Ezayi 26 - Cebaara Bible 2010

Kènirigi ní kèkpɔɔgi gi lè pe a gbǎn jée gi ni í

¹ Cángi bee na pe a ŋúnugi naa ŋùu Zyuda tári ni, si jo: «Kènirige i nyɛ wolo ma. Kolocɔlɔɔ a syɔɔli kaan wolo ma li pye ki gúnyi, ní gi tògboloyi.

² Ye kpàánweegèle múgu, koro ga pye syɛɛnfelegi gi sín lè, ní i gi syɛ́ɛnri forogi, koro í jée.

³ Syɔ́ɔnwee fúngo gi sámaga n yére lè, mɔ i yɛɛ̀nyingi wodelege kaangi wee bee ma, níì cán wi n wiyɛɛ daʔa mɔ na.

⁴ Ye yeyɛɛ daʔa Yawe na gi kòro nya làla o làla. Níì cán Yawe, Yawe wi nyɛ bàngwɔɔ Fálagi.

⁵ Bele pe da pye wodɛ́ɛnbéle ní ǹjoʔo ma tɛ́ɛyi ni lè wi n be ŋɔrigɔ n cáan, kěgee ki da pye ǹjoʔo ma lè, wi n gi tìrige táàma n nan tári na. Wi n gi tìrige fwɔɔ n cáan támiigi ni.

⁶ Pe n gi tánʔana ní tɔ́lɔyi ní, fɔ̀ngɔfɔbèle, ní fànʔa-fùnvɔbèle n be tɔ́lɔyi tɛ́ʔɛ n gi tánʔana.»

Làrizangèle nyɛ́ɛrigɛ kéele

⁷ Syɛɛnsinw kólogo gi nyɛ sínni, mɔ wee wi sín lè, mɔ i syɛɛnsinw kozɔ̀lɔgɔ sámagi.

⁸ Ee Yawe, wolo n wolo sɔ̀ngumi taʔa mɔ na, mɔ kútiiw kèlē kólogo ni. Mɔ mɛ́ɛgi, ní mɔ kéeli sɔ̀ngurɔ di nyɛ wolo kanidaanni.

⁹ Mii fúngi tɔ̀nɔ́ i mɔ kéeli sɔ̀ngí yébiligi làla ni, mii pǐli li wɔ́ɔ̄ nyɛ mii ni lè, li tɔ̀nɔ́ i mɔ caa, lǎli ni mɔ ga mɔ kútiiw kèlē tɛ̀ɛn tári na lè, dulunyanw syɛ̀ɛnnɛ n ni mɔ sínni tama.

¹⁰ Alí pe ga nyɔɔ syɛɛnpeeo na, wi a tée sínni tama í, n wi yaʔa sínni tára ni, wi n wiyɛɛ daʔa kakolobyeri na, wi o Yawe kpɔ́ɔmi córo í.

¹¹ Yawe, mɔ kɔ́gi n yìrige ǹjogi ni, pe si o gi nyaagi í. Amɛɛ mɔ syɛ́ɛnbèle kéele mɔ dɛ́nɛ n sɛ́ɛ lè, pe a koro nyaa, fɛ̀ɛrɛ si be taa. Kánmi bee na náagi a mɔ nigoobèle sórigo bi kwɔ́ɔ péw.

¹² Yawe, mɔ i yɛɛ̀nyinge kaangi wolo ma, níì cán gee myɛ wolo kpéʔele lè, mɔ wi gi forogi wolo ma.

¹³ Yawe, wolo Kolocɔlɔw, kàfɔbèle pèle nikwɔɔlɔ n tɛ́ɛn wolo nyúngi na, bele be lè pe o nyɛ mɔ í. Kàjáa mɔ nibin bárigaw ni wolo mɔ mɛ́ɛgi yiri.

¹⁴ Kúbèle a ní lúru pan í, woguubèle a ní nyán yìri í. Kánmi bee na mɔ jée gi ni, mɔ n be kálagi n kwɔ́ɔ níì be kéeli sɔ̀ngurɔ kwɔ́ɔ n yirige yaà.

¹⁵ Mɔ n kàa fàra syɛɛnfelegi na, ee Yawe! Mɔ n kàa fàra syɛɛnfelegi na n mɔ nijangbɔɔri tɛ̀ɛn. Mɔ n tári láʔagoloyo myɛ lúrugo kàdoʔo ma.

¹⁶ Yawe, n be yaʔa wɔʔɔgi ni, a be mɔ caa. Pe n be nyɛ́ɛrigi sánʔa n yaʔa mɔ na, lǎli ni mɔ be wɔʔɔ lè.

¹⁷ Amɛɛ fícɛnnɛfɔlɔ nyɛ, lǎli ni wi làrizeeli nan lè, lǎli ni fícɛnni wi yìrige a wi i nyaan li yáali báriga ni lè, ànbée wolo da pye yaà léelige mɔ yɛ́ʔɛ ma, ee Yawe.

¹⁸ Wolo n fícɛnnɛ taa, wolo n wɔʔɔ, a wolo ga baa see, a gi pye káfalaga yagana, wolo ga syɔɔlɔ kapyele faala kpéʔele tári ma í, wàlá n syɛ̀ɛnnɛ see dulunyanw ma í.

Kúbèle nyán-yirile ní kapeegèle kpúmɔnrɔ kéele

¹⁹ Ki n yɛlɛ mɔ kúbèle í lúru pye sìi na! Ki n yɛlɛ mii kúbèle í ní nyán yìri. Yele bele ye nyɛ wodɛ́ɛnbéle ní támiigi ni lè, ye nyán, yaa yákpogèle wáa fundaanri báriga ni. Níì cán mɔ kásagi i nyɛ gbɛ̀ɛnmɛ kásaga, tári a ní kúbèle lúrugo yirige naa.

²⁰ Yaa syée, mii syɛ́ɛnbèle, ye sa jée yele kpaafunyi ni, yé yi tɔ́n yeyɛɛ na. Ye làra ye làlaa cɛɛri kwɔ́ɔ, bi taa fundanʔagbɔɔri í ba sɔ̀lɔ.

²¹ Níì cán wéle, Yawe wi yirigi wee wi tɛɛkòrogi ni bi tári syɛ̀ɛnnɛ kpúmɔn be kolomi kéele na. Tári a sìsyaanw yirige bi tɛ̀ɛn, bele pe da kpóo lè, ti a ní be làriga í.