Ezayi 45 - Cebaara Bible 2010

Sirusi, wee Kolocɔlɔɔ nyɛ́nɛ n wòlo lè

¹ Syɛ́ɛnri naa Yawe joo wi wonyɛnɛ-wòlow ma, Sirusi ma, wee wi cò kàliige kɔ́gi na lè, bi tátɛɛyi syɛɛnfeleye kpúmɔn cáan wi yɛʔɛ̀ ma, si fànʔafɔbèle sɛntiiribéle sánʔana, si wɔ́ɔ kɔ̀riyi múgu wi ma jàngó syɔɔn faala a kɔ́ gbǎn yi tɔ́n í, wi n jo:

² «Mii a kíni bàā táanri mɔ yɛ́ɛgi na, mii a dǎndamayi pye falafala, mii a kanyɛɛnri kɔ̀riyɔ kabagi, si túnmɔri yasɔʔɔyɔ cɛnɛ cɛnɛ.

³ Mii a lɔlarara kaan mɔ ma, ní lɔ́ree be kɔn tɛɛlaraga ni lè, koro ga pye mɔ í gi cán bi cán mii wi nyɛ Yawe, wee wi mɔ yiri lè mɔ mɛ́ɛgi na, mii wee wi nyɛ lè Isirayɛli Kolocɔlɔw.

⁴ Mii falipyew Zyakɔbi, wi lè mii wonyɛnɛ-wòlow Isirayɛli, woro kéeli na mii mɔ yeri mɔ mɛ́ɛgi na n kpɔʔɔrɔ mɛ́ʔɛ kaan mɔ ma, n gi yaʔa mɔ ga mii cán í.

⁵ Mii wi nyɛ Yawe, wàa nikwɔɔ ní o yaà í, wàa ní o nyɛ Kolocɔlɔɔ n fàra mii na í. Mii n sɛntiiri pwɔɔ mɔ na, àlí bi gi taa mɔ ga mii cán í.

⁶ Koro n pye jàngó gi cán canʔafolomɔ, ní canʔajeemɛ ma bi cán yafyɛn ní o yaà kapye mii nibin ban í, mii wi nyɛ Yawe, wàa ní o yaà í.

⁷ Mii i gbɛ̀ɛ́nmi sámagi, ní wɔ́ɔ i yébilimi kpéʔele, mii i bɛ̀ɛ́li légi, ní wɔ́ɔ i wɔʔɔgi kpéʔele. Mii Yawe, mii wi koro myɛ kpéʔele.

⁸ Nyɛ̀ʔɛgèle, yaa fàndaari yìrigí yaà ǹjogi ni yaa sɔlɔ yaa cáan naa àmɛɛ kásaga nyɛ lè, fàfaanyi sáā di sòʔó bàā ŋuu naa àmɛɛ zàʔá nyɛ lè. Tári n yɛlɛ di múgu, koro ga pye syɔɔli í da leegi, sínni sáā fíin. Mii Yawe wi nyɛ di faanfɔw.»

Cóori ní di faanfɔw kéele

⁹ Wɔʔɔli a pye syɔ́ɔnwee na wi kàkabalaga kpéʔele ní wee ní wi wi faan lè, syɔ́ɔnw bee wi lè kòdɔɔlɔ, tári kòdogèle gele nínge ni. A cóori a gi joo lé di faanfɔw ma si wi pye: «Nyàʔá mɔ kpéʔele?» Si wi pye: «Mɔ kapyeli o nyɛ yafyɛn í?»

¹⁰ Wɔʔɔli a pye syɔ́ɔnwee na wi gi joo wi toò ma lè níì jo: «Nyàʔá na mɔ see?» Bi gi joo wi nɔɔ̀ ma si jo: «Nyàʔá na mɔ pyà see?»

¹¹ Yawe wi syɛ́ɛnri naa joo, wi lè Isirayɛli Wojanw, woro wee wi wi sámaga lè wi n jo: «Wìí wi a gbǎn mii yíbe kérigèle na ge maa lè, si tundunro joo bi gbàn mii ma mii pìíbèle, ní mii kɔ́yi kapyele kéele na?

¹² Mii wi tári kpéʔele, ní wɔ́ɔ̀ syɔɔn faan wi nyɛ di na lè. Mii wi nyɛ̀ʔɛgèle càli ǹjogi ni ní mii kɔ́yi ní, mii wi ge gbɛ̀ɛ́nmi yárira myɛ kàragí.»

¹³ Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Mii wi Sirusi yìrige sínni kéele na. Mii a wi kóloyi myɛ sámaga nyɔɔ. Wi a ní mii kěgi faan si ní mii syɛ́ɛnbèle lúrugo be pan poro bele pe da cò n kári lè. Wi a nyùnzyɔɔ-wáli syɔɔ í, wi a námara kpɔ́ʔɔrɔ syɔɔ í.»

Kolocɔlɔɔ i nyɛ ní mɔ ní, Isirayɛli

¹⁴ Yawe n jo: «Ezyipiti yataari, ní Etyopii tɔ̀nɔw, ní Seba ye wóri, syɛɛntɔnɔyi bee, toro a sɔ̀lɔ́ pan mɔ ma, bi ba pye mɔ wóro. Syɛɛnfeleyi bee a taʔa mɔ na wobwɔɔbéle ní ní nyɔ̀ʔɔmɔ ní, pe a ra tíri da tuun mɔ yɛ́ʔɛ ma, pe a ra mɔ nyɛ́ɛri, si jo: ‹Kolocɔlɔɔ ní o nyɛ tɛɛgaa ni kapye mɔ má ban í, wàa ní o beè í, kolocɔlɔwaa nikwɔɔ ní o beè í.› »

¹⁵ Kányɛʔɛ na, mɔ i nyɛ Kolocɔlɔɔ, wee wi wiyɛɛ làriga lè, Isirayɛli Kolocɔlɔw, mɔ wi lè Syɔɔfɔw.

¹⁶ Fɛ̀ɛrɛ n yasunyi sámagafɔɔlɔ myɛ taa, a be nyúnyi jùngu, pe myɛ i syée fɛ̀ɛrɛ wòolo ní.

¹⁷ Ki si ga yére Isirayɛli na, Yawe wi syɔɔli kaan wi ma, bàngwɔɔ syɔɔlɔ. Fɛ̀ɛrɛ a tée yele taa í, yele nyúnyi a tée jùngu nyáana í.

Syɔɔli kéele li joo n tɛ̀ɛn lè

¹⁸ Níì cán Yawe wi syɛ́ɛnri naa joo, woro wee wi nyɛ̀ʔɛgèle sámaga lè, woro wee wi nyɛ lè Kolocɔlɔɔ nibin, wee wi tári sámaga lè n di yirige, níì di sámaga n yérige. Wi ga di faan níì di yaʔa wowaara ní í. Kàjáa wi n di sámaga koro ga pye syɛ̀ɛnnɛ í tɛ́ɛn di ni, wi n jo: «Mii wi nyɛ Yawe, wàa ní o yaà n fàra mii na í.

¹⁹ Mii ga joo làrama ni tári yébilimɛ tɛ́ɛlaa ni í. Mii ga gi joo Zyakɔbi yòdaʔayi ma níì jo: ‹Yaa mii caa gbanzan› í! Mii Yawe, mii i kasingèle nyuu. Gee gi nyɛ lè kányɛɛgi, koro mii nyuu.

Syɛɛnfeleyi tágala kéele

²⁰ «Ye yeyɛɛ gbóʔoro yaa maa, ye pínɛ ye nùuni naa syɛɛnfeleyi wogorobéle! Bele pe be tíiyi ǹdebēle lée lè, ní i nyɛ́ɛri kolocɔlɔwaa ma, wee wi lè wi a gbǎn be syɔɔ í, cánna o nyɛ bele bee ma í.

²¹ Ye yele wóri joo, yé kérigèle tɛ̀ɛn gele ge nyɛ yele ma lè! Alí ye caa pínɛ ye yeyɛɛ nyaa ye joo. Wìí wi da téè gee bee joo yaà gbɛnʔɛnɛ? Wìí wi ge tɛ̀ɛn yaà làridɔɔnnɔ ni? Mii Yawe ban ì? Kolocɔlɔwaa ní o yaà n fàra mii na í, Kolocɔlɔwee wi sín lè, ní i syɔɔn syoo, wi wàa ní o yaà kapye mii ban í.

²² Ye kolo ye lúru ye pan mii ma, yele a syɔɔ, yele tári láʔagéle woolo myɛw! Níì cán mii wi nyɛ Kolocɔlɔɔ, wàa ní o yaà í.

²³ Mii n kàli niyɛɛ na, syɛɛnsinre i yirigi mii tiimaa nyɔ́ɔgi ni, dee di lè ti a gbǎn sàa í, ti n jo: ‹Pe myɛ a ra yégunri cáan mii yɛ́ʔɛ ma. Mii na nyíngèle myɛ a ra kɛ̀ɛ́.›

²⁴ Ki a ra nyuu si jo: ‹Yawe nibin ni sínni kapyegèlē, ní fǎngi nyɛ.› » Bele myɛ fúnyo yi tanʔa wi kurugo lè, poro a pan wi ma fɛ̀ɛrɛ wòolo ní.

²⁵ Yawe bárigaw ni Isirayɛli yòdaʔayi myɛ a sínni taa, sáā yiyɛɛ gbɔ́ʔɔgi.