaa wómɔ nyɛ lè, ki i kaana càarabiiye fúloganma na, ki i fúlo ní i gi káari có, ki i syée ní di ní, syɔɔn faala o di syoo gi ma í.

³⁰ Cángi bee na fúlolo a pye gi na àmɛɛ sólomi lɔ̀ʔɔ fúlomɔ nyɛ lè. Pe a ra tári wéle, wéle, ti a pye yébilimɛ, ní wɔʔɔgɔ, gbɛ̀ɛ́nmi a kàri yébilimɛ nyɛ̀ʔɛwɔɔli báriga ni.