Ezayi 24 - Cebaara Bible 2010

Tápow kálagila

¹ Wéle, Yawe a tári kálagi, si di kàriga syɛ̀ɛnnɛ fun, wi a di wáa cíbele, si di syɛ́ɛnbèle cariga.

² Sáriga-wòloo a ba pye sèjira ní syɛɛnsanbèle ní, kàfɔlɔ ní wi falipyeo í pye sèjira, kàfɔjɔɔ ní wi falipye-pìcaa í pye sèjira, yapáraɔ ní yasyɔɔɔ í pye sèjira, fwɔɔleo ní fwɔɔkuuɔn í pye sèjira, fwɔ́ɔli tɔ̀nɔ syɔɔfɔlɔ ní fwɔ́ɔli tɔ̀nɔ kaanfɔlɔ í pye sèjira.

³ Tári a tɔ̀nɔ́ kálagi, pe a di fuguri péw. Níì cán Yawe wi syɛ́ɛnri bee joo.

⁴ Tári i nyɛ kùu káyaʔa na, ti n kálagi, dulunyanw n kálagi, wi i kwóo ni syée. Tári wóbèle bele be nyɛ tɛɛ̀tɛ́nɛ-gbóloyi ni lè, pe i be kwóo ni syée.

⁵ Tári n nɔ́nʔɔ di tɛ́ɛnfɔbèle báriga ni, níì cán pe n làlwaw kèlē kálagi, níì kajoogèle kàriga, níì bàngwɔɔ joogaanni sàa.

⁶ Koro na dángaw i tári líi, ti kolomi wɔʔɔgɔ i nyɛ di tɛ́ɛnfɔbèle na. Koro na tári tɛ́ɛnfɔɔlɔ sógi, syɛ̀ɛnnɛ cɛɛri yagana be kòro di ni.

⁷ Dùvɛɛnfɔnw i nyɛ kùu kayaʔa na, ɛrɛzɛn tíriri i fánagi. Bele myɛ pe da pye fundaanra na lè, pe i cɛ́ɛn.

⁸ Tàmábèle kɔ̀nʔɔrɔ mugurumɔ n kwɔ́ɔ, kɔ̀nʔɔri kàfulogo n kwɔ́ɔ, kɔ̀ríw mugurumɔ n kwɔ́ɔ.

⁹ Pe ní o dùvɛɛnw gbo ní i ŋúu í, singbǎnmi n soro pi gbaafɔbèle nyɔ́ɔyɔ na.

¹⁰ Kèwaagi n kàri gurubɛɛrɛ. Kpáayi myɛ n tɔ́n, wàa ní o jǐn yi ni í.

¹¹ Sùpiiwáara i lúro kàlari-kóloyi ni, níì cán dùvɛɛnw n fɔ̀n, fundaanri myɛ n kwɔ́ɔ n láʔa yaà, mugurumi n kwɔ́ɔ n yirige tári ni.

¹² Kálagili li kòro kěgi ni, kpàánweegèle n cáan n pye gurubɛɛtooro.

¹³ Ki a pye tári ni, syɛɛnfeleyi nínge ni móō lǎli ni be olivye tíige nyàʔara n kwɔ́ɔ lè, ní àmɛɛ ɛrɛzɛn séʔe nyɛ, gee ni be ɛrɛzɛn kɔ́rɔ caa lè ɛrɛzɛnw cɛnɛnɛ kadoʔo ma.

Fundaan-pàlara kéele

¹⁴ Kàjáa bele naa i be yákpogèle yìrigí, pe i fundaanra yákpogéle wáa. Pe i fundaanra yákpogéle wáa canʔajeemɛ ma Yawe kpɔ̀ʔɔrɔli kéele na.

¹⁵ Koro na yaa Yawe kpɔ́ʔɔgi canʔafolomɔ kabangi ma, yaa Yawe Isirayɛli ye Kolocɔlɔw mɛ́ʔɛ kpɔ́ʔɔgi sólomi lɔ̀ʔɔ nínge tátɛɛgéle ni.

¹⁶ Wolo i ŋúnuyo lúro yaà tári láʔala na, a yi jo: «Wozinw na kpɔ́ʔɔri yɛlɛ!» Kàjáa a mii jo: «Kagbanna n mii le! Kagbanna n mii le! Wɔʔɔlɔ i nyɛ mii na! Syɛɛnco-mí-kaanbèle i nyɛ be syɛɛnco-mí-kaanri na. Nyɔɔkuunro dii! Syɛɛnco-mí-kaanbèle i nyɛ be syɛɛnco-mí-kaanri na.»

¹⁷ Mɔ wee wi nyɛ lè wodɛ́ɛɔn ní tári ni, fyáara, ní weʔe, ní cɔ̀ɔ n cáan mɔ na!

¹⁸ Wee wi fé fyáari sùpiiwáara na lè, wi a too wéegi ni, ní wee wi yirigi wéegi ni lè, wi a cò cɔ̀ɔ́w na. Níì cán ǹjoʔo ma wéegèle n múgu, a tári kàpɔɔnbēle cúngo.

¹⁹ Tári i jee ni tɔ́nʔɔnɔ, tári i yabala ni láʔala tiyɛɛ na, tári n cúngo,

²⁰ tári i fági àmɛɛ singbaadiɔn fági lè, ti i fíigi ni máari àmɛɛ kpáala nyɛ lè. Ti kapeeli n líbe di na, ti a too, ti si a ní yìri í.

Fǎngi kwɔ́ɔmɔ ní Kolocɔlɔɔ fǎngi sélimɛ

²¹ Cángi bee na, Yawe a ǹjoʔo ma sùlasiibèle kpúmɔn yaà ǹjogi ni, si wɔ́ɔ tári fànʔafɔɔlɔ kpúmɔn naa tári na.

²² Pe a be kpóʔoro àmɛɛ kàsolebéle nyɛ bi le weʔe ni, pe a be le kàsow ni, canya saʔa ga baa kwɔ́ɔ, pe a be kpúmɔn.

²³ Yégi a círige, cángi a pye fɛ̀ɛrɛ wóʔo ní. Níì cán Nyɛ̀ʔɛni Sùlasiibéle Kafɔlɔ wi lè Yawe, woro a tɛ́ɛn fǎngi na Siyɔn nyanbelegi na, Zyerusalɛmi ni. Nìjanri a ra daragi wi wolɛɛbèle yɛ́ʔɛ ma.