Ezayi 34 - Cebaara Bible 2010

Edɔmi kútiiw kéele

¹ Ye nùuni naa yele tátɛɛyi syɛɛnfeleye, ye lóʔo syɛɛnfeleyi, ye yele líiyi cáan! Tári n yɛlɛ di lóʔo, n fàra yáriree na di di nyìn lè, dulunyanw, ní yáriree myɛ wi yirigi lè!

² Níì cán Yawe fúngi n tanʔa gbanʔama tátɛɛyi syɛɛnfeleye myɛ kurugo, wi fúngi n yìri gbanʔama pe kapɛɛnkpumɔnbèle myɛ kurugo. Wi a be kálagi bi yirige yaà péw. Wi n be kaan kpóogbɔɔli ma.

³ Pe wogboobèle a wábagi màʔa, pe kúbèle fɔ́nʔɔnɔ núngo a ra yirigi. Pe sìsyaanw a ra fóo nyanbeleyi na.

⁴ Nyɛ̀ʔɛni ŋɔ́ripiigéle myɛ i nyangi, nyɛ̀ʔɛni i kùrú àmɛɛ sɛ́bɛmigio nyɛ lè. Li ŋɔripiigèle myɛ i fánagi ni kɔlɔ ni ŋuu àmɛɛ ɛrɛzɛn wára fánagi ni kɔlɔ ni ŋuu lè, ní àmɛɛ děsyaantiige wára fánagi ni kɔlɔ ni ŋuu lè.

⁵ Níì cán n mii ŋɔséew yaʔa nyɛ̀ʔɛni na, wi n gbaa n tín a wi yɛ́ɛgi i wóo. Wéle wi a tìgi bi too Edɔmi syɛ́ɛnbèle na, bele mii yaʔa lè péw kálagili kútii kánma na lè.

⁶ Yawe ŋɔséew n tín sìsyaanw na, sǐnmi n tára wi na. Bàpiigèle, ní sikepɔbèle sìsyaan, ní bàpɔbèle zǎloogēle sinmɛ i nyɛ wi na. Níì cán sáriga a wòlo Yawe ma Bosira ni. Kpóogbɔɔlɔ í wɔ́ɔ pye Edɔmi tári ni.

⁷ Senɛ́yi a pínɛ da tuun ní be ní, nǐyi í pínɛ da tuun ní náapegèle ní. Pe tári a sìsyaanw gbaa bi di yɛ́ɛgi wɔ́ɔ, pe támiigi a tín sǐnmi na.

⁸ Níì cán Yawe gɔ̀lɔ́-wòlori canʔa ki a pye, yɛ́ɛli bee na wi a Siyɔn nigoobèle sàra.

⁹ Edɔmi lòcooloyi a kàri kùro, wi támiigi a pye dìrigí. Wi tári a pye àmɛɛ kùro nyɛ, dee di sóori lè.

¹⁰ Ti a fígi í n yébiligi pínɛ cángi ni, ti wírigi a ra yìrigí bàngwɔɔ ni. Ti a kòro wogalagira ní yìrigèle myɛ syɛ̀ɛnnɛ ma, syɔɔn faala a ní foro di ni í ki kòro nya làla o làla kwɔ́ɔmɔ fun.

¹¹ Kpɔ̀ʔɔlɔgɔ ní kéremisyoolo a di pye be tɛɛkòrogo, zangbuloweʔe ní kàanriga a tɛ́ɛn di ni. Pe a tɛɛwaali mɛɛntímanana cáan di na, ní kálagili gûnzin-yáriga.

¹² Mɛ́ɛyɛ fɔɔlɔ a ní pye yaà bàā fànʔafɔlɔ nyɛ́nɛ da wóo í, di fànʔafɔbiigèle myɛ a ba kwɔ́ɔ.

¹³ Wúuro tiipiiye a fìin di kpaakpoloyi ni, wúuro ní solovinge a yìri di tɛɛniriyi ni. Ti a pye gbàáyi tɛɛkòrogo, ní sòʔolow tɛɛlaraga.

¹⁴ Gɔ̌nbèle ní kàsoloyi a yiyɛɛ vàra yaà, seʔe sikebèle a ra nyaan yaà bàā be pínɛnyɛnbèle yeri. Yébiligi fyáara yáriga a pye yaà sági bàā ŋɔ́ngi da daagi.

¹⁵ Nɛɛ bee wàbigi a gi tɛɛ̀sinɛgi sámaga bàā gi cárigèle cáan, bàā ge ciri, bàā gi pìíbèle kpóʔoro kiyɛɛ nyínmi ni. Beè kàcɔʔɔyi a ra yiyɛɛ gbóʔoro.

¹⁶ Ye caa, ye wéle Yawe sɛ́bɛw ni yáā wi wéle. Ki kàa nibin a fɔ̀n yaà í, ki kàa nibin a fɔ̀n gi pínɛnyɛnnɛ ni í. Níì cán Yawe nyɔ́ɔgi gi koro joo n gbàn. Wi Pǐli li a di kpóʔoro tiyɛɛ na.

¹⁷ Wi n gɔ̌nw wáa n kaan be ma, wi kɔ́gi gi tári tíla tíla be na ní mɛɛnnɛ ní, ti a kòro be worò làla o làla, pe a tɛ́ɛn di ni bàā syée yaà yìrigèle myɛ ni.