Ezayi 47 - Cebaara Bible 2010

Babilɔni tìgili kéele

¹ «Tìgi mi tɛ́ɛn támiigi ni, Babilɔni nàngeele sinján pìcaa! Tìgi mi tɛ́ɛn tári na fàngolo fun ni, Kalide ye pìcaa! Níì cán pe a ni da mɔ yiri yɛɛ̀nyinge cɔ́ɔ, ní cêŋɔndaaɔ í.

² Tírebingèle siin láa maa míimi tire. Mɔ nyundɔn-fàniw múgu, mɔ búrogi táàma kùru, mi mɔ céegèle múgu mi yaʔa mí cábiyi jeli!

³ Mɔ níborigi a múgu yaʔa, pe a mɔ fɛɛri nyaa, mii a gɔ̀lɔ́w wòlo, syɔɔn faala a gbǎn mii yérige gi pyeli na í.»

⁴ Wolo nyùnzyɔɔw be yiri Yawe, wi lè Nyɛ̀ʔɛni Sùlasiibéle Kafɔlɔ, ní Isirayɛli Wojanw.

⁵ «Tɛ́ɛn mi kòro pyèrio, mí tìgi mi jée yébilimi ni, Kalide ye pìcaa! Níì cán pe a ní da mɔ yiri fǎnyi fànʔafɔjaa í.

⁶ Mii fúngi maa tanʔa gbanʔama mii syɛ́ɛnbèle kurugo, mii maa mii kɔ́rigi córo yanɔnʔɔgɔ, níì be le mɔ kɔ́gi ni, kàjáa mɔ ga fɔ̀lɔ n nyinimɛ taa be na í. Mɔ n mɔ zúulibegi taʔa wolɛɛw na.

⁷ Mɔ maa ni gi nyuu níì jo: Mii a kòro fànʔafɔjaa làla o làla! Mɔ ga kérigèle bee cò mɔ fúngi ni í, mɔ ga sɔ̀ngi ge kwɔ́ɔmi kéele na í.

⁸ Ki n yɛlɛ mi gee naa lóʔo tɔ́ɔliw ni, cêŋɔndaaɔ, mɔ wee wi tɛ́ɛn yɛɛ̀nyinge na lè, ní i gi nyuu miyɛɛ fúngi ni níì jo: ‹Mii i nyɛ beè! Yarigaa ní o yaà n fàra mii na í, mii a tée pye lɔgucaa í, mii a tée bɔ̀nɔ pìibēle ni í!›

⁹ Yáriyi naa siin a nan mɔ na làla nibin ni, cannijanga ni, yoro yi nyɛ pìíbèle fɔ̀nnɔ, ní bi pye lɔgucaa. Kérigèle bee a too mɔ na, mɔ dɛɛmi kapyenɛʔɛrɛ ní gi myɛ ní, ní mɔ séew kanyaajooro ní gi myɛ ní.

¹⁰ Mɔ maa miyɛɛ daʔa mɔ péemi na, mɔ maa ni gi nyuu níì jo: ‹Syɔɔn faala o mii nyaagi í!› Mɔ sícilimi, ní mɔ cánni n mɔ pùuni, a mɔ i gi nyuu mɔ fúngi ni níì jo: ‹Mii i nyɛ beè, yarigaa ní o yaà n fàra mii na í.›

¹¹ Wɔʔɔgɔ a ba too mɔ na, mɔ a sélimɛ cán gi na í. Kálagila a ba too mɔ na, mɔ a gbǎn miyɛɛ nyúngi syɔɔ í. Kapeʔe a ba foo too mɔ na, sáni mɔ í sàmi gi na lè.

¹² Koro na, mi kòro maa mɔ cánni kapyere kpéʔele, ní mɔ dɛɛmi kapyenɛʔɛrɛ, dee na mɔ tée i nyɛ lè nlaa yaà mɔ cárimi làla ni. Dɔ̀ʔɔ́ mɔ a gbǎn tɔ̀nɔ taa di ni, dɔ̀ʔɔ́ mɔ a gbǎn ba pye fyáara yáriga.

¹³ Mɔ n miyɛɛ vɔ̀rɔ yíbenɛʔɛni báriga ni, koro na nyɛ̀ʔɛni fɛ̀ɛbēle cánvɔɔlɔ, ní ŋɔripiigèle cánvɔɔlɔ, ní bele be yevɔnyi wéle ní i kérigèle nyuu, gele ke a kpéʔele lè, ki n yɛlɛ be yìri bi mɔ syɔɔ kérigèle ma, ke a ba too mɔ na lè.

¹⁴ Wéle, pe i nyɛ àmɛɛ nyàásige nyɛ, gee náagi a sórigo lè. Pe a gbǎn peyɛɛ zyɔɔ naanyǐngi bee ma í, naagaa ban gi nyɛ, gee na be waari lè í, naagaa ban gi nyɛ, gee taana syɛ́ɛnbèle tɛ̀ɛ́n lè í.

¹⁵ Wéle, ànbée pe a ba pye, bele kéele ní mɔ da ni miyɛɛ vɔ̀rɔgí lè, bele yíbele na mɔ miyɛɛ yaʔa lè nlaa yaà mɔ cárimi làla ni. Pe myɛ nibin nibin i curugu ni syée pe kàbangáriya na, syɔɔn faala a mɔ syɔɔ í!