Ezayi 40 - Cebaara Bible 2010

SƐBƐW TILA-SIIN WOʔO ( 40—55 ) Isirayɛli ye kpɛʔɛlɛli Ye fànʔa le mii syɛ́ɛnbèle ni

¹ Ye mii syɛ́ɛnbèle kpɛʔɛlɛ, ye be kpɛʔɛlɛ, yele Kolocɔlɔw wi jo nya.

² Ye Zyerusalɛmi fúngi tìrige, ye yákpogèle wáa ye gi joo wi ma wi kapɛɛnkpumɔnri n kwɔ́ɔ, wi kolomi kùsulugo n syɔɔ, yé jo Yawe kɔ́gi n wi kapeegèle myɛ sàra kaan wi ma ki tɛɛyɛ siin.

³ Yákpolo i wáa ni gi nyuu níì jo: «Ye kologo sámaga Yawe ma fìími tára ni, ye kogbɔʔɔ sámaga falafala wolo Kolocɔlɔw ma táwaari na.

⁴ Ki n yɛlɛ jǐnlɔyi myɛ í yìri ǹjogi ni, nyanbeleyi myɛ, ní dǎndamayi myɛ si tìgi, dǎndama-piigèle myɛ si tìgi bi pye tɛɛ̀fála-falaya, tɛɛgbɛ̀dɛyi myɛ si cariga bi tímana.

⁵ Lǎli bee ni Yawe nìjangbɔɔri a tɛ̀ɛn. Syɔɔn ye myɛ a pínɛ di nyaa. Níì cán Yawe nyɔ́ɔgi gi joo.»

⁶ Joomɔ n lóʔo a bi jo: «Da yákpoli wáa!» A mii jo: «Mii í ra yákpoli wáa bàā nyàʔá nyuu?» A bi jo: «Syɔɔn ye myɛ i nyɛ nyàā, pe nìjanri myɛ i nyɛ àmɛɛ sìnbirigi nyàáfyɛɛnrɛ nyɛ lè.

⁷ Nyàági i waari, a gi fyɛ́ɛnri i fánagi, lǎli ni Yawe káfalagi ga tɛ́nɛ̀ di fɛɛ lè. Kányɛʔɛ na syɛ́ɛnbèle i nyɛ àmɛɛ nyàā nyɛ lè.

⁸ Nyàági i waari, a fyɛ́ɛnri i fánagi, kàjáa wolo Kolocɔlɔw syɛ́ɛnrɛ a kòro beè làla o làla.»

Syɛɛnjóocǎnri, dee di yɛlɛ bàā nyuu lè

⁹ Lúgu nyanbe-nyundɔnɔgɔ na, Siyɔn mɔ wee wi lè fundaanri tunduɔn, da nyuu ní fànʔa ní, da yákpoli wáa ǹjogi ni fyáara fun ni, Zyerusalɛmi, mɔ wee wi lè fundaanri tunduɔn. Ki joo Zyuda kěyi ma mí jo: «Yele Kolocɔlɔw wéle wee!»

¹⁰ Kàfɔw Yawe wi maa wee ní séekpɔɔw ní, wi kɔ́gi i yáriri myɛ kùrú ni kaangi wi ma. Wi sàraw i nyɛ wi ma, wi yakaanri n kíni wi yɛ́ɛgi na.

¹¹ Wi a ra wi bàtogi nàʔá àmɛɛ bànaʔaɔ nyɛ lè, wi a ra bàpiigèle kpóʔoro ní wi kɔ́gi ní, sáā ge lée da taari wi fìcibigi na. Wi a ra bànɔɔbèle kɔ́ri bàā syée yɛ́rirɛ, bele má pìíbèle ŋɔri lè.

Dulunyanw Kàfɔlɔ kpɔ́ʔɔganma ní wi sícilimi

¹² Wìí wi sólomi lòyo tímana wi kadaatɛ́ɛw ni, n nyɛ̀ʔɛni tímana ní wi kadaali ní, n támiigi kíri ní yakirige ní, n nyanbeleyi ní dǎndamayi cáan cúlo na?

¹³ Wìí wi yarigaa tímana n tɛ̀ɛn Yawe Pǐli na? Wìí wi wi tama yarigaa na?

¹⁴ Wìí syɔ́ɔn wi yíbe jàngó woro i tamana taa wi ma? Wìí syɔ́ɔn wi wi tama kányɛɛgi kólogo na? Wìí wi wi tama sícilimi na, níì cánni kólogo tɛ̀ɛn wi na?

¹⁵ Wéle, syɛɛnfeleyi i nyɛ àmɛɛ lòsɔ̄lɔlɔ nibin nyɛ li yiri kasànna ni n too lè. Yi i nyɛ àmɛɛ cíbige nyɛ lè cúlo na. Wéle lǒgi nínge tátɛɛgéle i nyɛ àmɛɛ cíbi-yárira nyɛ lè.

¹⁶ Liban tíiri a náagi kàjegbɔnnɔ yɛlɛ í. Wi yaweeri a sáriga-sórigow yɛlɛ í.

¹⁷ Syɛɛnfeleyi myɛ bìnɛw o nyɛ yafyɛn wi yɛʔɛ̀ ma í. Yi i nyɛ tɔ̀nɔ fun yáriya, gbanzan yáriya, yi a yafyɛn nyɔɔ í.

Kolocɔlɔɔ félege o nyɛ í

¹⁸ Wìí ní yele caa bi Kolocɔlɔɔ tímana? Yarigìí niwirige ní yele a wi tímana?

¹⁹ Fáliw kacanwaa wi gáà tunmɔrɔ gbàla n tɛ́ʔɛ n ǹdew faan. Tɛɛkpumɔnwaa n si tɛ́ɛw tɛ́ʔɛ n gi pɔ̀li n tɔ́n si wálifiio nyɔ̀ʔɔdirigéle táriga gi na.

²⁰ Wee si wi fɔ̀n n sɔ̀lɔ lè yafaangi bee kàa taala na, wee bee n tiinaa-sìnvɔnʔɔgɔ nyɛ́nɛ n wòlo, si fáliw kacanwaa caa, woro n baa ǹdewaa tan, wee wi lè wi a gbǎn láʔa too í.

²¹ Yele ga gi cán ì? Yele ga kɔ́ɔ̀ gi lóʔo ì? Ki ga kɔ́ɔ̀ joo yele ma nlaa yaà sélimi na ì? Yele ga kɔ́ɔ̀ tári kàpɔɔn tɛ́ɛnganma kéele cán ì?

²² Woro wi nyɛ wodɛ́ɛɔn ní tári ǹjoʔo ni di nyɛ lè círiri, dee syɛ̀ɛnnɛ be nyɛ àmɛɛ kúdo nyɛ lè. Wi n nyɛ̀ʔɛni càli àmɛɛ fànifɛɛlɛfɛɛlɛɔ nyɛ lè. Wi n li cariga àmɛɛ wi fànikpaʔa nyɛ lè, n li kpéʔele wi tɛɛkòrogi.

²³ Woro wi fànʔafɔbiigèle kpéʔele gbanzan yáriya, ní i tári kútiijoobéle kàragí fànʔa fun yáriya.

²⁴ Alí pe ga caà cɔ́rɔ í, àlí pe ga caà lùgu í, àlí be tiinyungi nìnre ga caà cùru tári ni í. Wi i be fee ní wi nyɔ́ɔgi káfalaga ní, pe n waʔa. Káfala-sìnjinni n be láa àmɛɛ nyàásige nyɛ lè.

²⁵ «Wìí ní yele mii tímana? Ba wìí ni yele mii córo sèjira?» Wojanw wi jo nya.

²⁶ Ye nyapiigèle yìrige yaa wéle ǹjoʔo ma! Wìí wi yáriri bee sámaga, kapye wee wi ŋɔripiigèle sámaga n taani keyɛɛ na lè woro ban í? Wi i ke myɛ nibin nibin yiri ke mɛ́ɛyi na. Wi fàngbɔɔgi, ní wi séekpɔɔw báriga ni, yafyɛn o fɔ̀ngí ge ni í.

Fànvɔ́nyɔ, fànʔafunvɔbèle ma

²⁷ Nyàʔá na mɔ gi nyuu, Zyakɔbi, nyàʔá na mɔ gi nyuu ni taʔala, Isirayɛli, níì jo: «Mii tɛɛ̀kárigi n làra Yawe na, mii kányɛɛgi i sɔ̀lɔ́ mii Kolocɔlɔw na wi o gi kɔ̀rɔsíi í?»

²⁸ Mɔ ga gi cán ì? Mɔ ga kɔ́ɔ̀ gi lóʔo ì? Bàngwɔɔ Kolocɔlɔw wi lè Yawe, woro wi tári láʔagéle myɛ kúun. Wi o fɔ̀rɔgí í, wi bárigaw o kwóo í. Wi sícilimi i nyɛ tɛɛ̀laʔala fun.

²⁹ Wi i fànʔa kaangi wee má wi fɔ̀rɔ lè, wi i kàa fàrá wee báriga na wi nan tɛɛ̀kwɔɔli na lè.

³⁰ Alí nìbyapiiri fànʔa i kwóo, ti i fɔ̀rɔgí, nìgɔcaribèle si i kpírigi ni tuun.

³¹ Kàjáa bele be wéle Yawe ma lè, bele bee fànʔa i kàragí wovɔngɔ ní. Pe i yìrigí fókaanya na àmɛɛ nyɔ́ɔbèle nyɛ lè. Pe i fé, pe o fɔ̀rɔgí í. Pe i táanri pe bárigaw o kwóo í.