Ezayi 28 - Cebaara Bible 2010

Gàlagí káfalakpɔʔɔ Samarii kánmi na

¹ Wɔʔɔli a pye Efirayimi singbaadinbèle nɛ̀ɛnyɛnɛgɛ fanʔafɔ-nyùndɔnnɔ na, ní fyɛ́ɛnri na, dee di kúlɔlɔ lè, wi nìjanri fèrere kàʔa, ki lè singbaadinbèle jǐnlɔgɔ tácànra ǹjoʔo ni, ní bele dùvɛɛnw cáan lè.

² Nànnirio wéle, wee wi nyɛ lè séefɔlɔ, wee Yawe tun lè àmɛɛ zěsolomɔ nyɛ, bee bi pee lè, ní àmɛɛ gàlagí káfalakpɔʔɔ nyɛ lè, ní àmɛɛ zàʔá nyɛ, gee gi kabi ni jǐn lòcooloyo lɔ́ʔɔ ni lè. Wi n gi cáan tári na ní fundanʔara ní.

³ Pe a Efirayimi singbaadinbèle nɛ̀ɛnyɛnɛgɛ fanʔafɔ-nyùndɔnnɔ tánʔana ní tɔ́lɔyi ní.

⁴ Fyɛ́ɛnri di kúlɔlɔ lè ti lè wi nìjanri nìnbwɔɔrɔ, dee di lè jǐnlɔgi tátaanra ǹjoʔo ni, ti a pye àmɛɛ děsyaanselige nyɛ, gee ki gáà lɛɛ sáni ki làrijɔɔli í nan lè, ki ga tɛ́nɛ̀ jée wee kɔ́lɔ ni lè wi n fala ni gi líi.

⁵ Cángi bee na, Yawe wi lè Nyɛ̀ʔɛni Sùlasiibéle Kafɔlɔ, wi a pye nìjanra fànʔafɔ-nyùndɔnnɔ, ní jàracàɔn wi syɛ́ɛnbèle ma, bele be kòro lè.

⁶ Wi a pye sínni pìle, wee má wi nyɛ lè wodɛ́ɛɔn ní kútiiceri-koli na, ní fànʔa, bele má be nigoow nɛnɛ n sa ni nangi wi kpàánweegèle na lè.

Singbaadinbèle be peyɛɛ nyɛ́nɛ kanyaajoow na lè

⁷ Kàjáa poro wɔ́ɔ i dùvɛɛnw gbo ni fági, a singbǎnmi i be pùuní. Sáriga-wòloo ní kanyaajooo i fági singbǎnmi báriga ni, dùvɛɛnw n be cò, singbǎnmi i be pùuní. Pe yɛ́ɛyi i wóo n be yaʔa kanyaajoori na. Pe i curugu pe kajoo-mí-cerigèle ni.

⁸ Tàbalibèle myɛ n nyìn tùguri, ní yanɔnʔɔri na. Tɛɛcànna faala o yaà í.

⁹ «Wìí syɔ́ɔn Ezayiw bee caa bi tama cánni na? Wìí wi caa bi tama wi tamani kɔ́rɔ cánna na? Pìíbèle bele lé be láʔa lè terire yireŋɔriri na? Bele lé be yíremi yaʔa lè tɔ́ɔliw ni?

¹⁰ Kajoo-mí-taʔalaga o kajoo-mí-taʔalaga, kajoo-mí-taʔalaga o kajoo-mí-taʔalaga, tímanana o tímanana, tímanana o tímanana, cɛɛri nɛɛ naa, cɛɛri nɛɛ yáa.»

¹¹ Kányɛʔɛ na nyɔɔtɔʔɔrɔyɔ, ní táraa nikwɔɔ wòolo syɛ́ɛnrɛ ni Yawe a joo ní syɛ́ɛnbèle naa ní.

¹² Wi maa be pye: «Ŋɔ́ndaali wéle lee, wee wi fɔ̀rɔ lè ye wi yaʔa wi ŋɔ́n wi daa. Ŋɔ́ndaali wéle lee!» Kàjáa pe ga fɔ̀lɔ n lóʔo í.

¹³ Poro má Yawe syɛ́ɛnri a pye kajoo-mí-taʔalaga o kajoo-mí-taʔalaga, kajoo-mí-taʔalaga o kajoo-mí-taʔalaga, tímanana o tímanana, tímanana o tímanana, cɛɛri nɛɛ naa, cɛɛri nɛɛ yáa. Koro ga pye bi be yaʔa tánʔani na, pe tàra bi lúru kàdoʔo ma bi too tɔ́nʔɔnɔ. Karinyanga í be cò, pe be cò bi kpéʔele pulobèlē.

Jɛ̀ɛ́nni kàdɛnɛzelige

¹⁴ Gee bee na, yele nɛ̀ɛnyɛnɛgi fɔ̀ɔlɔ, ki n yɛlɛ ye Yawe syɛ́ɛnri lóʔo, yele bele ye tɛ́ɛn Zyerusalɛmi syɛ́ɛnbèle naa nyúngo na lè!

¹⁵ Yele i gi nyuu níì jo: «Wolo n joogaanna kpéʔele ní kùúw ní, wolo n joobɛɛlɛ kpéʔele ní kúbèle tɛɛkòrogo ní. Gàlagíw wɔʔɔgbɔʔɔ ga ni sɔ̀lɔ́ lǎli ni lè, ki a nan wolo na í, níì cán jànvaaw i nyɛ wolo tɛɛlaraga, námaraw n wolo tɔ́n.»

¹⁶ Gee bee na Kàfɔw Yawe syɛ́ɛnri naa joo níì jo: «Wéle, mii n kàdɛnɛgɛ le kàpɔɔn Siyɔn ni, kàdɛnɛgee gi sɛʔɛ n wéle lè, jɛ̀ɛ́nnɛ kadɛnɛgɛ, gee gi nyɛ lè lɔgbanra wóʔo, kàpɔɔnwee wi sámaga n yére lè, wee wi ga wiyɛɛ daʔa wee bee na lè, wee bee a ní foo bàā fé í.

¹⁷ Mii a kányɛɛgi pye yatimana-mɛ́ɛnnɛ, bi sínni pye gûnzin-yáriga. Jànvaaw tɛɛlaraga ni yele nyɛ lè, zěsolo-kunguruyo a ba gee bee fàari bi tìrige. Lònɛʔɛgɛ a ba yele námaraw yatɔngɔ wáa.

¹⁸ Joogaanni yele ní kùúw kpéʔele yeyɛɛ ma lè, li a kálagi, kéelee na yele ní kúbèle tɛɛkòrogo joobɛɛli kpéʔele lè, li a liyɛɛ daa í. Gàlagíw wɔʔɔgbɔʔɔ ga ni sɔ̀lɔ́ lǎli ni lè, ki a yele tánʔana bi sɔ̀lɔ.

¹⁹ Lǎlee faala ni ki ga sɔ̀lɔ lè ki a yele cò. Ki a ra sɔ̀lɔ́ nyɛ̀ʔɛ nyɔ́ɔ o nyɛ̀ʔɛ nyɔ́ɔ na, ní cángi, ní yébiligi ni. Ki tǐnmi lóʔolo yagana a pye fyáakpɔɔrɔ.»

²⁰ Yasinɛgi a kpere sɔ̀lɔ, syɔɔn a gbǎn wiyɛɛ zánʔa gi na í, làgogi yɛ́ʔɛ a cɛ́rɛ sɔ̀lɔ, syɔɔn a gbǎn wiyɛɛ dɔ́n ní gi ní í.

²¹ Yawe a tɔ̀nɔ́ yìri àmɛɛ ki da pye Perasimi nyanbelegi na lè, wi a ra figiri àmɛɛ ki da pye Gabaɔn jǐnlɔgi ni lè, bi wi kapyeli kpéʔele, lee li lè li da tàli ni kpéʔele í, bi wi fáliw kpéʔele, wi lè falinibɔɔn.

²² Tɔ́ɔliw ni, ki n yɛlɛ ye nɛ̀ɛnyɛnɛgi yaʔa koro ga pye yele yapwɔɔri a ní kɔ́ cɔ̀ɔn í. Níì cán tári myɛ kálagila kéele n tímana n kwɔ́ɔ. Mii n gee bee lóʔo Kàfɔw ma wi lè Nyɛ̀ʔɛni Sùlasiibéle Kafɔlɔ Yawe.

Tèfalaw sícilimɛ ní Kolocɔlɔɔ sícilimi kéele

²³ Ye líiyi cáan ye mii yákpoli lóʔo! Ye yákirii yaʔa ye mii syɛ́ɛnri lóʔo!

²⁴ Syɔ́ɔnwee wi fála lè bi lùguro lùgu, fálali yagana lé wi kòro ni kpéʔele? Wi tári lé wi yabala ni di kàboloyi jee ni tímana yagana?

²⁵ Wi ga di kàboloyi jabagi n di tímana n kwɔ́ɔ lǎli ni lè, wi o gáà nizyɛliw nyari yaà bi wɔ́ɔ kumɛnw wáa yaà ì? Si wɔ́ɔ bilew lùgu bi taani wiyɛɛ na, bi wɔ́ɔ orizyew wáa yaà, bi ní wɔ́ɔ bilekpolow lùgu kàgonyɔɔw na ì?

²⁶ Wi Kolocɔlɔw wi gáà kóloyi bee tɛ̀ɛn wi na, si wɔ́ɔ tamani bee kaan wi ma.

²⁷ Nizyɛli o sàngí ní yaliisàn-wòtoro ní í, wòtoro sàkogo o sɔ̀lɔ́ kumɛnw na í. Kàjáa pe i nizyɛli sàngí ní sàbinnɛ ní, ni kumɛn sàngí ní sàbinbile ní.

²⁸ Pe i bilew sàngí ní sàbinnɛ ní, làla o làla si ban pe kòro ni wi sàngí í, wòtorow ga fàn n sɔ̀lɔ n kwɔ́ɔ wi na ní syɔ́ɔnyi ní, wi o gáà tɔ́nʔɔnɔ í.

²⁹ Gee bee n wɔ́ɔ̀ taa Yawe ni, wi lè Nyɛ̀ʔɛni Sùlasiibéle Kafɔlɔ. Wi láliiw i nyɛ wojaɔn ní, wi sícilimi n nɛʔɛ.