Ezayi 27 - Cebaara Bible 2010

Sólomi lɔ̀ʔɔ yaweekpɔʔɔ jáala kéele

¹ Cángi bee na Yawe ŋɔséew wi gbàn lè níì tɔnɔ níì nìri, wi a woro tɛ́ʔɛ bi Levyatanw kpúmɔn, wàbigi gi fé lè, Levyatanw, wi lè námara wàbigi. Wi a yaweekpɔɔgi kpóo, ki nyɛ lè sólomi lɔ̀ʔɔ ni.

Yawe ní wi ɛrɛzɛn ségi

² Cángi bee na ye ɛrɛzɛn ségi ŋúnugo le, ki lè ɛrɛzɛn secangi wóʔo.

³ «Mii Yawe, mii wi nyɛ gi kpaàwelew, mii i gi fɔɔnri làla o làla. Mii i gi kpáaw wéle n yébiligi pínɛ cángi ni, jàngó pe a kɔ́ gi kálagi í.

⁴ Fundanʔara o nyɛ mii ni í. Kàjáa mii ga wúuro tiipiiye ní wúuro taa bi kapɛɛnni kpúmɔn ní di ní, mii a kári di kurugo, mii a ti myɛ pínɛ bi sórigo.

⁵ Fwɔɔ pe ga mii pye tɛɛlaraga, pe ga bɛ̀ɛlɛ caa mii ma, pe ga bɛ̀ɛlɛ kpéʔele ní mii ní.»

Isirayɛli kùsulugi syɔɔlɔ ní kěgi gi yaʔa lè

⁶ Lǎlee li maa lè, Zyakɔbi a nìnre wáa, Isirayɛli a wâburo yirige bi fyɛ́ɛnrɛ kpéʔele bi dulunyanw nyìn ní wi yasanri ní.

⁷ A Yawe be kpúmɔn lé n yɛlɛ ní gi ní àmɛɛ wi be kpúmɔnfɔbèle kpúmɔn lè? A wi be kpóo lé n yɛlɛ ní gi ní àmɛɛ wi be kpóofɔbèle kpóo lè?

⁸ Ní tímanama ní mɔ be kútii kéeli cɔɔnri. Wi n be nɛnɛ ní wi nyɔ́ɔgi káfalakpɔʔɔ ní, àmɛɛ canʔafolomɔ káfalagi nyɛ lè.

⁹ Kánmi bee na Zyakɔbi kolomi kùsulugo fáli a kpéʔele, wéle, koro ni wi kapeeli kùsuluzyɔɔrɔ a taa, Yawe a wi sáriga-wòlo-yafaangi kàdɛnɛyɛ pye àmɛɛ piremɛ kadɛnɛyɛ nyɛ, yee yi kàriga lè támiige. Wi Asyera gàángèle, ní wi cángi kpɔ̀ʔɔrɔlɔ gàángéle a ní yére í.

¹⁰ Níì cán kènirigi n baa pye ki nibin, tɛɛkòrogaa gii, gee be yaʔa lè a gi kòro wowaʔa ní àmɛɛ fìími tára nyɛ lè. Nɛɛ bee náapiigi káa, ní i sìnɛ́ yaà, ki kwɔ́ɔmi n baa pye ki n ni káganri kálagi.

¹¹ Káganbiiri ga waʔa lǎli ni lè, pe n di kabagi. Càbala n baa naà le di na. Sícilimɛ fun syɛ̀ɛnnɛ bɛɛ, koro na wee wi be faan lè, wi ga nyinimɛ taa be na í, wee wi be sámaga lè, wi ga nyɔɔ be na í.

Wovanbèle lúrubangbɔɔlɔ

¹² Cángi bee na Yawe a tíiyi nyàʔara bi séli cábigi nyɔ́ɔ na bi sa nan Ezyipiti lòcoologi na. Isirayɛli jáabèle, pe a yele jóo nibin nibin!

¹³ Cángi bee na pe a tòmaakpɔɔgi wìi, lǎli bee ni bele pe da pùuni lè Asirii tári ni, pe a lúru pan, ní bele pe da cariga lè Ezyipiti tári ni. Pe a ba ra tuun da cíbele Yawe yɛ́ʔɛ ma nyanbejǎngi na, ki lè Zyerusalɛmi ni.