Ezayi 41 - Cebaara Bible 2010

Syɔ́ɔnwee Yawe le lè kólogi ni

¹ «Lǒgi nínge tátɛɛgéle woolo, ye pyèri yé lóʔo mii ma! Ki n yɛlɛ syɛɛnfeleyi í da yi fǎngi kàragí wovɔngɔ ní. Ki n yɛlɛ ye nùuni naa, yáā nyuu. Wo pínɛ wo woyɛɛ dɛ̀ɛn kútiiw kánma na.

² Wìí wi fàndaaw yeri yaà sínni kayele na canʔafolomɔ ma? Wìí wi syɛɛnfeleyi le wi kɔ́yi ni níì wi télege fànʔafɔbèle nyúngo na? Wi ŋɔséew n be kàriga támiige. A wi sedegi be cariga àmɛɛ nyàásige nyɛ lè.

³ Wi n taʔa be na ni nɛnɛ, wi i sɔ̀lɔ́ kologaa ni, gee gi lè wi tɔ́lɔyi ga kɔ́ɔ̀ tánʔa gi ni í, yafyɛn o nangi wi na í.

⁴ Wìí wi kérigèle bee kpéʔele, níì ge foro? Wee wi yìrigèle syɛ̀ɛnnɛ yeri lè nlaa yaà gi sélimi na, woro wii. Mii Yawe wi lè wozeliw, mii wee wi a sèʔé kòro naa lè kàdoʔo ma wóbèle ma.»

⁵ Lǒgi nínge tátɛɛgéle woolo i wi nyaagi, a fyáara pye be na. Tári láʔagéle woolo i cɛ̀lɛ́, pe i nùuní ni maa.

⁶ Pe i peyɛɛ dɛ̀ɛmɛ́, syɔɔn o syɔɔn i gi nyuu wi senyɛnnɛ ma: «Nìrimɛ le!»

⁷ Fáliw kacaɔn i lòmaana nii tɛɛ̀kpumɔnw ni, ní wee wi túnmɔri wɔlɔgi ní màrito ní lè, woro i lòmaana nii wee ni wi kpúmɔn panaga na lè. Wi i gi nyuu túnmɔri kéele na be táriga lè níì jo: «Ti tárigaganmi n nyɔɔ.» Wi mɛ̀ɛ́ yasungi bee kóri n yérige ní pɔ́ndiibéle ní, jàngó ki a kɔ́ láʔa too í.

Mɔ a kɔ́ ra fɛ̀ɛgí tɔ́ɔliw ni í

⁸ «Mɔ si na, Isirayɛli, mii falipyew Zyakɔbi, mɔ wee mii nyɛ́nɛ n wòlo lè, Abirahami wi lè mii tàannyɛnw, woro yòdaʔagi,

⁹ mɔ wee mii cò n yirige yaà lè tári tɛɛ̀laʔala ma, mɔ wee mii yeri yaà lè ti láʔagèle ma, níì gi joo mɔ ma níì jo: ‹Mɔ i nyɛ mii falipyeo, mii n mɔ nyɛ́nɛ n wòlo, mii ga mɔ wáa n yaʔa í.

¹⁰ Mɔ a kɔ́ ra fɛ̀ɛgí í, níì cán mii i nyɛ ní mɔ ní. Mɔ a kɔ́ ra wéle da máari ní funjurugoro ní i, níì cán mii wi nyɛ mɔ Kolocɔlɔw. Mii i nìrimɛ nii mɔ ni, mii i mɔ dɛ̀ɛmɛ́, mii i mɔ tɔʔɔ ni yéregi ní mii fàndaari kàliige kɔ́lɔ ní.

¹¹ Wéle, bele myɛ fúnyo yi tanʔa lè gbanʔama mɔ kurugo, fɛ̀ɛrɛ a be taa, pé curugo. Bele myɛ be túngu ní mɔ ní lè pe a pye gbanzan yáriya, si kùu.

¹² Bele pe da ni kàsii yìrigí mɔ ma lè, mɔ a be caa, mɔ si a ní be nyaa í. Bele pe da pye kapɛɛnnɛ na ní mɔ ní lè pe a kàri bi pye gbanzan, ní fànʔa fun yáriya.

¹³ Níì cán mii Yawe, wi lè mɔ Kolocɔlɔw, mii n mɔ cò kàliige kɔ́gi na ní i gi nyuu mɔ ma níì jo: Mɔ a kɔ́ ra fɛ̀ɛgí í, mii a mɔ dɛ̀ɛmɛ.

Mii a mɔ dɛ̀ɛmɛ

¹⁴ « ‹Zyakɔbi, mɔ wi lè fyɛɛnpiige, Isirayɛli fànʔa fun yakuuli, mɔ a kɔ́ ra fɛ̀ɛgí í. Mii a mɔ dɛ̀ɛmɛ,› » Yawe wi jo nya, mɔ Nyunzyɔɔw wi lè Isirayɛli Wojanw.

¹⁵ «Wéle, mii n mɔ kpéʔele yaliisàn-mànzifɔɔn, wee nyɔ́ɔ gi tɛ́nɛ lè, wee ŋáaya yi fìrige lè. Mɔ a ra nyanbeleyi tánʔana, mɔ a ra yi tɔ́nʔɔnɔ. Mɔ a ra dǎndamayi kpéʔele àmɛɛ sùweʔe nyɛ lè.

¹⁶ Mɔ a be fɛɛ ní ségbanna ní, káfalagi a be láa kári, káfala-sìnjinnɛ a be cariga. Mɔ si na, mɔ a ra fundaanra kpéʔele Yawe ni, mɔ a ra miyɛɛ gbɔ́ʔɔgi Isirayɛli Wojanw ni.

Fìími tára karigala pùnweegéle tɛ́ʔɛ

¹⁷ «Fɔ̀rɔgi fɔ̀ɔlɔ, ní foomɔfɔbèle i lɔ̀ʔɔ caa, kàa si o yaà í. Pe nyíngèle n waʔa lògbaalaagi báriga ni. Mii Yawe a be nyɛ́ɛrigi lóʔo. Mii wi lè Isirayɛli Kolocɔlɔw, mii a be yaʔa í.

¹⁸ Mii a cábiya yirige tiire fun dandamayi ǹjoyo ni, ní pùnweegéle, jǐnlɔyi nínge ni. Mii a fìími tára kàriga lònɛʔɛgɛ tɛ́ʔɛ, bi táwaari kàriga pùnweegéle tɛ́ʔɛ.

¹⁹ Mii a sɛdiri tíiri, ní akasya tíiri, ní miiriti tíiri, ní olivye tíiri yaʔa di pye fìími tára ni. Mii a siipirɛ tíiri, ní ɔrimi tíiri, ní buyisi tíiri pínɛ pye táwaari ni.

²⁰ Koro ga pye pe gi nyaa, si gi cán, si wɔ́ɔ pínɛ bi gi sámaga wéle bi gi kɔ́rɔw cán bi cán Yawe kɔ́gi ki di kpéʔele, bi cán Isirayɛli Wojanw wi di faan.»

Gee gi joo kolocɔlɔ-fáanabèle kánma na lè

²¹ Yawe n jo: «Ye yele kéeli tɛ̀ɛn.» Zyakɔbi Fànʔafɔw n jo: «Ye gi joo ye tɛ̀ɛn, gee gi nyɛ yele ma lè.

²² Ki n yɛlɛ pe nùuni naa, pe ba gi fílige be joo be tɛ̀ɛn wolo na, gee gi maa ba kpéʔele lè. Kérigèle ge sɔ̀lɔ booma ni lè, mɛ̀ɛ́ ke da pye? Ye ge joo wolo ma koro ga pye wolo í sɔ̀ngi ge kéeli na, bi gi cán àmɛɛ ke da pye lè. Wàlá gee gi maa lè, ye gi joo ye tɛ̀ɛn wolo na.

²³ Kérigèle ge maa ba kpéʔele kàdoʔo ma lè, ye ge joo ye tɛ̀ɛn, koro ga pye wolo a gi cán bi cán yele i nyɛ kolocɔlɔbèlē. Ye tɛ́nɛ ye yarigaa kpéʔele, kacànga yoo, kapeʔe yoo, koro ga pye wolo í gi nyaa, wo myɛ si pínɛ bi gi sɛʔɛ wéle.

²⁴ Wéle, yele o nyɛ yafyɛn í, yele kapyegèle i nyɛ gbanzan wòʔolo. Bi yele nyɛ́nɛ wòlo, gee bee i nyɛ yanɔnʔɔgɔ.

²⁵ Mii n wàa yìrige yaà solomɔkulo kàbangi na a wi pan. Mii n wi yeri yaà canʔafolomɔ ma wi mɛ́ɛgi na. Wi i yɛɛ̀kinibèle tánʔana ní tɔ́lɔyi ní àmɛɛ fariga nyɛ lè, ní àmɛɛ cóofaaɔn cóoro tánʔana lè.

²⁶ Wìí wi gi joo ki sélimi na yaà, jàngó wolo i gi cán, ní nlaa yaà booma ni, jàngó wo jo: ‹Ki n sín?› Kàjáa wàa faala o gi nyuu ni tèé í, wàa faala o gi jáari í, syɔɔn faala o yele syɛ́ɛnri lúro í.

²⁷ Mii wi nyɛ wozeliw, n gi joo Siyɔn ma níì jo: ‹Wéle, pe wéle bele.› Mii maa fundaanra tunduɔn tórigo Zyerusalɛmi ma.

²⁸ A mii i wéle, syɔɔn faala ga pye yaà í, syɔɔn faala o nyɛ be ni wee wi sɔ̀ngurɔ tèé lè í, wàlá mii ga wi yíbe yarigaa na wi gbǎn syɛɛnlurugori kaan mii ma í.

²⁹ Wéle, pe myɛ bìnɛw i nyɛ gbanzan, pe kapyegèle o nyɛ yafyɛn í. Pe yasunyi i nyɛ káfalaga, ní wɔ́ɔ i nyɛ fúu.