Ezayi 23 - Cebaara Bible 2010

Fenisii tooli kéele

¹ Joogbanna Tiiri kéeli na. Tarisiisi bàtobèle, yaa nyaan yaa peele! Níì cán ki n jaa, kpaʔa ga níì kòro í! Tɛɛ̀jeele ní o yaà í! Kitiimi tári má gee bee yìri n baa tɛ̀ɛn be na.

² Lǒgi nínge tálɛɛlɛ woolo, ye yeyɛɛ bye boboobéle, yele Siidɔn jàgiwáabèle, yele bele tundunbéle pe da ni sólomi lɔ̀ʔɔ forogi ni máari lè ni yele kpéʔele yarigaa fɔ̀ɔlɔ.

³ Yaliire maa ni maa lòkpoloyi ni, ti lè Niili wóri, cábigi yaliilaara di pye be tɔ̀nɔw tɛɛtaala. Koro gi pye syɛɛnfeleyi jàgiwáa-tɛ́ʔɛ.

⁴ Fɛ̀ɛrɛ n yɛlɛ di mɔ taa Siidɔn! Níì cán sólomi lɔ̀ʔɔ n syɛ́ɛnri naa joo, sólomi lɔ̀ʔɔ tɛɛnirige, ki n jo: «Mii ga fícɛnnɛ yáama cán í, mii ga pyà see í, mii ga nìgɔcaribéle gbóo í, mii ga pìcaala nàʔa í.»

⁵ Ezyipiti ye ga Tiiri tooli kéele lóʔo lǎli ni lè, pe a cúngo ti lóʔoli báriga ni.

⁶ Ye jeli ye kári Tarisiisi ma. Yele lǒgi nínge tátɛɛlɛ woolo, yaa nyaan yaa peele.

⁷ Yele fundaanri kèkpɔʔɔ lé gi nyɛ gee naa, gee sélimɛ bi pye yaà lè booma ni, gee tɔ́lɔyɔ yi da ni gi tórogi lè léelige n sa ni télegi yaà?

⁸ Wìí wi kéeli bee kɔ̀rirɔ n tímana Tiiri kánmi na wi da ni fànʔafɔ-nyùndɔngèle kaangi lè, woro wee céparabéle be pye lè fànʔafɔbiigéle, woro wee jàgiwáabéle mɛ́ɛtanʔa pe da ni yiri lè tári myɛ ni?

⁹ Yawe wi lè Nyɛ̀ʔɛni Sùlasiibéle Kafɔlɔ, woro wi kéeli bee kɔ̀rirɔ n tímana bi nɛ̀ɛnyɛnɛgi yárira myɛ nìjanra cɛ́rɛ, bi tári syɛɛnkpolobéle myɛ tìrige táàma.

¹⁰ Mɔ tári foro àmɛɛ Niili nyɛ lè, Tarisiisi calipili, zúu ní o yaà í!

¹¹ Yawe n wi kɔ́gi sánʔa sólomi lɔ̀ʔɔ ǹjoʔo ni. Wi n fǎnyi cúngo. Wi n gi joo n gbàn Kanaan ma níì jo wi wi tɛɛniriyi kálagi.

¹² Wi n jo: «Siidɔn nàngeele sinján calipili, mɔ wee be kálagi lè, mɔ a ní kɔ́ miyɛɛ yaʔa fundaanri pyele na í! Yìri, sɔ̀lɔ maa syée Kitiimi tári ma! Alí mɔ a sa ŋɔ́ndaala taa yaà í.»

¹³ Kalide ye tári wéle, pe lè pe da pye syɛɛnfelege í. Asirii ye maa be pye fìími tára woolo. Pe n kɔ̀rɔsiifɔɔlɔ kpaataʔa-tɔ́nɔyɔ faan n yérige. Pe n Tiiri kpaakpoloyi ŋɔrigɔ n cáan, pe n yi pye gurubɛɛtooro.

¹⁴ Tarisiisi bàtobèle, yaa nyaan yaa peele! Níì cán yele kènirigi n kálagi.

¹⁵ Cángi bee na syɛ́ɛnbèle a fɛ̀ʔɛ Tiiri kéeli na bi taa yɛ̀ʔɛlɛ togoye taanri ní kpɔrigɔ, bi yɛlɛ ní fànʔafɔlɔ canya kánma ní. Yɛ́ɛgèle togoye taanri ní kpɔrigɔ ga kwɔ́ɔ, Tiiri kéeli a pye àmɛɛ ŋúnugi gi nyuu nànjaacew kéele na lè níì jo:

¹⁶ «Nànjaacɔɔ̀, mɔ wee na be fɛ̀ʔɛ lè, kɔ̀rí láa mi kěgi nyaari mi kpàra! Da wi sámagi maa kpúmɔn, máā kàa fàrá mɔ ŋúnuyi na koro ga pye pe ní sɔ̀ngí taa mɔ na.»

¹⁷ Yɛ̀ʔɛlɛ togoye taanri ga kwɔ́ɔ, Yawe a pan Tiiri ma, Tiiri a ní séli bàā wi sàranɔnʔɔw lée. Wi a ra nànjaari kpéʔele ní dulunyanw fànya myɛ ní, yi lè tári na.

¹⁸ Kàjáa wi yataagi, ní wi sàranɔnʔɔw a yaʔa kɔlɔ̀ na Yawe ma, ti a kpóʔoro tiyɛɛ na í wàlá bi kɔn í. Níì cán wi yataari a pye bele wóro, bele be tɛ̀ɛ́n Yawe yɛ́ʔɛ ma lè koro ga pye pe yaliire taa bàā líi ra tíngi, sáā burojànya taagi.