Ezayi 49 - Cebaara Bible 2010

Yawe falipyew kéele (Ŋúnuziin wógi)

¹ Lǒgi nínge tátɛɛgéle, ye lóʔo mii ma! Yele tɛɛ̀leeliyi syɛɛnfeleye, ye líiyi cáan! Yawe n mii yeri nlaa yaà mii nɔ́ɔw láʔa ni, wi n mii mɛ́ɛgi yeri lǎli ni mii nɔ́ɔw mii see n cáan lè.

² Wi n mii nyɔ́ɔgi kàriga àmɛɛ ŋɔséetàaɔn nyɛ lè, wi n mii tɔ́n ní wi kɔ́gi nyínmɛ ní. Wi n mii kpéʔele wɛ̀ɛlɛ, lee nyɔ́ɔ gi fìrige lè, níì mii làriga wi segbogi ni,

³ níì gi joo mii ma níì jo: «Mɔ wi nyɛ mii falipyew Isirayɛli, wee ni mii a kpɔʔɔrɔ taa lè.»

⁴ Kàjáa mii maa ni gi nyuu niyɛɛ ma níì jo: «Mii n niyɛɛ vɔ̀rɔ gbanzan, mii n mii fǎngi nyɔʔɔrɔ fúu, kawaʔa na. Mii sínni si tɔ̀nɔ́ i nyɛ Yawe taana, mii tɔ̀nɔw i nyɛ mii Kolocɔlɔw taana.»

⁵ Tɔ́ɔliw ni Yawe i nyuu, woro wee wi mii sámaga yaà mii nɔ́ɔw láʔa ni lè jàngó mii í pye woro falipyeo, jàngó mii í Zyakɔbi lúrugo wi pan woro ma, jàngó Isirayɛli ye í kpóʔoro woro taana. Mii n kpɔʔɔrɔ taa Yawe yɛ́ʔɛ ma. Níì cán mii Kolocɔlɔw wi da pye mii fǎngi.

⁶ Wi n jo: «Bi mɔ kpéʔele mii falipyeo, bi ní Zyakɔbi syɛɛnfeleyi yìrige, bi ní lúru pan ní Isirayɛli wogorobèle ní, koro a sèʔé gi yɛlɛ í. Kàjáa mii a mɔ télege mɔ í pye tári syɛɛnfeleye gbɛɛnmɛ. Koro ga pye syɔɔli mii kaangi lè, li nan fwɔɔ tári láʔala na.»

Woyiri-gáribèle lúrubangbɔɔlɔ

⁷ Yawe wi lè nyùnzyɔɔw, ní Isirayɛli Wojanw, woro wi syɛ́ɛnri naa joo wee má, wee be córo lè yafaʔaga, wee wi pye lè yanɔnʔɔgɔ syɛɛnfelegi ma, ní i nyɛ fǎngi gbànvɔɔlɔ púlo. Wi n gi joo wi ma níì jo: «Fànʔafɔɔlɔ a nyaa si yìri bi yére, fànʔafɔbiigéle a tìgi too Yawe kéeli na wi nyɛ lè tágala syɔ́ɔn, Isirayɛli Wojanw wi mɔ nyɛ́nɛ n wòlo lè.»

⁸ Yawe n jo: «Mii n mɔ nyɛ́ɛrigi lóʔo làrijǎnni ni, mii n mɔ dɛ̀ɛmɛ syɔ́ɔli canʔa na. Mii n mɔ màra jàngó bi mɔ télege mii joogaanni yáriga, mii ní syɛ́ɛnbèle nínge ni, mɔ í ní tári sámaga, si kɔ́riyi tɛ́ɛyɛ lɛɛ lɛɛ, yi da kálagi lè.

⁹ Si gi joo kàsolebèle ma si jo: ‹Ye yiri naa,› ní bele be nyɛ lè yébilimi ni, si gi joo poro ma: ‹Ye yiri gbɛ̀ɛ́nmi na.› Pe a gbǎn ra náari kóloyi na, pe a nyàácànga taa baa káa nyanbe-wɔlɔgɔyi myɛ na.

¹⁰ Kateʔe a be jáa í, lògbaʔa a be jáa í. Táfuuw, ní cángi a ra be wɔʔɔ í. Níì cán wee wi nyinimɛ taa be na lè, woro a ra kínigi be yɛ́ɛgi na, bàā syée ní be ní lǒyi púloweegéle ma.

¹¹ Mii a mii nyanbeleyi myɛ kàriga kozɔ̀lɔgɔ, mii kóloyi myɛ si fála bi yìrige.

¹² Pe wéle, pe n yìri yaà léelige ni maa, pe wéle, pèle n yiri yaà solomɔkulo, ní canʔajeemɛ ma ni maa, á pèle yìri Sinimi tári ma.»

¹³ Nyɛ̀ʔɛgèle, yaa ŋúu! Tári, da muguri! Nyanbeleyi, yaa ŋúu yáā yákpogèle wáa! Níì cán Yawe i wi syɛ́ɛnbèle kpɛʔɛlɛ, wi i nyinimɛ taagi wi syɛ́ɛnbèle na be nyɛ wɔʔɔgi ni lè.

Mii a tɔ̀nɔ́ fɛ̀ʔɛ mɔ na í

¹⁴ Siyɔn si i gi nyuu níì jo: «Yawe n mii wáa n yaʔa, Kàfɔw n fɛ̀ʔɛ mii na.»

¹⁵ «A cɔlɔɔ i fɛ̀ʔɛ́ lé wi pyà na, wee wi ŋɔri lè? Wi a nyinimɛ taa wi láagi pìiseeo na ì? Alí ki ga caà pye pe wàa í fɛ̀ʔɛ wi woò na, mii a tée fɛ̀ʔɛ mɔ na í.

¹⁶ Koro na wéle, Siyɔn, mii n mɔ sɛ́bɛ mii kadaagèle ni. Mɔ gúnyi kéele a tée yiri yaà mii yɛ́ʔɛ ma í.

¹⁷ Mɔ piibèle i fé ni maa. Mɔ tɔ́nʔɔnɔfɔbèle, ní mɔ kálagifɔbèle i syée.

¹⁸ Mɔ nyapiigèle múgu mi wéle mi miyɛɛ màʔa, mɔ pìíbèle myɛ i peyɛɛ gbóʔoro, pe i maa mɔ ma. Mii n kàli mii woweew na níì jo: Pe myɛ a tɔ̀nɔ́ pye mɔ yalere, bi pye mɔ ferere àmɛɛ cefɔɔn wiyɛɛ vèré lè,» Yawe wi jo nya.

¹⁹ «Ɛɛn, mɔ katayi, ní mɔ kpaatooyi, ní tári naa di kálagi lè, ti a cɛ́rɛ mɔ syɛ́ɛnbèle ni tɔ́ɔliw ni. Bele pe da ni mɔ kálagi lè, pe a fàn bi léeli mɔ na.

²⁰ Pìíbèle bele ni mɔ sɔ̀ngí mɔ n bɔ̀nɔ lè poro a ba ra gi nyuu da nii mɔ líiweegèle ni si jo: ‹Tɛ́ɛgi naa n cɛ́rɛ mii ni, tɛʔɛ sámaga mii ma jàngó mii í gbǎn tɛ́ɛn.›

²¹ Mɔ si a gi joo miyɛɛ fúngi ni si jo: ‹Wìí syɔ́ɔn wi be see n kaan mii ma? Níì cán mii maa bɔ̀nɔ pìibēle ni, mii maa pye cenaa-sìnzeeo. Mii maa cò n kári, mii maa pye cewaa, wee be yaʔa lè, wìí si wi be gbóo? Mii maa pye mii nibin, sán si bele naa da pye?› »

²² Kàfɔw Yawe wi syɛ́ɛnri naa joo níì jo: «Wéle, mii a mii kɔ́gi nyáʔana tári syɛɛnfeleye ma, mii a mii dìrapow kóri syɛɛnfeleyi kàbaan na, lǎli bee ni pe a pan ní mɔ nanbiigèle ní, pe kɔ́yi ni, bi mɔ calipiigèle láa be fókaannyunyi na.

²³ Fànʔafɔɔlɔ a pye mɔ gbóofɔɔlɔ, pe pìíbèle be lè càbala, poro a ra mɔ gbóo. Pe a ba ra tíri da tuun bàā yɛ́ɛyi cíbele tári na mɔ yɛ́ʔɛ ma, sáā mɔ tɔ́lɔyi cíbige laala, mɔ a gi cán bi cán mii wi nyɛ Yawe, bele pe be sɔ̀ngumi taʔa mii na lè, fɛ̀ɛrɛ a be taa í.»

²⁴ Gee nànnirio cò lè a ki a gbǎn syɔɔ lé wi ma? A syɛɛntanʔaw kàsoleo a gbǎn syɔɔ lé wi ma?

²⁵ Yawe n jo: «Ki i nyɛ kányɛʔɛ, gee nànnirio cò lè, ki a ní ba syɔɔ, syɛɛntanʔaw kàsoleo í syɔɔ. Mii a kapɛɛnni kpúmɔn ní mɔ kasiitun-nyɛ́nbèle ní, mii a mɔ piibèle syɔɔ.

²⁶ Mii a mɔ wɔʔɔfɔbèle yaʔa paa be tiimaa céri káa. Pe a ra peyɛɛ sìsyaanw gbo mɔ a jo dùvɛɛnfɔɔn wii bàā be yɛ́ɛyi wóo. Sìi yáriri myɛ a gi cán mii Yawe wi nyɛ mɔ Syɔɔfɔw, ní mɔ Nyunzyɔɔw, ní i nyɛ Zyakɔbi Séew Myɛ Kàfɔlɔ.»