Ezayi 38 - Cebaara Bible 2010

Ezekyasi yáami, ní wi pɔʔɔli kéele

¹ Cányi bee ni a Ezekyasi yaaguumi too wi na. Kanyaajoow Ezayi, wi lè Amɔsi jáaw, a woro pan wi ma n baa wi pye: «Yawe n jo: ‹Ki n yɛlɛ mɔ í mɔ kpáagi kèlē cɔɔnri lǎli naa ni. Níì cán mɔ a tɔ̀nɔ́ kùu, mɔ a ní kòro sìi na í.› »

² A Ezekyasi wi yɛ́ɛgi wáa gúngi ma níì Yawe nyɛ́ɛri níì jo:

³ «Ee Yawe, nyɔɔ mii na, sɔ̀ngi mi taa gi na mi cán mii maa ni táanri mɔ yɛ́ʔɛ ma kányɛɛgi ní funviiw na, ní wɔ́ɔ i gi kpéʔele gee gi nyɔɔ mɔ nyɛ́nɛ na lè.» A Ezekyasi tɔ̀nɔ n nyɛni gbanʔama.

⁴ Lǎli bee ni a Yawe syɛ́ɛnri naa nan Ezayi na wi n jo:

⁵ «Da syée mi sa gi joo Ezekyasi ma mí wi pye: ‹Yawe wi lè mɔ tóolɛɛgi Davidi Kolocɔlɔw, wi n jo: Mii n mɔ nyɛ́ɛrigi lóʔo, mii n mɔ nyatinmi nyaa. Mii a yɛ̀ʔɛlɛ kɛɛ ní kagunɔ taʔa mɔ cányi na.

⁶ Mii a mɔ ní kěgi naa syɔɔ Asirii fànʔafɔw fànʔa ma. Mii a ra kěgi naa kpáa wéle.

⁷ Yawe a gee naa kpéʔele gi pye mɔ ma fɛ̀ɛ, jàngó mɔ í gi cán gee Yawe joo lè, wi a gi kpéʔele.

⁸ Wéle cángi kànyinnɛ li tìgi lee Akazi tɛɛ̀lúgugéle kɛɛ na, mii si a gi lúrugo kàdoʔo ma bi láʔa tɛɛ̀lúgugèle bee na.› » Cángi kànyinnɛ maa tìgi n kwɔ́ɔ n nan tɛɛ̀lúgugèle gele kɛɛ na lè, a gi níì lúru kàdoʔo ma n láʔa gele bee na.

Ezekyasi nyɛ́ɛrigi wi pɔʔɔli kàdoʔo ma

⁹ Zyuda fànʔafɔw Ezekyasi ŋúnugi, wi yáami, ní wi pɔʔɔli kéele na.

¹⁰ Mii maa ni gi nyuu niyɛɛ ma níì jo: «N mii yaʔa mii sìíw làrijànna ni, a gi pye ŋàʔanaga fwɔɔ mii í kári kúbèle tɛɛkòrogo kpàánweegéle ma. Mii n fɔ̀n mii yɛɛzangèle ni.»

¹¹ Mii maa ni gi nyuu níì jo: «Mii a ní Yawe nyaa í, mii a ní Yawe nyaa niweebèle tára na í, mii a ní nyapile taʔa syɔɔn faala na dulunyanw syɛ̀ɛnnɛ nínge ni í.

¹² Mii tɛɛkòrogi n láa n léeli mii na àmɛɛ bànaʔaɔ fànikpaʔa nyɛ lè. Mii sìíw jèsee mɛ́ɛnnɛ n ceri ni kùrú àmɛɛ kpɛ̀ɛratiiɔn fàni cɛnɛ jèsee na lè. Cángi ní yébiligi ni, mɔ a mii kwɔ́ɔ foro!

¹³ Mii n niyɛɛ cò fwɔɔ n baa nan nyǐngi nyɔ́ɔ na. Wi maa ni mii kaceleyi myɛ kabagi àmɛɛ càaraɔ nyɛ lè. Bi láa cángi làla ni ba nan yébiligi na, mɔ a mii kwɔ́ɔ foro.

¹⁴ Mii i yákpo-pipiigéle wáa àmɛɛ zǎlɛɛlɛ nyɛ lè. Mii i cɛ́ɛn àmɛɛ kàtolo nyɛ lè, mii nyapiigèle ge wéle ǹjoʔo ma lè, ge fǎngi i kwóo. Ee Kàfɔw, wɔʔɔli i mii na, mii syɔɔ.»

¹⁵ Nyàʔá mii a joo? Wi n syɛɛnlurugori kaan mii ma, woro tiimaa wi gi kpéʔele. Mii a niyɛɛ jɛ́rɛ sáā táanri mii sìíw yɛ̀ʔɛlɛ myɛ ni, mii fúngi wɔʔɔgbɔʔɔ kéele na.

¹⁶ Kàfɔw, mɔ funjǎngi kapyegèlē báriga ni syɔɔn sìi taagi, koro bárigaw ni mii sèʔé i ŋɔ́ngi. Mɔ i mii cólogi ni sìi kaangi mii ma.

¹⁷ Wéle, mii wɔʔɔgbɔɔgi tiimaa n kàri n pye yɛɛ̀nyinge. Mɔ tiimaa wi tàmaga le ní mii sìíw ní níì wi syɔɔ gbanzan weecurugi ma. Níì cán mɔ n mii kapeegèle myɛ wáa miyɛɛ kàdoʔo ma.

¹⁸ Níì cán kúbèle tɛɛkòrogo ban ki mɔ kpɔ̀ʔɔrɔ́ í, kùúw ban wi mɔ sòoló í. Bele be tìgi n jée weecurugi ni lè, bele bee sɔ̀ngumɔ ní o nyɛ mɔ funviiw na í.

¹⁹ Wee wi lè niweew, wee wi lè niweew, woro wi mɔ kpɔ̀ʔɔrɔ́ àmɛɛ mii nyɛ ni gi kpéʔele lè níjanʔa. Tofɔlɔ i mɔ funviiw kéele nyuu wi pìíbèle ma.

²⁰ Yawe n mii syɔɔ! Wolo a wolo yatingbumɔnri yaʔa taa kpúmɔn wolo sìíw canya myɛ ni, Yawe kpáagi ni.

²¹ Ezayi maa gi joo níì jo: «Ki n yɛlɛ paa maa ní děsyanʔa kɔ̀gunɔyɔ ní pe ba taʔa fìnigi na, Ezekyasi a pɔʔɔ.»

²² Ezekyasi si maa gi joo níì jo: «Nyàʔá ki a pye fɛ̀ɛ bi gi tɛ̀ɛn mii a lúgu kári Yawe kpáagi ma?»