Ezayi 22 - Cebaara Bible 2010

Sàmina Zyerusalɛmi ma

¹ Joogbanna Jǐnlɔgi yanyaʔa kéele na. Nyàʔá na mɔ lúgu ní mɔ syɛ́ɛnbèle myɛ ní bindàágèle na,

² kàfulogo kaʔa, mɔ wee wi nyìn yákpowáari na lè, ní i nyɛ fundaanra kèkpɔʔɔ? Mɔ woguubèle ga kpóo ní ŋɔsée ní í, mɔ woguubèle ga kùu kapɛɛnnɛ ni í.

³ Mɔ sulasiikpolobèle myɛ n pínɛ ni fé, sedeyi fɔ̀ɔlɔ n be cò n pye kàsolebéle, mɔ korofɔbèle myɛ n pínɛ n cò n kpéʔele kàsolebéle bi gi taa pe maa fàn n léeli.

⁴ Koro na mii jo: «Ye nyapiigèle yirige mii ni, ye gi yaʔa mii funbɛɛnrɛtɔw í da nyaan, ye a kɔ́ ra ŋàʔaná bi mii kpɛʔɛlɛ mii syɛ́ɛnbèle calipile wɔʔɔgɔ kéele na í.»

⁵ Níì cán funjurugoro, ní tɔ́nʔɔnɔnɔ, ní funwɔɔrɔ canʔa gii, gee Kàfɔw tórigo naa lè, woro wee wi lè Nyɛ̀ʔɛni Sùlasiibéle Kafɔlɔ Yawe, tǒw i kpúmɔn ni cáan yanyaagi jǐnlɔgɔ ni, pe i yákpolo wáa nyanbelegi ma ni syɔɔlɔ caa.

⁶ Elami n segbogi láa, kapɛɛnkpumɔnbéle i nyɛ wòtorobéle ni, syɔɔnyɔ fɔ̀ɔlɔ i maa. Kiiri n tunmɔzige-yárigi múgu n yaʔa.

⁷ Mɔ jinlɔcàndeleyi n nyìn wòtorobéle na, á syɔ́ɔnyi fɔ̀ɔlɔ taani kapɛɛnni kánma na, kpàánweeli na.

⁸ Zyuda yatɔngi n láʔa. Mɔ n nyapiigèle kàriga cángi bee na ni wéle kapɛɛnkpumɔn-yáriri kàbaan na Kɔligi Kpaʔa ni.

⁹ Yele n Davidi kěgi tò tɛɛ̀fúrugu-nɛʔɛyɛ nyaa, yele n lɔ̀ʔɔ sùlu n yaʔa táàma lǒgi wéʔe ni.

¹⁰ Yele n Zyerusalɛmi kpáayi córo, yele i kpáayi jee jàngó bi tǒw fànʔa kpɔ́ʔɔ.

¹¹ Yele n lɔ̀ʔɔ wéʔe túgu gúnyi siin lariga ni, koro ga pye bi weelɛɛgi lɔ̀ʔɔ lége yaà. Kàjáa yele ga gi sélifɔw córo í, wàlá n wi nyaa, wee wi koro kpéʔele lè yaà cândɔnɔgɔ na í.

¹² Kàfɔw wi lè Nyɛ̀ʔɛni Sùlasiibéle Kafɔlɔ Yawe, wi maa ni yele yiri cángi bee na níì jo yele í da nyaan bàā peele, si yele nyúnyi kùnu, si gɔ̀nvaʔaya tɛ́ʔɛ bi yeyɛɛ bwɔɔ sárigèle ni.

¹³ Kàjáa wéle mugurumi, ní fundaanri di yaà! Pe i yaweekpologèle kúu, pe i yaweeyiligèle kɔnɔgi, pe i káa, ní i dùvɛɛnw gbo, níì jo: «Waa líi wáā gbo, níì cán nyɛ̀ʔɛna wo a kùu.»

¹⁴ Nyɛ̀ʔɛni Sùlasiibéle Kafɔlɔ Yawe n gi tɛ̀ɛn mii na níì jo: «Kapeeli naa kùsulugo fáli a tée kpéʔele yele ma sáni yele í kùu lè í.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

Kakarigaw Syebina a bɔ̀nɔ wi fáliw ni

¹⁵ Kàfɔw Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Kári falipyew bee Syebina ma, wi lè fànʔafɔ-gbaagi kùndigi, mi sa wi pye:

¹⁶ ‹Mɔ nyaʔá gi nyɛ nɛɛ naa, ba wìí yòdaʔaga mɔ nyɛ, mɔ si i nyanga túru nɛɛ naa? Syɔɔn i nyanga túru wiyɛɛ ma dǎndamagi na, syɔɔn i tɛɛkòrogo túru wiyɛɛ ma fálagi na.

¹⁷ Wéle, mɔ mɔ nyaa lè, Yawe a tɔ̀nɔ́ mɔ wáa ní fànʔa ní, wi a mɔ sámaga mígi bi wáa.

¹⁸ Wi a mɔ sámaga kòlogo àmɛɛ bàló nyɛ lè bi wáa tásaliga na, gee gi kpɔ́ʔɔ lè: Mɔ a kùu yaà beè. Nɛɛ bee mɔ wotorocǎnyi a pye, mɔ wee wi nyɛ lè mɔ kafɔw kpaʔa faʔara yáriga!

¹⁹ Mii a mɔ nɛnɛ yìrige mɔ fáliw na, mii a mɔ kíle láʔa yaà mɔ tɛ́ɛgi na.

²⁰ Cángi bee na mii a mii falipyew Eliyakimi yeri, wi lè Hilikiya jáaw.

²¹ Mii a mɔ burodɔnɔgi le wi na, si wi pwɔɔ ní mɔ fanikologi ní sárigèle ni, mii a mɔ kundigiri le wi kɔ́yi ni. Wi a pye Zyerusalɛmi ye, ní Zyuda kpáagi wòolo tóo.

²² Mii a Davidi kpáagi làkile taʔa wi fókaannyungi na, wi ga kpaaweeli múgu, syɔɔn faala a gbǎn li tɔ́n í. Wi ga li tɔ́n, syɔɔn faala a gbǎn li múgu í.

²³ Mii a wi kóri lége àmɛɛ cèferile nyɛ tɛɛnirige ni lè. Wi a pye nìjanra-fàngolo wi tóow kpaʔa wòolo ma.

²⁴ Pe a wi tóow kpaʔa nìjanra myɛ cɔ̀rɔ wi na, ti lè wi kágangboloyi, ní yoro taʔara wóyi, ní yalebiigèle myɛ, n séli yagbaagèle na n sáà nan yakooyi na.› »

²⁵ Yawe wi lè Nyɛ̀ʔɛni Sùlasiibéle Kafɔlɔ wi n jo: «Cángi bee na, cèferili li kóri tɛɛnirigi ni lè, li a kɔ́n, li a ceri yirige yaà, túgoree myɛ ti da cɔ̀rɔ li na lè, ti a kálagi.» Níì cán Yawe wi jo nya.