Ezayi 29 - Cebaara Bible 2010

Zyerusalɛmi wi nan bi kálagi lè cɛɛri na si ní syɔɔ

¹ Wɔʔɔli a pye Ariyɛli na, Ariyɛli! Kèkpɔɔgee ni Davidi tɛ́ɛn lè! Ki n yɛlɛ ye yɛɛlaa fàra yɛɛlaa na, ye fɛ́tiibèle yaʔa paa forogi pe làrigèle ni.

² Mii a Ariyɛli gbɛ̀dɛ. Sùpiiwáara, ní cɛ́ɛnmɛ a pye yaà. Kěgi a pye mii ma àmɛɛ fúru nyɛ lè.

³ Mii a tɛ́ɛn mɔ kánmi na bi mɔ màʔa, bi kapɛɛnkpumɔnbéle télege mɔ kánmi na bi mɔ sùlú le, bi yalúguyo yérige mɔ kánmi na.

⁴ Mɔ a tìrige táàma, mɔ syɛ́ɛnri a ra yìrigí tári ma, támiigi a mɔ jóomi cò. Mɔ yákpoli a ra yirigi tári ni, mɔ a jo màdeo wólo lii, támiigi ni mɔ a ra mɔ syɛ́ɛnri kabala da nyuu.

⁵ Mɔ nigoo-nɛʔɛmi a pye àmɛɛ támii-purɔgɔ nyɛ lè. Kagbanbye-syɛɛnnɛʔɛmi bee a pye àmɛɛ nyàā suweʔe nyɛ, gee gi yìrigí lè terire làrinijanna ni.

⁶ Nyɛ̀ʔɛni Sùlasiibéle Kafɔlɔ Yawe a ba mɔ wéle, koro a pye ní nyɛ̀ʔɛni tìnmɛ, ní tári cúngolo, ní kàfulogbɔʔɔ ní, n fàra káfalakpɔʔɔ, ní zěkpɔʔɔ, ní naanyìnge na, gee gi sórigolo kpéʔele lè.

⁷ Ki a pye àmɛɛ ŋúnɔgɔ, ní yébilige yanyaʔa nyɛ lè, syɛɛnfele-nɛʔɛyee má yi a ra kapɛɛnni kpúmɔn ní Ariyɛli ni lè, bele myɛ má pe a ra tuun ki ní gi tòniriyi na lè, si gi gbɛ̀dɛ.

⁸ Ki a pye àmɛɛ kateʔe gáà syɔɔn jáa lè, á wi ŋúnɔ n gi nyaa a woro i líi, kàjáa wi ga nyán, láagi n pye wowaʔa ní. Ní àmɛɛ lògbaʔa láa nyɛ syɔɔn na lè, á wi ŋúnɔ n gi nyaa a woro i gbo, wi ga nyán, wi n pye fànʔa fun, yákpoli mɛ̀ɛ́ waʔa. Kánmi bee na ki a pye syɛɛnfele-nɛʔɛyi myɛ ma, yee yi a ra kapɛɛnni kpúmɔn ní Siyɔn nyanbelegi ní lè.

Fúunri ní singbaadinri

⁹ Ki n yɛlɛ ye pye funwɔɔrɔ na, yé kòro joomɔ fun! Ye nyapiigèle tɔ́n, ye pye fúunbéle! Yele yɛ́ɛyi í da wóo, ki si a pye dùvɛɛn kéele í. Yele í da fági, ki si a pye singbànma kéele í.

¹⁰ Níì cán Yawe n ŋúnɔgbɔɔmɔ tìrige n tɔ́n yele na, wi n yele nyapiigèle tɔ́n, koro ge nyɛ kanyaajoobèle, wi n yele nyúnyi tɔ́n, yoro yi nyɛ kanyaabèle.

¹¹ Gee naa myɛ yanyaʔa i nyɛ yele ma àmɛɛ sɛ́bɛ syɛ́ɛnrɛ nyɛ lè, wee na be fɛ̀ɛ taʔa lè n wi tɔ́n, wee be kaan syɔɔnwaa ma, wee wi gbàn sɛ́bɛw wélele na lè níì wi pye: «Dee naa wéle!» A wi jo: «Mii fánʔa a taa í, níì cán pe n fɛ̀ɛ taʔa wi na n wi tɔ́n.»

¹² Wàlá àmɛɛ sɛ́bɛ nyɛ, wee be kaan sɛ́bɛnaa-sìnjaɔn ma lè níì wi pye: «Dee naa wéle!» A wi jo: «Mii ga gbàn sɛ́bɛ wélele na í.»

Funwɔɔ-kérigèle ga kwɔ́ɔ í

¹³ Kàfɔw n jo: «A syɛ́ɛnbèle naa nùuní mii na ní syɛɛnjóoro ní wii yagana, a be mii kpɔ̀ʔɔrɔ́ nyɔɔwara na wii yagana. Kàjáa be fúnyi n léeli mii na, mii yɛ́ɛgi fyáara di nyɛ be ma lè, ti i nyɛ syɔɔn ye kalɛɛgéle gele be tama n cò lè.

¹⁴ Koro na mii a taʔa fala bàā syɛ́ɛnbèle naa fúnyo wóo ní kakpoloyi, ní bìngaari kèlē ní, sícilibèle sícilimɛ a kwɔ́ɔ, pe kacánbèle cánna a sa làra.»

¹⁵ Wɔʔɔli a pye bele na pe làrá Yawe na lè jàngó bi be katimanani làriga. Pe i be kapyegèle kpéʔele yébilimi ni, ní i gi nyuu níì jo: «Wìí wi wolo nyaagi, ba wìí wi wolo cán?»

¹⁶ Yele n tɔ̀nɔ n labala! A cóofaanw yɛlɛ lé wi córo sèjira ní cóori ní? A yakpéʔelege yɛlɛ lé ki gi joo gi kpéʔelefɔw kéele na si jo: «Woro ban wi mii sámaga í?» A kòdoli yɛlɛ lé li gi joo li faanfɔw kéele na si jo: «Sícilimɛ o nyɛ wi ma í?»

¹⁷ Làla cɛɛri yagana ban li kòro Liban si kàri bi pye tiire séʔe ì, tíiri séʔe si córo kɔligɔ ì?

¹⁸ Cángi bee na dùnɔbèle a sɛ́bɛw syɛ́ɛnrɛ lóʔo. Fúunbèle nyapiigéle a ra nyaagi, pe syɔɔ wɔ́ɔmi, ní yébilimi ma.

¹⁹ Màabyebèle a kòro bàā fundaanra kpéʔele Yawe ni, bele be fɔ̀n n sɔ̀lɔ syɔɔn ye ni lè, poro a ra muguri Isirayɛli Wojanw ni.

²⁰ Níì cán kagbanbyeo a ní pye beè í, nɛ̀ɛnyɛnɛgɛfɔlɔ a ní nyaa í, bele myɛ pe da kòro ni kapeeyi kpéʔele lè, pe a kwɔ́ɔ yirige yaà,

²¹ poro bele pe da ni kolomɔ kaangi syɔɔn ma kútiiw na lè, ní i karinyanya nii kútiiceriw na kpàánweeli na lè, ní i syɛɛnsinw láari lè nyùngo fun ni.

²² Koro na, Yawe wi Abirahami nyúngi syɔɔ lè, wi i syɛ́ɛnri naa nyuu Zyakɔbi kpáagi wòolo ma níì jo: «Tɔ́ɔliw ni fɛ̀ɛrɛ a ní Zyakɔbi taa í, wi yɛɛcɔɔli a ní wáa kàri í.

²³ Níì cán wi pìíbèle ga mii kɔ́yi fáli nyaa peyɛɛ níngi ni lǎli ni lè, pe a mii mɛ́ɛgi kpéʔele yacanga, pe a Zyakɔbi Wojanw kpéʔele yacanga, pe a ra fɛ̀ɛgí Isirayɛli Kolocɔlɔw na.

²⁴ Bele pìigēle ke da ni kólogi yaari lè, pe a cánna taa, ní bele pe da ni syɛɛn-ŋúnuŋunuri nyuu lè pe a tamana taa.»