Ezayi 36 - Cebaara Bible 2010

Asirii fànʔafɔw syɛɛngbanra, Zyerusalɛmi kánmi na

¹ Fànʔafɔw Ezekyasi fǎngi yɛ̀ʔɛlɛ kɛɛ ní sicɛrɛ wóli na, a Asirii fànʔafɔw Senakeribi lúgu n kári Zyuda kèniriyi myɛ kánma na n sáà yi syɔɔ n taa.

² A Asirii fànʔafɔw kòro yaà Lakiisyi ni níì sùlasiibèle myɛ kàfɔlɔ taʔara, ní sùlasiinɛʔɛbéle yìrige n tórigo Zyerusalɛmi ma, Ezekyasi kurugo. A woro kári n sáà yére ǹjoʔo ma lǒgi wéʔe taana, gàla-le-nanw séʔe kólogo nyɔ́ɔ na.

³ Lǎli bee ni Hilikiyahu jáaw Eliyakimi, wi pye lè fànʔafɔ-gbaagi kakarigaɔ, a woro yiri n kári wi ma n fàra Syebina na wi pye lè sɛ́bɛkanw, ní Azafi jáaw Yowa, wi pye lè fǎngi kèlē sɛ́bɛtɛʔɛɔ.

⁴ A sùlasiibèle myɛ kàfɔlɔ taʔara sáà be pye: «Ye sa gi joo Ezekyasi ma yé wi pye: ‹Fànʔafɔgbɔɔw wi lè Asirii fànʔafɔw, wi n jo: Mɔ sɔngumi naa tɛɛtaʔaga nyúngo gi nyɛ nyàʔá?

⁵ Mɔ n gi joo miyɛɛ ma níì jo: Nyɔɔ káfalaga syɛ́ɛnrɛ dii yagana. Bi kapɛɛnnɛ kpúmɔn, láliiw ní fǎngi n yɛlɛ bi pye yaà. Tɔ́ɔliw ni doò, wìí na mɔ tága níì mii cée?

⁶ Wéle, mɔ n miyɛɛ daʔa Ezyipiti na wi lè nyɛnɛrɛ kàgana-gabigi bee, syɔɔnwaa ga wiyɛɛ zígi gi na, ki n jée wee bee kadaala ni n súu n fùru. Kánmi bee na Faraɔnw nyɛ wi lè Ezyipiti fànʔafɔw bele myɛ ma be tága wi na lè.

⁷ Dɔ̀ʔɔ mɔ a mii pye: Yawe wolo Kolocɔlɔw na wolo tága. Kàjáa woro sáriga-wòlo-tɛ́ɛyi ban Ezekyasi kwɔ́ɔ n yirige yaà ní wɔ́ɔ̀ sáriga-wòlo-yafaanyi cáan n núngo yaà, níì gi joo Zyuda ní Zyerusalɛmi ye ma níì jo: Yaa tíri yaa tuun sáriga-wòlo-yafaangi naa yɛ́ʔɛ ma ì?

⁸ Tɔ́ɔliw ni ki n yɛlɛ mi bɛ̀ɛ gi na, mɔ ní mii kùndigiw ní, wi lè Asirii fànʔafɔw, mii a syɔɔnyɔ selebinnɛ kaan mɔ ma, kapye mɔ a gbǎn syɔɔnfànbēle taa bi lúrugo yi na.

⁹ Bele be nyɛ lè mii kàfɔw falipyebèlē myɛ kàdotɔnbéle mɛ̀ɛ́ mɔ a gbǎn kùndigiw bee wàa ŋɔrigɔ bi lúrugo bi sɛɛ? Mɔ n tága Ezyipiti na, gee bee n jo wòtorobèle ní syɔɔnfǎnbèle na.

¹⁰ A gi si caa i lé móō Yawe nyɛ́nɛ kéeli kàdoʔo na mii lúgu n pan ba tɛ́ɛgi naa kálagi? Yawe n mii pye: Lúgu mi kári tári bee kánma na mi sa di kálagi.› »

¹¹ A Eliyakimi, ní Syebina, ní Yowa sùlasiibèle myɛ kàfɔlɔ taʔara pye: «Wolo i mɔ nyɛ́ɛri, da nyuu ní wolo ní Arameyɛnri ni, wolo wo nyɛ lè mɔ falipyebèle, níì cán wolo n di cán. Mɔ a kɔ́ ra nyuu ní wolo ní Zyuda ye syɛ́ɛnri ni, bàā nii syɛ́ɛnbèle líiweegéle ni be nyɛ tǒw ǹjoʔo ni lè í.»

¹² A sùlasiibèle myɛ kàfɔlɔ taʔara be yari: «Yele kàfɔw ní yele yagwɔɔlɔ ma lé mii kàfɔw mii tun mii í ba syɛ́ɛnri naa joo? Wi ga wɔ́ɔ̀ mii tun mii í ba di joo nǎnbèle bee ma be tɛ́ɛn tǒw ǹjoʔo ni lè ì, koro ga pye poro ní yele ní, yele í pínɛ bi yele fíri káa, si yele fíinmi gbaa ì?»

¹³ A sùlasiibèle myɛ kàfɔlɔ taʔara náà sámaga n yére níì yákpoli wáa gbanʔama n gi joo Zyuda ye syɛ́ɛnri ni níì jo: «Ye fànʔafɔgbɔɔw syɛ́ɛnrɛ lóʔo, wi lè Asirii fànʔafɔw.

¹⁴ Fànʔafɔw n jo: ‹Yele a kɔ́ Ezekyasi yaʔa wi yele fáana pùuni í, níì cán wi a gbǎn yele syɔɔ í.

¹⁵ Yele a kɔ́ gi yaʔa Ezekyasi í yele kaan yele í tága Yawe na í, si jo: Yawe a tɔ̀nɔ́ wolo syɔɔ, kěgi naa a tée jée Asirii fànʔafɔw kɔ́yɔ ni í.›

¹⁶ Yele a kɔ́ lóʔo Ezekyasi ma í. Níì cán Asirii fànʔafɔw n jo: ‹Ye bɛ̀ɛlɛ caa mii ma, yé lúru ye yeyɛɛ gaan mii ma, yele myɛ nibin nibin a ra yele ɛrɛzɛnw, ní yele děsyaangi líi, ye myɛ nibin nibin sáā ye kɔ̀lɔ́bèle lɔ́ʔɔ gbo,

¹⁷ bi taa mii í kɔ́ ba yele kɔ́ri kári táraa ma, dee di nyɛ àmɛɛ yele wóri nyɛ lè. Bilew, ní dùvɛɛnw tára dii. Búruw, ní ɛrɛzɛnkɔliyi tára dii.›

¹⁸ Ki ga yɛlɛ Ezekyasi í yele fáana pùuni í, si jo: ‹Yawe a wolo syɔɔ.› Syɛɛnfeleyi kolocɔlɔbèlē myɛ ni, a pe wàa gbàn lé n wi tára yirige. Asirii fànʔafɔw kɔ́yɔ ni?

¹⁹ Sán Hamati ní Aripadi kolocɔlɔbèle nyɛ? Ba sán Sefarivayimi kolocɔlɔbèle nyɛ? A be Samarii yirige lé mii kɔ́gi ni?

²⁰ Tátɛɛyi bee kolocɔlɔbèlē myɛ ni, pe bɛ̀lɛ́ pe be tára yirige mii kɔ́gi ni, Yawe si kɔ́ Zyerusalɛmi yirige mii kɔ́gi ni?»

²¹ A be pyèri pe ga syɛɛnkanga nibin lúrugo wi ma í. Níì cán fànʔafɔw maa syɛ́ɛnri naa joo n gbàn níì jo: «Yele a kɔ́ syɛɛnlurugoro kaan wi ma í.»

²² Hilikiyahu jáaw Eliyakimi wi pye lè fànʔafɔ-gbaagi kakarigaɔ, ní Syebina wi pye lè sɛ́bɛkanw, n fàra Azafi jáaw Yowa na wi pye lè fǎngi kèlē sɛ́bɛtɛʔɛɔ, a poro lúru n pan Ezekyasi ma ní búroyi ní wozuluguyo ní n baa sùlasiibèle myɛ kàfɔlɔ taʔara syɛ́ɛnrɛ joo n tɛ̀ɛn wi na.