Ezayi 48 - Cebaara Bible 2010

Yawe i kafɔnyɔ kéele nyuu

¹ «Ye gee naa lóʔo Zyakɔbi kpáagi wòolo, yele bele na Isirayɛli mɛ́ɛgi nyɛ lè, yele bele ye yiri Zyuda yòdaʔayi ni lè, yele bele ye kɛ̀ɛ́ Yawe mɛ́ɛgi na lè, ní i Isirayɛli Kolocɔlɔw mɛ́ʔɛ yiri lè, kányɛʔɛ ní sínnɛ si o yaà í!

² Níì cán pe i kècǎngi mɛ́ʔɛ yiri peyɛɛ na, níì télege Isirayɛli Kolocɔlɔw na, wee mɛ́ʔɛ gi nyɛ lè Nyɛ̀ʔɛni Sùlasiibéle Kafɔlɔ Yawe.

³ Mii maa téè kérigèle tɛ̀ɛn yaà booma ni, gele ge sɔ̀lɔ lè, mii nyɔ́ɔgi ni ke da yiri, a mii ge joo n tɛ̀ɛn, mii n gi pye terire a ge foro.

⁴ Mii maa gi cán mɔ n gbàn n sɔ̀lɔ, mɔ yátiigi i nyɛ tunmɔganaga, mɔ gbáali si i nyɛ kanyɛɛnrɛ.

⁵ Mii n kérigèle bee joo n tɛ̀ɛn mɔ na yaà làridɔɔnnɔ ni, mii n ge joo sáni ke ba kpéʔele lè, jàngó mɔ a kɔ́ gi joo si jo: ‹Mii yasungi ki ge kpéʔele, mii ǹdew, wàlá mii tunmɔgbalari yarigaa niwirige ki ge joo n gbàn› í.

⁶ Mɔ n gee bee lóʔo, níì gi myɛ nyaa. Ki si ga yɛlɛ yele í da kérigèle bee nyuu bàā tèé ì? Tɔ́ɔliw ni, mii i yafɔnyɔ tèé mɔ na, yee yi làra lè, yee yi lè mɔ da yi cán í.

⁷ Tɔ́ɔliw ni yi kpéʔele, làridɔɔnnɔ ni ban í, fwɔɔ n baa nan lǎli naa na mɔ da kɔ́ɔ̀ yi kéeli lóʔo í, koro ga pye mɔ a kɔ́ gi joo í si jo: ‹Mii maa yi cán yaà booma ni.›

⁸ Mɔ da kɔ́ɔ̀ gi kàa kéele lóʔo í, mɔ da yi cán í, nlaa yaà booma ni yi keele da jée mɔ líiweegèle ni í. Níì cán mii maa gi cán syɛɛnco-mí-kaanwee félege mɔ nyɛ lè, nlaa yaà n mɔ yaʔa mɔ nɔ́ɔw láʔa ni pe i mɔ yiri niceʔe.

⁹ Mii mɛ́ɛgi kéele na, mii n mii fundanʔari yaʔa gbɛ́nʔɛnɛ, ní sòololi kéele na li yɛlɛ mii na lè, mii n niyɛɛ cò mɔ kabangi na, jàngó mii a kɔ́ mɔ kwɔ́ɔ yirige yaà í.

¹⁰ Wéle, mii n mɔ gbàla, gee bee si ga pye bi wálifiio yirige í. Mii n mɔ sɛʔɛ n wéle wɔʔɔgi tunweele ni.

¹¹ Mii i gee bee kpéʔele niyɛɛ kéeli na, niyɛɛ nibin kéeli na. Níì cán mɛ̀ɛ́ mii a fɔ̀lɔ mii mɛ́ɛgi í kálagi bi sɛ́ɛ? Mii a mii nìjangbɔɔri kaan wàa nikwɔɔ ma í.

Wee wi a Yawe katimanani foro lè

¹² «Lóʔo mii ma, Zyakɔbi! Isirayɛli, mɔ wee mii yeri lè! Mii wi nyɛ Wozeliw, mii wi wɔ́ɔ̄ nyɛ Wozanw.

¹³ Mii kɔ́gi gi tári kàpɔɔn le, mii kàliige kɔ́gi gi nyɛ̀ʔɛgèle càli ǹjogi ni, mii n di yeri, a di pínɛ n pye beè.

¹⁴ Yele myɛw, ye yeyɛɛ gbóʔoro, ye lóʔo! Pe níngi ni wìí wi da kérigèle bee joo n tɛ̀ɛn sáni ge kpéʔele lè? Wee ní Yawe tàmaga le lè, woro wi a wi kanidaangèle kpéʔele foro Babilɔni ye na, wi a wi kɔ́gi tɛ́ʔɛ bi Kalide ye serige.

¹⁵ Mii wii, mii wi joo, mii n wi yeri. Mii n wi pye a wi pan, wi kapyeli a nyɔɔ.

¹⁶ Ye nùuni mii na, ye lóʔo! Nlaa yaà gi sélimi na, mii ga joo làrama ni í, nlaa yaà kérigèle bee sélimɛ na mii maa pye yaà.» Tɔ́ɔliw ni Kàfɔw Yawe n mii tun ní wi Pǐli ní.

Ee, ki maa yɛlɛ mɔ í lóʔo mii ma

¹⁷ Kàfɔw wi lè mɔ Nyunzyɔɔw, Isirayɛli Wojanw, wi n jo: «Mii wi nyɛ Yawe mɔ Kolocɔlɔw, wee wi mɔ tama mɔ tɔnɔ taara kéele na lè, mii i kínigi mɔ yɛ́ɛgi na kólogi ni, gee ni mɔ táanri lè.

¹⁸ Ee, mɔ ga maa yákirii yaʔa mii tundunri na, mɔ yɛɛ̀nyingi a dée pye àmɛɛ cábiga nyɛ lè, mɔ sínni a dée pye àmɛɛ sólomi lɔ̀ʔɔ kùnguruyo nyɛ lè.

¹⁹ Mɔ yodaʔayi a dée pye àmɛɛ táminyɔɔw nyɛ lè, mɔ piibèle a dée pye àmɛɛ táminyɔɔpiiw nyɛ lè. Pe mɛ́ɛyi a dée ceri láʔa yaà í, wàlá bi kwɔ́ɔ yirige yaà mii yɛ́ʔɛ ma í.»

Ye yiri Babilɔni ni

²⁰ Ye yiri Babilɔni ni. Ye fàn ye yiri Kalide ye níngi ni! Yaa fundaanra yákpogéle wáa yaa kéeli bee jáari, ye li kéeli joo be lóʔo. Ye li cariga fwɔɔ li nan tári láʔala na. Ye gi joo ye jo: «Yawe n wi falipyew Zyakɔbi nyúngi syɔɔ.»

²¹ Bele yɛ́ʔɛ wi da kíni lɔ̀ʔɔ fun tári ni lè, lògbaʔa ga be jáa í, wi n lɔ̀ʔɔ yaʔa a gi i púlo ni yirigi fálaga ni be ma, wi n fálagi yabi níì lɔ̀ʔɔ yaʔa ki i fóo.

²² Yawe n jo: «Yɛɛ̀nyinge faala o nyɛ syɛɛnpeebèle ma í.»