Ezayi 39 - Cebaara Bible 2010

Ezekyasi n Babilɔni tundungbolobèle sámaga n cò

¹ Lǎli bee ni Babilɔni fànʔafɔw Merodaki-Baladan, wi pye lè Baladan jáaw, a woro sɛ́bɛ ní kpɔʔɔrɔ tórigo Ezekyasi ma, níì cán wi maa Ezekyasi yáami ni wi pɔʔɔli keele lóʔo.

² A Ezekyasi fundaanra kpéʔele kéeli bee na, níì wi yáriri tɛɛkɔnyɔ myɛ tɛ̀ɛn tundunbèle na ti lè wálifiiw, ní tɛ́ɛw, ní nùndaanni yárira, ní nùndaanni sìnmɛ ní n fàra wi kapɛɛnkpumɔn-yáriri tɛɛ̀tɛʔɛgɛ, ní yáriri myɛ na di pye wi lɔ́ri tɛɛkɔnyɔ ni lè. Ezekyasi kpáagi yárigaa, ní wi tári tɛ́nɛmɛ yárigaa ga kòro sìndɛ̀ɛn ni be na í.

³ A kanyaajoow Ezayi pan fànʔafɔw Ezekyasi ma n baa wi pye: «Nyàʔá syɛ́ɛnbèle bee baa joo mɔ ma? Sán si be caà yìri?» A Ezekyasi wi yari: «Pe n yìri kùleelile ni fwɔɔ Babilɔni ma.»

⁴ A Ezayi níì jo: «Nyàʔá si pe baa nyaa mɔ kpáagi ni?» A Ezekyasi wi yari: «Pe n mii kpáagi yárira myɛ nyaa. Yarigaa faala ga kòro mii lɔ́ri tɛɛkɔnyɔ ni, gee gi lè mii ga gi tɛ̀ɛn be na í.»

⁵ A Ezayi Ezekyasi pye: «Syɛ́ɛnri lóʔo, dee Nyɛ̀ʔɛni Sùlasiibéle Kafɔlɔ Yawe joo lè.

⁶ Wéle, canyaa i maa, yee ni pe a ba mɔ kpáagi yárira myɛ koli bi kári Babilɔni ma lè n fàra dee myɛ na mɔ tóolɛɛbèle da caa n yaʔa beè lè n baa nan níjanʔa na, ki kàa faala a kòro í.» Yawe wi jo nya.

⁷ «Pe a mɔ pìíbèle pèle cò, bele pe a yiri mɔ ni lè, poro bele mɔ a see lè, bi kári ní be ní sa be wòlo, si be cáan be pye falipyebèlē Babilɔni fànʔafɔw kpaʔa ni.»

⁸ A Ezekyasi Ezayi yari: «Yawe syɛ́ɛnri mɔ joo lè, ti n nyɔɔ.» A wi níì jo: «Níì cán bi mii yaʔa sìi na, yɛɛ̀nyinge, ní ŋɔ́ndaala a pye beè.»