Ezayi 3 - Cebaara Bible 2010

Zyuda fǎngi nyáʔamina kéele

¹ Kányɛʔɛ na, wéle Kàfɔw Yawe wi lè Nyɛ̀ʔɛni Sùlasiibéle Kafɔlɔ, wi i dɛ̀ɛmɛgèle myɛ, ní tɛɛ̀telegegèle myɛ léeli Zyerusalɛmi, ní Zyuda ye na, gee bee n joo lìilee myɛ, ní lǒgee myɛ na pe da peyɛɛ daʔa lè,

² ní nànniriw, ní nǎnwee wi kapɛɛnni cán lè, ní kútiijoow, ní kanyaajoow, ní cɛ́lɛfɔw, ní wolɛɛw,

³ ní togoye siin ní kpɔrigɔ kùndigiw, ní mɛ́ʔɛfɔw, ní yarifɔw, ní fáliw kacaɔn, ní dɛ̀ɛ́mi kacangbɔɔɔ̀.

⁴ Mii a wojáribéle kaan be ma poro í pye be kùndigibèle, nìbyapiire a tɛ́ɛn be nyúngi na.

⁵ Ki a pye syɛ́ɛnbèle nínge ni, wee í da wɔʔɔli gbàngí wee na, ní syɔɔn ní wi tɛ́ɛnnyɛnnɛ níngi ni. Nìgɔcariɔ a ra tuun nànlɛɛɔ na, nifaalaga a ra tuun báriga syɔ́ɔn na.

⁶ Lǎli bee ni nàɔn a wi senyɛnnɛ̀ fíige láa tofɔw kpaʔa ni, si wi pye: «Burogbɔʔɔ i nyɛ mɔ ma, pye wolo kùndigiw! Tɛ́ɛn yakalagiri naa nyúngo na.»

⁷ Cángi bee na wee bee a yakpoli wáa bi gi joo si jo: «Mii o nyɛ lɔ̀ʔɔtɔrɔɔ í, yaliire, wàlá burogbɔʔɔ o nyɛ mii kpáagi ni í. Yele a kɔ́ mii télege syɛ́ɛnbèle kùndigi í!»

⁸ Kányɛʔɛ na, Zyerusalɛmi i kpírigi, Zyuda si i tuun, níì cán pe nyɔɔsyɛɛnri, ní be kapyegèle i nyɛ Yawe kánmi na, ni nànma kpéʔele wi kpɔ́ɔmi yɛ́ʔɛ ma.

⁹ Pe còrimi i séera kpéʔele be kánmi na, pe i be kapeeli jáari àmɛɛ Sodɔmi nyɛ lè, pe o yafyɛn làragí í. Wɔʔɔlɔ i nyɛ be na! Níì cán pe i be tiimaa bɔ̀nɔw sámagi ni yaari.

¹⁰ Ye gi joo yé jo: Syɛɛnsinw i nyɛ dùba pyà, níì cán pe a ba ra wi kapyegèle tɔ̀nɔ líi.

¹¹ Wɔʔɔlɔ i nyɛ syɛɛnpeew na! Kapeʔe a wi taa, níì cán gee wi kɔ́yi kpéʔele n yaʔa lè, koro ki a nan wi na.

¹² Bele be fǎngi gbàngí mii syɛ́ɛnbèle na lè, pe i nyɛ nìbyapiire, càbala be tɛ́ɛn be nyúngi na. Mii syɛ́ɛnbèle, yele yɛɛ̀kinibèle i yele pùuní, kólogee yele táanri lè, pe i gi kálagi.

Yɛɛ̀kinibèle kútii kéele

¹³ Yawe n sámaga n kwɔ́ɔ bi kútiiw joo, wi i nyɛ woyéreo ní bi kútiiw kúun syɛɛnfeleyi na.

¹⁴ Yawe i nyɛ kútii na ní wi syɛ́ɛnbèle wólɛɛbéle, ní be kùndigibèle ní, wi n jo: «Yele n ɛrɛzɛn ségi káa, foomɔfɔw kɔ́lɔ yárira i nyɛ yele kpáayi ni.

¹⁵ Nyàʔá na yele mii syɛ́ɛnbèle tánʔana, ní wɔ́ɔ i foomɔfɔbèle yɛ́ɛcɔɔgéle tɔ́nʔɔnɔ?» Kàfɔw Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

Zyerusalɛmi cecǎnbèle

¹⁶ Yawe n jo: «Amɛɛ Siyɔn calipiigèle keyɛɛ nyɛ́nɛ lè, níì nyùngbaabèle kpee ní i táanri, ke nyapiigèle si i syɔɔn lɛ́ɛlɛ, ke si i táanri yéw, yéw, ní i ge tɔ́lɔyi kajingéle tìngí,

¹⁷ Kàfɔw a Siyɔn calipiigèle nyúnyo folo, Yawe a ge fɛ̀ɛ́ri tɛ́ɛyɛ múgu yaʔa.»

¹⁸ Cángi bee na, Kàfɔw a fèreri wòlo, di lè tɔ́lɔyi kajingéle, ní nyǔnyi cɔ̀ɔbēle, ní yégi niwirige veʔebéle,

¹⁹ ní líiyi vèʔebēle, ní kɔ́yi kajingéle, ní nyùndɔn-fànibèle,

²⁰ ní nyùndɔnyi, ní tɔ́lɔyi nyɔ̀ʔɔdirigéle, ní sɛntiiribèle, ní làtiikɔlikpogèle, ní sákpegèle,

²¹ ní kɔ́yi vèʔebēle, ní fínaagèle vèʔebēle,

²² ní fɛ́tii cányi búroyo, ní burogboloyi, ní láganabèle, ní kpàbibèle,

²³ ní dùbalebèle, ní fànifɛɛlɛfɛɛlɛw, ní nyùnbwɔɔyi, ní nyùnbwɔɔ-kpóloyi.

²⁴ Lǎli bee ni yafɔnʔɔgɔ núngo a pye nùndaanna sìndɛʔɛ ni. Mɛɛnnɛ si pye sɛntiiri sìndɛʔɛ ni. Nyùnvologo si pye nyùndiinge sìndɛʔɛ ni, Gɔ̀nvaʔaga búrogo si pye burojàn-dèlege sìndɛʔɛ ni. Namisógugo si pye nìjanra sìndɛʔɛ ni.

Zyerusalɛmi lɔgucebèle kéele

²⁵ Ŋɔséew a ra mɔ nanbèle kúu da cáan, mɔ nanniribèle si kòro kapɛɛnni ni.

²⁶ Siyɔn kpàánweegèle a ra cɛ́ɛn si pye kùu káyaʔa na. Wi wowaaw a tɛ́ɛn tári na.