Ezayi 35 - Cebaara Bible 2010

Lúrubangbɔɔli kéele

¹ Fìími tára, ní lɔ̀ʔɔ fun tári n yɛlɛ bàā fundaanra kpéʔele. Tári di waʔa lè, ki n yɛlɛ taa muguri, sáā fyɛ́ɛnrɛ kpéʔele àmɛɛ sìnbirigi nyàā nyɛ lè.

² Di fyɛ́ɛnri í nyɔɔ àmɛɛ sìnbirigi nyàáfyɛɛnrɛ nyɛ lè, táā muguri bàā fundaanra yákpolo wáa. Yawe a Liban nìjanri kaan di ma, n fàra Karimɛli ní Sarɔn nyɔɔni na. Pe a Yawe nìjangbɔɔri nyaa, ti lè wolo Kolocɔlɔw nyɔɔnɔ.

³ Ye fànʔa fun kɔ́yi dɛ̀ɛmɛ, yé fànʔa le fànʔa fun yégunyi ni.

⁴ Bele zɔ̀nbēle be cɛ̀lɛ́ lè, ye gi joo be ma yé be pye: «Ki n yɛlɛ ye nìrimɛ le, ye a kɔ́ ra fɛ̀ɛgí í. Yele Kolocɔlɔw wéle wee, kapeegèle gɔ̀lɔ́-wòloro i maa, wi a ge sàra, woro tiimaa wi a pan ba yele syɔɔ.»

⁵ Lǎli bee ni fúunbèle nyapiigéle a ra nyaagi, dùnɔbèle líiweegéle a múgu.

⁶ Lǎli bee ni tɔyaaya fɔ́lɔ a ra yegi àmɛɛ wogaà nyɛ lè, boboo nyínnɛ a ra fundaanra yákpolo wáa. Níì cán lònɛʔɛyɛ a ra fóo fìími tára ni, lòcooloyo a pye táwaari ni.

⁷ Tári di sórogi lè ti a kàri bi pye lòkpɔʔɔ, lògbaalaagi tára a kàri bi pye pùnweegéle. Tɛ́ɛgee ni gbàáyi sìnɛ́ lè, nyɛ́nɛri, ní lònyɔɔw nyàā a pye yaà.

⁸ Kologo a wòlo yaà, ki a pye kologaa gee pe a ra yiri lè Kojǎngi. Yanɔnʔɔgɔ a sɔ̀lɔ gi ni í. Bele pe a ra táanri gi ni lè, ki a pye poro yagwɔɔlɔ wóʔo, àlí kanaa-sìnjánbèle a gbǎn pùuni gi ni í.

⁹ Càaraɔ si a pye yaà gi ni í. Yaweepeʔe a kólogi bee láa í. Ki kàa a fàrá nyaa gi ní í. Bele nyúnyo yi syɔɔ lè, poro pe a ra táanri gi ni.

¹⁰ Kánmi bee na, bele Yawe syɔɔ lè pe a lúru pan, pe a ra ŋúu bàā maa bi ba jée Siyɔn ni ní fundaanra ní, bàngwɔɔ fundaanra a pye àmɛɛ fànʔafɔ-nyùndɔnnɔ nyɛ lè pe nyúnyi ni, mugurumɔ ní fundaanra a pye be ma, fúnyi wɔʔɔgɔ, ní cɛ́ɛnmi a fàn bi kári.