Ezayi 25 - Cebaara Bible 2010

Yawe wi nyɛ tágala syɛ́ɛnbèle tɛɛlaraga

¹ Yawe, mɔ wi nyɛ mii Kolocɔlɔw. Mɔ mii a ra kpɔ̀ʔɔrɔ́, mɔ mɛ́ɛgi mii a ra sòoló. Níì cán mɔ n bìngaara kele kpéʔele, gele mɔ da kɔ̀rirɔ n tímana yaà lè làridɔɔnnɔ ni, ge lè wodelegèle, ní kányɛɛgi wòʔolo.

² Níì cán mɔ n kèkpɔ́ɔgi kàriga kàdɛnɛgboʔo, mɔ n kèkpɔɔ-nìrigi kàriga gurubɛɛtooro, nibɔnbèle kpaakpɔʔɔ n kwɔ́ɔ n yiri kěgi ni, ki a ní faan nyáana í.

³ Koro na fànnɛʔɛgɛ syɛ́ɛnbèle i mɔ kpɔ́ʔɔgi, syɛɛnfele-tanʔayi kàʔa a ra fɛ̀ɛgí mɔ na.

⁴ Níì cán mɔ n pye fànʔa-fùnvɔw tɛɛlaraga, ní tɛɛlaraga foomɔfɔw ma wɔʔɔgi làla ni, ní yatɔngɔ zěkpɔɔgi kánma na, ní nyínmɛ káfugi kánma na. Níì cán syɛɛntanʔabèle ŋɔ́nmɔ i nyɛ àmɛɛ zàʔá nyɛ, gee gi gungo kpúmɔn lè,

⁵ ní i nyɛ àmɛɛ káfugo nyɛ táwaara na lè. Mɔ i nibɔnbèle kàfulogo cɛ́rɛgi, àmɛɛ fàfanʔa nyínmɛ káfugo fànʔa kwóo lè, ànbée si syɛɛntanʔabèle ŋùumɔ a kwɔ́ɔ.

Lìigbɔɔlɔ, syɛɛnfeleyi myɛ ma

⁶ Yawe wi lè Nyɛ̀ʔɛni Sùlasiibéle Kafɔlɔ, wi a sìnmɛ káara liigbɔɔlɔ sámaga syɛɛnfeleyi myɛ ma nyanbelegi naa na, dùvɛɛncàɔn lìigbɔɔlɔ, pìrenɛʔɛmɛ káara, ní dùvɛɛncàɔn, wee be sámaga n fyɛɛni lè.

⁷ Yatɔngi, ní làgogi gi nyɛ syɛɛnfeleyi myɛ na wodɔngɔ ni lè, wi a di láʔa nyanbelegi naa na.

⁸ Wi a kùúw kwɔ́ɔ, gi kòro nya làla o làla. Kàfɔw Yawe a nyatinmi kurugo bi láʔa yɛ́ɛyi myɛ na, wi a wi syɛ́ɛnbèle faʔara kwɔ́ɔ tári tɛ́ɛyɛ myɛ ni, níì cán Yawe wi jo nya.

Isirayɛli fundaanri ní Mowabi kálagili kéele

⁹ Cángi bee na pe a ra gi nyuu si jo: Wolo Kolocɔlɔw wi wee, woro na wolo wolo sɔ̀ngumi taʔa, woro si wi wolo syɔɔ. Woro wi nyɛ Yawe, wee na wolo wolo sɔ̀ngumi taʔa lè. Ki n yɛlɛ waa muguri, wáā fundaanra kpéʔele syɔɔli kéele na wi kaangi lè.

¹⁰ Níì cán Yawe kɔ́gi a taʔa nyanbelegi naa na. Pe si a Mowabi tánʔana yaà wi tɛ́ɛgi ni àmɛɛ be nyàásige tánʔana káboʔo na lè.

¹¹ N wi yaʔa yaà beè, wi a wi kɔ́yi yìrige àmɛɛ lònyáɔn gáà wi kɔ́yi sánʔa ni nyángi lè. Kàjáa Yawe a wi nɛ̀ɛnyɛnɛgi tìrige táàma, n fàra wi kɔ́yi kapyere na.

¹² Mɔ togboloyi yi tɔnɔ lè, wi a yi ŋɔrigɔ cáan, wi a yi waragi, si yi tìrige bi cáan fwɔɔ támiigi ni.