Ezayi 30 - Cebaara Bible 2010

Tánʔaganmee na Kolocɔlɔɔ tìgi lè

¹ Yawe n jo: «Wɔʔɔli a pye jaafɔsinloʔobèle na. Pe i kérigèle nyuu ni cɛnɛ, gele ge lè ke ga yìri mii ma í, ní i joogaangèle kpéʔele mii Pǐli kàdoʔo na, jàngó bàā kapeegèle taʔala keyɛɛ na.

² Pe i nyɛ tánʔani na ni syée Ezyipiti ma mii sìnyíbe ni, koro ga pye poro í sa tɛɛsyɔɔlɔ taa Faraɔnw fànʔa báriga ni, poro í sa làra Ezyipiti nyínmi ni.

³ Faraɔnw ga pye yele tɛɛlaragi, koro a ba pye yele fɛ̀ɛrɛ kéele, yele ga làra Ezyipiti nyínmi ni, koro a ba pye yele fûnnyaʔamira kéele.

⁴ Wi syɛɛnkpolobèle i nyɛ n kwɔ́ɔ Sowan ni, a wi tundunbèle nan Hanɛsi na.

⁵ Fɛ̀ɛrɛ a pe myɛ taa syɛɛnfelegaa kéele na, gee gi lè ki a pye be dɛ̀ɛmɛnɛ kéele í, wàlá bi be syɔɔ wàlá bi be dɛ̀ɛmɛ í, fwɔɔ ki a pye be fɛ̀ɛrɛ, ní be faʔara kéele.»

Bele be syée ni Ezyipiti ye dɛ̀ɛmɛni syoo lɔrɔ na lè

⁶ Joogbanna wòrogulo kàbangi yaweeye kéele na, yee yi táraa forogi lè, di lè kálagila, ní wɔʔɔgɔ wóro, beè càarajebèle ní càarabɔbèle yìrigí lè, ní wàmɔriyi, ní diragɔnbèle be yìrigí lè, pe i be lɔ́ri tugu jòfanibèle kàdoyo na ni syée, ni be lɔnɛʔɛri tugu fàlibaaya punuyo na ni syée n sa ni kaangi syɛɛnfelegaa ma, gee gi lè ki a pye be ma dɛ̀ɛmɛnɛ faala í.

⁷ Ezyipiti má be syée, woro wee dɛ̀ɛmɛnɛ li nyɛ lè gbanzan, ní kanyɔɔnɔ fun. Koro na mii wi yiri: Arahabi wi lè wi o nyɛ́ʔɛ í.

Sàmina, nyɛ̀ʔɛna kéeli na

⁸ Da maa tɔ́ɔliw ni mi ba kérigèle bee sɛ́bɛ pe nyɛnɛ̀ na kàlagolo na, mí ge sɛ́bɛ sɛ́bɛ ni, koro ga pye ge kòro beè nyɛ̀ʔɛnaw kéele na, làla o làla kwɔ́ɔmɔ fun.

⁹ Níì cán syɛɛnfele-niceʔe gii, pìijamabéle bɛɛ, pìíbèle pèle, bele be lè pe ga fɔ̀lɔ bàā Yawe làlwaw lúro í.

¹⁰ Pe i gi nyuu kanyaabèle ma níì jo: «Ye a kɔ́ ra nyaagi í.» Ni gi nyuu kanyaajoobèle ma níì jo: «Ye a kɔ́ ra kányɛɛgi nyaagi bàā nyuu wolo ma í. Yaa fáanaga syɛ́ɛnrɛ nyuu wolo ma, yaa námara yanyaayi kéele nyuu wolo ma!

¹¹ Ye wàli ye láʔa kólogi na, ye kolo ye yiri kobili ni, ye Isirayɛli Wojanw núngo nya wolo yɛ́ʔɛ ma!»

Tooli li lè tiinmɛ o li na í

¹² Koro na Isirayɛli Wojanw syɛ́ɛnri naa joo níì jo: «Amɛɛ yele syɛ́ɛnri bee cée lè, níì yeyɛɛ daʔa péemi, ní nɔ̀ʔɔrɔgi na, níì yeyɛɛ zígi dee bee na lè,

¹³ koro na kolomi bee a pye yele ma àmɛɛ fɛ̀ɛ gáà kúun tòdɔnɔgɔ na lè, ki n si too kelekele, tɔlɔgɔ nibin na.

¹⁴ Ki a jaa àmɛɛ be cóofaaɔn yakoʔo jee lè, ki a tɔ́nʔɔnɔ tɔʔɔlɔmɔ fun, àlí sísɛɛlɛ a kòro gi ni syɔɔn í da naà wóo ní li ní kpùmɔnʔɔnɔ ni í wàlá bàā lɔ̀ʔɔ kóori ní li ní lɔ̀ʔɔ wéʔe ni í.»

Ye pyèri ye tága mii na

¹⁵ Níì cán Kàfɔw Yawe wi lè Isirayɛli Wojanw, woro wi syɛ́ɛnri naa joo níì jo: «Yele ga lúru n pan níì yele sɔ̀ngumi télege, koro ni yele syɔɔli a taa, sɔ̀ngumi télegele, ní sɔ̀ngumi taʔala báriga ni yele fǎngi a taa, yele si ga fɔ̀lɔ í!

¹⁶ Yele n jo: ‹Eʔe, wolo a lúgu syɔɔnyɔ na bi fàn!› Awá, yaa fé. Yele n jo: ‹Wolo a lúgu syɔɔnyɔ na, yee yi cólogo lè!› Koro na bele pe a ra yele nɛnɛ lè pe a cólogo sɔ̀lɔ yele na.»

¹⁷ Syɛ̀ɛnnɛ saala kagunɔ a ra fé syɔɔn nibin joogbanna kéele na, yele a ra fé syɛ̀ɛnnɛ kagunɔ joogbanna kéele na, bi taa yele í ba kwɔ́ɔ bi kòro àmɛɛ tiinnɛ nyɛ lè nyanbelege ǹjoʔo ni, àmɛɛ dìrapo nyɛ lè dǎndamaga na.

Syɔɔli làla

¹⁸ Koro ní ki myɛ ní, Yawe i sigi koro ga pye bi kacànna pye yele na, kánmi bee na wi a yìri koro ga pye bi nyinimɛ taa yele na. Níì cán Yawe i nyɛ Kolocɔlɔɔ, wee wi sín lè, bele myɛ be peyɛɛ daʔa wi na lè, pe i nyɛ dùba pìibēle!

¹⁹ Siyɔn syɛɛnfelegi ki lè Zyerusalɛmi ni, mɔ a ní nyɛni í! Wi ga mɔ yerimi lóʔo lǎli ni lè, wi a kacànna pye mɔ na, lǎli ni wi ga bi lóʔo lè, wi a syɔɔ mɔ ma.

²⁰ Kàfɔw a búru kaan mɔ ma wɔʔɔgi làla ni, bi lɔ̀ʔɔ kaan mɔ ma fɔ̀rɔgi làla ni. Bele be mɔ tama lè, pe a ní làra mɔ na í, mɔ nyapiigèle a be nyaa, bele be mɔ tama lè.

²¹ Mɔ líiweegèle a syɛ́ɛnri naa lóʔo miyɛɛ kàdoʔo ma, ti jo: «Kólogi gi gee naa, yaa táanri gi ni!» A yele i syée kàliige ma yoo, wàlá kàmɔnɔ ma yoo.

²² Wálifiiw mɔ tɛ́ʔɛ n mɔ yasunyi pɔ̀li lè, ní tɛ́ɛw mɔ tɛ́ʔɛ n ǹdedanyi tɔ́n lè, mɔ a di córo yanɔnʔɔrɔ, mɔ a di wáa àmɛɛ yapeere nyɛ lè, si jo: «Ye yiri nɛɛ naa!»

²³ Lǎli bee ni wi a ra zěgi cáan lùguri na mɔ a le tári ni lè, lìíli tári a ra kaangi lè, li a pye ní báriga ní, sáā fànʔa kaangi. Cángi bee na, mɔ yaweeri a ra náari nyàánɛʔɛgɛ tɛ́ɛkpoloyo ni.

²⁴ Nǐyi ní jòfanibèle be fála lè, pe a ra sólomi yaliire líi, dee pe a ra fee ní yalele, ní ségbanna ní lè.

²⁵ Cángee na kpóogbɔɔli a kpéʔele lè, cángee na kpaataʔa-tɔ́nɔyi a too lè, cángi bee na lókoloyi ní lòfóozɔ̀lɔyi a pye nyanbe-nyundɔnɔyi, ní dǎndama-tɔ́nɔyi myɛ na.

²⁶ Cángee na Yawe ga ni wi syɛ́ɛnbèle kpàliya sámagi lè, ní i kpumɔnnamiyi poori, yee yi kúun be na lè, cángi bee na yégi gbɛ̀ɛnmɛ a pye àmɛɛ cángi wómɔ nyɛ lè, cángi gbɛ̀ɛnmɛ si kpɔ́ʔɔ ki tɛɛyɛ kɔrɔsiin, àmɛɛ canya kɔrɔsiin gbɛɛnmɛ nyɛ lè.

Yawe a ba Asirii ye kpúmɔn kàriga

²⁷ Wéle! Yawe mɛ́ɛgi i yìrigí tɛɛleelige ni. Wi fundanʔari káfugo n gbàn, joogbanna lii, lee li líbe lè. Wi nyɔɔwari n nyìn fundanʔagbɔɔri na, wi nyínni i nyɛ àmɛɛ naà nyɛ, gee gi sórigolo kpéʔele lè.

²⁸ Wi nyɔ́ɔgi káfalaga i nyɛ àmɛɛ lòcoologo nyɛ, gee gi nyìn n kabi lè, gee gi nyìn n nan syɔɔn yátiige na lè. Wi a ba syɛɛnfeleyi cɛlɛ ní kálagili tàmá ní, bi kàrafée le syɛɛnfeleyi nyɔ́ɔyɔ ni, wee wi a yi pùuni lè.

²⁹ Yele a ra ŋúu àmɛɛ be ŋúu séri canʔa yébilige ni lè, yele fúnyi í pye fundaanra na àmɛɛ wàa gáā táanri ni syée maana wiimɛ ni lè Yawe nyanbelegi ma, ni syée Isirayɛli Fálagi ma lè.

³⁰ Yawe si a wi fàngbɔɔgi yákpolo wáa, wi a wi kɔ́gi tɛ̀ɛn, gee ki a kpumɔnrɔ kpéʔele lè bi yɛlɛ ní wi fundanʔagbɔɔri ní, ní naanyìnge, gee ki a ra sórigolo kpéʔele lè, n fàra lònyínge, ní káfalakpɔʔɔ, ní zěsolo-kàdɛnɛrɛ na.

³¹ Lǎli bee ni Asirii bárigaw a kwɔ́ɔ Yawe yákpoli báriga ni, wi a wi kpúmɔn ní wi sàbinni ní.

³² Kàgbeenyɛ́nnɛ o kàgbeenyɛ́nnɛ li kɔ̀rirɔ n tímana wi kéeli na lè, gele Yawe a kpúmɔn wi na lè, tàmábèle ní kɔ̀ríbèle kpúmɔnmɔ a ra lúro ge ni. Yawe a wi kɔ́gi sánʔa bi tún ní wi ní.

³³ Nlaa yaà booma ni kàjegbɔnnɔ n sámaga n kwɔ́ɔ, li n sámaga fànʔafɔw kéele na, li taanigi n cùru níì kpɔ́ʔɔ, beè náagi nyín lè, ní kàjenɛʔɛrɛ ní. Yawe nyɔ́ɔgi káfalaga i gi náagi nii àmɛɛ dìrigí-nɛʔɛɔ nyɛ lè.