Ezayi 46 - Cebaara Bible 2010

Babilɔni kolocɔlɔ-fáanabèle ní Kolocɔlɔw wodeleo

¹ Bɛli n tìgi n too yégunri na, Nebo n too. Pe i be yasunyi bee taari yaweeri na, ti lè tugolaa-yaweeyi. Yele ye da ni yi tugu, yoro si yi baa pye yee tugoro yaweʔe na, gee gi fɔ̀rɔ lè!

² Yi n kùru, yi n tìgi n too yégunri na, yi a gbǎn yi túgori syɔɔ í. Yi tiimaw i syée púlori na.

³ «Zyakɔbi kpáagi wòolo, ye lóʔo mii ma, yele bele myɛ ye kòro lè Isirayɛli kpáagi wòolo ni, yele bele mii láa lè n pye mii túgoro sáni pe yele see lè, yele bele mii láa lè mii túgoro yele canzeegi na!

⁴ Mii a kòro wonijanw bi taa yele í ba lɛɛ, mii a yele láa bi taa yele ǹjoori í ba fílige. Mii n gi pye, mii si a sèʔé kòro yele láali na. Mii a ra yele lée, mii a ra yele syoo.

⁵ Wìí ní yele mii tímana n jo wolo i nyɛ sèjira? Wìí yele córo mii félege bi gi joo si jo mii ní wee bee i nyɛ kanijanma na?

⁶ Pe i tɛ́ɛw yirigi pe gɔ̀nvaʔayi ni ni ŋuu, níì wálifiiw cáan cúlo na, pe i tɛɛ̀kpumɔɔn sàrá jàngó wi kolocɔlɔwaa sámaga. Pe i lɛ̀ɛlɛ́, ní i tíri ni tuun.

⁷ Pe i wi lée be fókaannyunyi na, ni wi tugo ni syée n sa ni wi téeri wi tɛ́ɛgi ni, wi o cúngu wi tɛ́ɛgi ni í! Alí wàa ga yákpoli wáa wi kurugo, wi a syɛɛnlurugoro kaan í, wi a gbǎn syɔɔn syɔɔ wɔʔɔgi ma í.

Syɔɔli ga léeli í

⁸ «Ye sɔ̀ngi ye taa gee bee na, yele niceebèle, ye kéeli bee yaʔa li kòro yele zɔ̌nbèle na!

⁹ Ye sɔ̀ngi ye taa booma kasɔ̀lɔgwɔɔgèle na. Níì cán mii wi nyɛ Kolocɔlɔɔ, wàa o nyɛ àmɛɛ mii nyɛ lè í, Kolocɔlɔwee wi lè wàa o nyɛ wi felege í.

¹⁰ Mii i gi tèé gi sélimi na, gee gi maa ba kpéʔele lè, sáni ki ba pye lè, gee gi nyɛ lè ki ga kɔ́ɔ̀ kpéʔele n kwɔ́ɔ í. Mii n jo: Mii katimanani a sámaga yére. Gee myɛ gi mii dɛ́nɛ lè, mii a gi kpéʔele foro.

¹¹ Mii n kaàjɔɔ-féjɛnʔɛ yeri n yìrige yaà canʔafolomɔ ma, n nànwaa yeri n yìrige yaà táleelire ma, wee wi a ba mii katimanagèle foro lè, gee mii joo lè, mii a gi yaʔa gi kpéʔele. Gee mii tímana lè, mii a gi kpéʔele foro.

¹² Ye lóʔo mii ma, yele fungbanyi syɛ̀ɛnnɛ, yele bele ye léeli sínni na lè!

¹³ Mii i mii sínni yaari li i nùuní naa, li tɛ́ɛgi ga níì léeli í. Mii syɔɔli a ní mɔn kólogi na í. Mii a syɔɔli lége Siyɔn ni, bi mii nìjanri kaan Isirayɛli ma.