Ezayi 42 - Cebaara Bible 2010

Yawe falipyew kéele (Ŋúnuzeligi)

¹ «Mii falipyew wéle, woro wee mii tɔʔɔ n yérige lè, mii wonyɛnɛ-wòlow wi nyɛ lè mii fúngi yanidaanmaga. Mii n mii Pǐli taʔa wi na. Wi a kútiisinw tɛ̀ɛn syɛɛnfeleyi na.

² Wi a ra yákpoli wáa í, wi a ra yákpoli yìrigí í, wi yákpoli wáama a ra lúro kàlari-kóloyi ni í.

³ Wi a tée nyɛ́nɛri kàgaangabi-bánana kabi bi foro í, wi a tée fètin-vɛ́ɛnɛvɛɛnɛnɛ fígi bi foro í. Wi a kútiisinw tɛ̀ɛn bi yɛlɛ ní kányɛɛgi ní.

⁴ Wi fǎngi a cɛ́rɛ í, zɔ̀nviige a wi kɔni í, bi taa wi ba kútiisinw télege tári na, lǒgi nínge tátɛɛgéle woolo si yére wi làlwaw ni.»

Gbɛ̀ɛnmɛ syɛɛnfeleyi ma

⁵ Kolocɔlɔɔ wi lè Yawe, woro wee wi nyɛ̀ʔɛgèle sámaga lè níì ge càli, níì tári cariga n fàra yáriri na di yirigi di ni lè, ní i ŋɔ́ngari kaangi bele ma be nyɛ wodɛ́ɛnbéle ní di ni lè, ní i pìígèle nii bele ni be di fé ni forogi lè, woro wi jo:

⁶ «Mii Yawe, mii n mɔ yeri sínni kéele na, mii n mɔ cò kɔ́gi na, mii i mɔ kpáaw wéle, mii n mɔ sámaga jàngó bi mɔ kpéʔele joogaanna syɛ́ɛnbèle ma, ní syɛɛnfeleyi gbɛ̀ɛnmɛ,

⁷ mɔ í da fúunbèle nyapiigéle múru, bàā púlobèle yirigi kàsow ni, ní bele be nyɛ lè wodɛ́ɛnbéle ní yébilimi ni, bàā poro yirigi kàsokpaagi ni.

⁸ Mii wi nyɛ Yawe, koro gi nyɛ mii mɛ́ɛgi. Mii a tée mii nìjangbɔɔri kaan wàa nikwɔɔ ma í, wàlá bi mii kpɔ́ɔmi kaan yasunyo ma í.

⁹ Wéle, booma kérigèle n kpéʔele n foro n kwɔ́ɔ, mii si ní i wovɔngèlē kéele nyuu yele ma. Mii n gi yaʔa yele í ge kéeli cán sáni ke kɔ́ ba folo bi yiri lè.»

Yawe a keele pye

¹⁰ Yaa ŋúnuvɔngɔ ŋúu Yawe ma, wi sòololi wóʔo, nlaa yaà dulunyanw láʔala na, yele bele ye sɔ̀lɔ́ ni máari lè sólomi lɔ̀ʔɔ ǹjoʔo ni, ní yele bele ye gi nyìn lè, ní lǒgi nínge tátɛɛgéle, ní ge tɛ́ɛnfɔbèle.

¹¹ Ki n yɛlɛ fìími tára ní di kěyi í da yákpogèle wáa, n fàra kèpiigèle na beè Kedaari nyɛ lè wodɛ́ɛɔn ní. Ki n yɛlɛ Fálagi tɛ́ɛnfɔɔlɔ í da ŋúu. Páā fundaanra yákpogéle wáa bi be yaʔa yaà nyanbeleyi ǹjoyo ni.

¹² Nìjangbɔɔri n yɛlɛ bàā taari Yawe na, wi sòololi kéele sáā jáari lǒgi nínge tátɛɛgéle ni!

¹³ Yawe i yirigi àmɛɛ nànnirio nyɛ lè, wi i wi fàngbɔɔgi tèé àmɛɛ kapɛɛnkpumɔn-nàɔn nyɛ lè. Wi i yákpoli wáa, wi i yákpogbɔɔlɔ wáa, wi i fànʔa taagi wi nigoobèle na.

Yawe katimanani

¹⁴ «Mii n pyèri nlaa yaà làridɔɔnnɔ ni, mii n mii nyɔ́ɔgi tɔ́n, mii n niyɛɛ cò. Mii i cɛ́ɛn móō cɔlɔɔ wii, wee wi nyɛ seeli na lè. Mii i ŋɔ́ngari kíle ní fànʔa ní, ní i ŋɔ́ngi ni fɔ̀ngí.

¹⁵ Mii a nyanbeleyi, ní dǎndamayi kálagi, mii a yi tiipiriri myɛ waʔa. Mii a cábiyi kàriga táfàa tɛ́ɛyɛ. Mii a lòkpoloyi waʔa.

¹⁶ Mii a fúunbèle yaʔa paa táanri kologaa ni, gee gi lè pe da gi cán í, mii a be yɛ́ɛgi kíni kobiigèlē ni, gele pe da tée lè. Mii a yébilimi kàriga gbɛ̀ɛnmɛ pe yɛʔɛ̀ ma, si tɛɛ̀gbóʔolo-gboʔoloyi kàriga tɛɛ̀fála-falaya. Gee bee mii a tɔ̀nɔ́ kpéʔele, mii a tɔ̀nɔ́ be wáa yaʔa í.

¹⁷ Bele si be peyɛɛ daʔa yasunyi na lè, ní i gi nyuu tunmɔgbalari ma níì jo: ‹Yele i nyɛ wolo kolocɔlɔbèlē,› pe a lúru kàdoʔo ma, fɛ̀ɛrɛ a be taa.

Syɛɛnfelegi gi fùn lè níì dùnɔ̄

¹⁸ «Dùnɔbèle, yaa lúro! Fúunbèle, yaa wéle, yaa nyaagi!

¹⁹ Wìí wi ní i nyɛ fúunw mii falipyew kàdoʔo na? Ba wìí wi ní i nyɛ dùnɔ́w móō mii tundunw wii, wee mii tungu lè? Wìí wi nyɛ fúunw móō wee wi yɛɛ̀nyingi taa lè? Ba wìí wi nyɛ dùnɔ́w móō Yawe fálipyew wii?

²⁰ Mɔ n yanɛʔɛrɛ nyaa, kàjáa mɔ ga kɔ̀rɔsíi di na í. Mɔ líiweegèle n múgu, kàjáa mɔ o lúro í.»

²¹ Ki n Yawe dɛ́nɛ, woro sínni kéele na bi woro làlwaw kpɔ́ʔɔ, si nìjanri taʔa wi na.

²² Syɛ́ɛnbèle pèle si bɛɛ, bele be fuguri lè n be yáriri syɔɔ be na. Pe n pe myɛ pínɛ n pwɔɔ n yaʔa weecuruyi ni. Pe n tɔ́n kàsokpaayi ni, pe n be yáriri koli, wàa faala o be syoo í. Pe n be koli, wàa faala si o gi nyuu níì jo: «Pe lúrugo naa í.»

²³ Wìí wi nyɛ yele níngi ni, wee wi a wi líiyi cáan kérigèle bee ma lè? Wìí wi caa bi wi líiye cáan bi gi sámaga lóʔo, gee gi maa lè?

²⁴ Wìí wi Zyakɔbi le yanɛnɛ-mí-syɔɔbèle kɔ́yɔ ni, n Isirayɛli le yakolibèle kɔ́yɔ ni? Woro ban wi nyɛ Yawe ì, wee na wolo kapeele pye lè ì? Pe ga fɔ̀lɔ bàā táanri wi kóloyi ni í, pe ga wi làlwaw syɛ́ɛnrɛ lóʔo í.

²⁵ A wi si wɔ́ɔ̀ wi fundanʔagbanri sòʔo n wo Isirayɛli na n fàra kapɛɛnni gbànma na. A lee bee cò naà wi na kàbanyi myɛ na, gee bee si ga wi tama yafyɛn na í. A li wi sórigo mɛnɛ mɛnɛ. Wi ga yarigaa sɔ̀ngi gee bee na wi fúngi ni í.