Ezayi 44 - Cebaara Bible 2010

¹ Tɔ́ɔliw ni Zyakɔbi, mɔ wi lè mii falipyew, ki n yɛlɛ mi lóʔo, Isirayɛli mɔ wee mii nyɛ́nɛ n wòlo lè.»

² Yawe wi mɔ kpéʔele lè, woro wi syɛ́ɛnri naa joo, woro wee wi mɔ sámaga yaà mɔ nɔ́ɔw láʔa ni lè, ní i nyɛ mɔ dɛɛmɛfɔw, wi n jo: «Mɔ a kɔ́ ra fɛ̀ɛgí í, mii falipyew Zyakɔbi, Yesyurun, mɔ wee mii nyɛ́nɛ n wòlo lè.

³ Níì cán mii a lɔ̀ʔɔ píli lɔ̀ʔɔfun-tári na, bi lókoloyo lége táwaari ni. Mii a mii Pǐli tìrige bi tɔ́n mɔ piibèle na, bi mii dùbaw taʔa mɔ yodaʔayi na.

⁴ Pe a fìin bi yiri nyàági nínge ni téw àmɛɛ sɔli tíire nyɛ lòfóozɔ̀lɔyɔ nyɔ́ɔ na lè.

⁵ Wàa a gi joo si jo: ‹Mii i nyɛ Yawe wóo.› Wàa nikwɔɔ sáā Zyakɔbi mɛ́ɛgi yiri wiyɛɛ na. Wàa nikwɔɔ si wɔ́ɔ gi sɛ́bɛ wi kɔ́gi na si jo: ‹Yawe wóo mii nyɛ,› sáā wiyɛɛ gbɔ́ʔɔgi ní Isirayɛli mɛ́ɛgi ní.»

Faʔara wáala kolocɔlɔ-fáanabèle na

⁶ Yawe wi lè Isirayɛli Fànʔafɔw, woro wee wi wi nyúngi syoo lè. Yawe wi nyɛ lè Nyɛ̀ʔɛni Sùlasiibéle Kafɔlɔ, wi n jo: «Mii wi nyɛ Wozeliw ní wɔ́ɔ i nyɛ Wozanw, wàa ní o nyɛ Kolocɔlɔɔ mii kàdoʔo ma í.

⁷ Wìí wi nyɛ mii félege? Wi yìri wi joo, wi wiyɛɛ dɛ̀ɛn, wi keelaa tɛ̀ɛn mii yɛ́ʔɛ ma. Nlaa yaà sélimɛ fun, wìí wi kɔ́ɔ̀ keelaa yaʔa a li lóʔo, lee li maa ba kpéʔele lè, ní kérigèle ge maa lè?

⁸ Yele a kɔ́ ra fɛ̀ɛgí í, yele a kɔ́ ra cɛ̀lɛ́ í. Mii ga gi joo n tɛ̀ɛn mɔ na làridɔɔnnɔ ni a mɔ gi lóʔo ì? Yele i nyɛ mii séerabéle. A wàa ní i nyɛ lé Kolocɔlɔɔ kapye mii ban í? Fálagaa nikwɔɔ ní o yaà í, mii ga níì kàa cán í.»

Yasunyi sámagafɔɔlɔ kéele

⁹ Bele be yasunyi kpéʔele lè, pe myɛ i nyɛ fúu, pe yakpéʔeleri wojanra o yafyɛn nyɔɔgi í, pe i nyɛ yi séerabéle, yi o nyaagi í, cánna o yi ma í, koro na fɛ̀ɛrɛ a wɔ́ɔ ba be taa.

¹⁰ Wìí wi nyɛ, wee wi kolocɔlɔwaa sámaga lè, wàlá n tunmɔrɔ gbàla n ǹdeo sámaga, wi si o tɔ̀nɔ caa wi ni í?

¹¹ Wéle, fɛ̀ɛrɛ a wi pínɛnyɛnbèle myɛ taa. Yi sámagafɔbèle tiimaa o nyɛ yafyɛn í, pe i nyɛ syɛ̀ɛnnɛ yagana. Ki n yɛlɛ pe kpóʔoro, pe myɛw, ki n yɛlɛ be peyɛɛ dɛ̀ɛn, fyáara a be myɛ pínɛ cò, fɛ̀ɛrɛ a be taa.

¹² Fɔ̀nɔw i báara kànʔana na, àmɛɛ be kpanaga báara lè, ni túnmɔri kpúmɔn ní màrito nyɛ́yɛ ní ni kàragí yasungo. Wi i gi kpéʔele ní fànʔa kɔ́lɔ ní. Kàjáa kateegi n wi jáa a wi kàri fànʔa fùn wi o lɔ̀ʔɔ taagi ni gbo í, a wi bárigaw kwɔ́ɔ.

¹³ Tiitanw i mɛ́ɛnni cáan gi na, si gi kán màʔa ní làkirɛ ní si gi tan ní kátanna ní, si gi láʔagèle wòlo ní kátanzɔɔnw ní, ki syɔɔn wíri, si gi sámaga gi nyɔɔ bi pye àmɛɛ syɔɔn nyɛ lè, jàngó gi pye kpaʔa ni.

¹⁴ Wi i gáà sɛdiri tíiraa kpúmɔn wiyɛɛ ma, wàlá wi n siipirɛ tíigaa, wàlá syɛni tíigaa nyɛ́nɛ n wòlo kɔligi ni, koro ga jáa wi n pɛn tíigaa cɔ́rɔ, zěgi mɛ̀ɛ́ ni gi leegi.

¹⁵ Tíiri bee i nyɛ syɔɔn ma wi i di sórogi, wi i waari di tàa náa na, ní wɔ́ɔ i di tàa nii náagi ni ni soori, si gi kàa sámagi Kolocɔlɔɔ bàā kpɔ̀ʔɔrɔ́, wi i gáà gi kàa sámaga yasungo, gee yɛ́ʔɛ ma wi kɔ́yi cáan lè.

¹⁶ Wi i tíigi bee tílawaa kpàrá naà ni káari sámagi. Wi i tàa fwóo bi káa tín. Wi wɔ́ɔ i waari gi na si jo: «Ee mii n sámaga n waʔa, mii i naanyǐngi nyaagi.»

¹⁷ Si ki wozangi sámaga kolocɔlɔɔ, wi yasungo, gee yɛ́ʔɛ ma wi kɔ́yi cáan lè, ní i tíri ni tuun, ní i gi mɛ́ɛgi yiri ni i yákpoli wáa níì jo: «Mii syɔɔ! Níì cán mɔ wi nyɛ mii kolocɔlɔw!»

¹⁸ Pe o yarigaa cángi í, pe o keele cángi ni láʔala í. Níì cán pe n nyapiigèle tɔ́n be na, koro ga pye pe a kɔ́ ra nyaagi í, ní be fúnyi, koro ga pye pe a kɔ́ keele kɔ́rɔ cán í.

¹⁹ Sɔ̀ngurɔ faala tée o jǐn wi ni í, cándeele o wi ma í, wi o keele cángi ni láʔala í, wi gi joo si jo: «Mii n tíigi bee tílawaa sórigo náagi ni, mii n lìíli sɔʔɔ naàniganw na, mii n káari fwɔ́ɔ n káa. Mii si ní ki wogorogi sámaga lé bi pye yanɔnʔɔgɔ? Mii í ba ra kɔ́yi cáan lé tiigbelege yɛ́ʔɛ ma?»

²⁰ Cɔ́ɔngi mùgulo n wi dɛ́nɛ, wi funnaa-sìnzingi i wi pùuní. Wi a gbǎn wiyɛɛ sìíw syɔɔ í, wi a tée gi joo í si jo: «Gee gi nyɛ mii kɔ́gi ni lè, jànvaa yáriga ban gi nyɛ ì?»

Mɔ i nyɛ mii falipyeo, mɔ a kɔ́ fɛ̀ʔɛ koro na í

²¹ «Sɔ̀ngi mi taa gee bee na, Zyakɔbi! Níì cán Isirayɛli, mɔ i nyɛ mii falipyeo. Mii wi mɔ faan jàngó mɔ í pye mii ma falipyeo. Isirayɛli, mii a fɛ̀ʔɛ mɔ na í.

²² Mii n mɔ kapeegèle kurugo n láʔa àmɛɛ fàfaanwɔʔɔ nyɛ lè, ní mɔ kolomi kèlē, àmɛɛ fàfanʔa nyɛ lè. Ki n yɛlɛ mi lúru mi pan mii ma, níì cán mii n mɔ nyúngi syɔɔ.»

²³ Nyɛ̀ʔɛgèle, yaa fundaanra yákpogéle wáa! Níì cán Yawe n wi kapyeli pye. Tári tɛɛcùruyo, yaa mugurumɔ yákpogéle wáa! Nyanbeleyi, yaa fundaanra yákpogéle wáa! Yele wɔ́ɔgēle, kɔliyi, ní yi tíiri myɛw! Níì cán Yawe n Zyakɔbi nyúngi syɔɔ, wi i wi nìjangbɔɔri tèé Isirayɛli ni.

Dulunyanw sámagafɔlɔ wi nyɛ kérigèle nyúngo na

²⁴ Yawe wi syɛ́ɛnri naa joo, woro wee wi nyɛ lè mɔ Nyunzyɔɔw, woro wee wi da mɔ sámaga yaà sáni pe mɔ see lè, wi n jo: «Mii Yawe, mii wi yáriri myɛ kpéʔele. Mii nibin wi nyɛ̀ʔɛgèle càli ǹjogi ni, mii wi tári sámaga n yérige.

²⁵ Mii wi jànvaa kanyaajoobèle fɛ̀ɛbēle kálagi, ní wɔ́ɔ i kanyaabèle kàragí nilabalabéle. Mii i sícilibèle lúrugu kàdoʔo ma, ní i be cánni kàragí labalama.

²⁶ Mii i fànʔa kaangi mii falipyew syɛ́ɛnrɛ ma, ní wɔ́ɔ i syɛ́ɛnri forogi, dee mii tundunbèle da ni nyuu ni tèé lè. Mii i gi nyuu Zyerusalɛmi kéeli na níì jo: ‹Syɛ́ɛnbèle a ní tɛ́ɛn gi ni,› ni gi nyuu Zyuda yòdaʔayi kèye kéele na níì jo: ‹Yi a ní faan. Mii a ní yi gurubɛɛri yìrige.›

²⁷ Mii i gi nyuu lòcurugi ma níì jo: ‹Ki n yɛlɛ mi waʔa. Mii a mɔ cábiyi syɔɔnri.›

²⁸ Mii wi gi nyuu Sirusi kéeli na níì jo: ‹Mii bànaʔaw, wee wi a mii kanidaangèle myɛ foro lè. Wi a gi joo Zyerusalɛmi kéeli na si jo: Ki n yɛlɛ ki ní faan kavɔn. Ní kpɔ̀ʔɔrɔli kpaʔa kéele na, si jo: Ki n yɛlɛ ki ní le.› »