Ezayi 43 - Cebaara Bible 2010

¹ Tɔ́ɔliw ni, ee Zyakɔbi! Yawe wi lè mɔ faanfɔw, woro wee wi mɔ sámaga lè, ee Isirayɛli! Woro wi syɛ́ɛnri naa joo, wi n jo: «Mɔ a kɔ́ ra fɛ̀ɛgí í, níì cán mii n mɔ nyúngi syɔɔ, mii n mɔ yeri mɔ mɛ́ɛgi na, mɔ i nyɛ mii wóo!

² Mɔ ga ni lǒyi jeligi lǎli ni lè, mii a pye ní mɔ ní, ní cábiyi, yi a tée mɔ wáa í. Mɔ ga ni táanri náagi ni, mɔ a miyɛɛ sórigo gi ni í, naanyǐngi a mɔ sórigo í.

³ Níì cán mii wi nyɛ Yawe mɔ Kolocɔlɔw, wi lè Isirayɛli Wojanw, ní mɔ Syɔɔfɔw. Mii n Ezyipiti kaan, woro í pye mɔ nyunzyɔɔ-lɔ́ri, n Etyopii ní Seba kaan mɔ sindɛɛgi ni.

⁴ Níì cán mɔ i córo lɔgbanra yáriga mii nyɛ́nɛ na, mɔ i nyɛ yakpɔʔɔ, a mɔ kéeli wɔ́ɔ̀ mii dɛ́nɛ, koro na mii i nànbēle kaangi mɔ sindɛɛgi ni, ni syɛɛnfeleye kaangi mɔ pili sìndɛʔɛ ni.

⁵ Mɔ a kɔ́ ra fɛ̀ɛgí í, níì cán mii i nyɛ ní mɔ ní. Mii a mɔ yodaʔayi yìrige yaà canʔafolomɔ ma bi pan, mii a mɔ wóbèle yìrige yaà canʔajeemɛ ma bi kpóʔoro.

⁶ Mii a gi joo solomɔkulo ma si jo: ‹Pe kaan naa!› Bi gi joo wòrogulo ma si jo: ‹Mɔ a kɔ́ be cò bi yérige í!› Mii jáabèle yìrige yaà léelige mi pan, pe lè nǎnbèle, ní mii jáabèle be lè cébèle, pe yìrige yaà tári láʔala ma mi pan,

⁷ poro bele myɛ be yeri mii mɛ́ɛgi na lè, poro bele mii faan mii nìjangbɔɔri kéele na lè, poro bele mii sámaga lè, poro bele mii kpéʔele lè.»

Yele ye nyɛ mii séerabèle

⁸ Ye syɛ́ɛnbèle yirige naa pe nyɛ lè fúunbéle, bi gi taa nyapiigèlē i nyɛ be na, ní dùnɔbéle, bi gi taa líiweegéle i nyɛ be na.

⁹ Tári syɛɛnfeleye myɛ n yɛlɛ bi yiyɛɛ gbóʔoro, syɛɛnfeleyi myɛ í pínɛ kpóʔoro. Poro níngi ni, wìí wi kérigèle bee félege joo, gele ni pe wolo tama booma kásɔ̀lɔgèle na lè? Pe be séerafɔbèle yirige naa, bele bee í peyɛɛ fílige, pe lóʔo be ma si gbǎn gi joo si jo: «Kányɛʔɛ gii.»

¹⁰ Yawe n jo: «Yele ye nyɛ mii séerabèle, ní mii falipyew ní, wee mii nyɛ́nɛ n wòlo lè, koro ga pye yele í mii cán si tága mii na, si gi cán bi cán mii wii. Wàa faala da sámaga yaà n pye Kolocɔlɔɔ mii yɛ́ʔɛ ma í, wàa si a ní wɔ́ɔ pye yaà mii kàdoʔo ma í.

¹¹ Mii wii, mii wee wi nyɛ lè Yawe. Syɔɔfɔwaa nikwɔɔ ní o yaà n fàra mii na í.

¹² Mii wi gi jáari, mii wi syɔɔli kpéʔele, mii wi gi joo n tɛ̀ɛn, kolocɔlɔ-nibɔɔn ban wi nyɛ yele níngi ni í, koro na yele i nyɛ mii séerabéle,» Yawe wi jo nya. «Mii wi nyɛ Kolocɔlɔɔ.

¹³ Mii wi nyɛ woro, nlaa yaà sáni cânzeligi í pye lè. Syɔɔn faala a gbǎn yarigaa yirige mii kɔ́gi ni í. Mii a mii fáliw pye, wìí wi a jo sán?»

Yawe n dɛ̀ɛmɛfɔlɔ tórigo Isirayɛli ye ma

¹⁴ Yawe wi syɛ́ɛnri naa joo, woro wee wi yele nyúnyi syoo lè, wi lè Isirayɛli Wojanw, wi n jo: «Yele kéeli na mii wàa tun Babilɔni kánmi na, wi wóbèle be fé bi syɔɔ lè, bi poro myɛw tìrige bi cáan, Kalide syɛ́ɛnbèle bee be kpɔɔmɔ kpéʔele pe bàtobèle ni lè.

¹⁵ Mii wi nyɛ Yawe yele Wojanw, Isirayɛli Faanfɔw, ní yele Fànʔafɔw.»

Kovɔngɔ fìími tára ni

¹⁶ Yawe wi syɛ́ɛnri naa joo, woro wee wi kogbɔʔɔ wòlo sólomi lɔ̀ʔɔ nínge ni lè, ní kobile, fànnɛʔɛgɛ loyi nínge ni lè,

¹⁷ woro wee wi wòtorobéle, ní syɔɔnyɔ tórogi kapɛɛnnɛ séʔe ma lè, n fàra kapɛɛnkpumɔnbéle kabiga, ní kapɛɛnkpumɔn-sànbalibéle na. Pe n sínɛ pe si a ní yìri í, pe n fígi, pe n sógi n kwɔ́ɔ àmɛɛ fètinmɛɛnnɛ nyɛ lè.

¹⁸ «Yele a ní kɔ́ ra sɔ̀ngí da taagi booma kérigèle na í. Yele a ní kɔ́ ra sɔ̀ngí kasɔ̀lɔgwɔɔgèle na í.

¹⁹ Wéle, mii a yafɔngɔ sámaga, koro gi folo ni yirigi n kwɔ́ɔ gee, yele o gi nyaagi ì? Mii a kogbɔʔɔ wòlo fìími tára ni, bi cábiya pye yaa fóo táwaari na.

²⁰ Sìnbirigi yaweere a ra mii kpɔ́ʔɔgi, ti lè gbàáyi, ní sòʔolobéle, níì cán mii a lǒgi le fìími tára ni, bi cábiya pye táwaari ni, koro ga pye bi lɔ̀ʔɔ kaan mii syɛ́ɛnbèle ma pe gbaa, pe lè mii wonyɛnɛ-wòlobèle.

²¹ Syɛ́ɛnbèle mii sámaga niyɛɛ wòolo lè, pe a ra mii soololi kèlē jáari.

Kolocɔlɔɔ kútiiw ní Isirayɛli ní

²² «Ee Zyakɔbi, mii mɛ́ɛgi ban mɔ yeri í! Ee Isirayɛli, mɔ n mii kéeli nyaa miyɛɛ na fɔ̀rɔgɔ.

²³ Mɔ ga mɔ bapiigèle wòlo mii ma sáriga-sórigoo í. Mɔ sárigaw da pye mii kpɔ̀ʔɔrɔlɔ kéele na í. Mii ga mɔ kpɛ̀ɛn ní yakaanya kéele ní í, mii ga mɔ fɔ̀rɔ ní nùndaanna yasorigogo kéele ní í.

²⁴ Mɔ ga nùndaanna kàgaanna syɔɔ wáli na n kaan mii ma í. Mɔ ga mii tín mɔ sárigaw kaasìnmɛ na í. Kàjáa mɔ n mii wɔʔɔ ní mɔ kapeegèle ní, mɔ n mii fɔ̀rɔ ní mɔ kakolobyeri ní.

²⁵ Mii wii, mii wee wi mɔ kapeeyi kurugu ni láari yaà niyɛɛ kéeli na lè, mii a ní sɔ̀ngi bi taa mɔ kapeegèle kéele na í.

²⁶ Mii sɔ̀ngumi tìrige wozɔlɔgwɔɔgi na, wo pínɛ wo joo, ki n yɛlɛ mi mɔ tiimaa wóri joo, koro ga pye mɔ í tànʔa taa.

²⁷ Mɔ tóolɛɛseliw n kapeele pye, mɔ syɛɛnloʔojoobèle n peyɛɛ bye niceebéle mii kàbangi na.

²⁸ Koro na mii tɛɛcǎngi kùndigibéle pye yanɔnʔɔyɔ, mii n Zyakɔbi kaan kálagili ma, n Isirayɛli kaan faʔari ma.