Ezayi 21 - Cebaara Bible 2010

Babilɔni tooli kéele

¹ Joogbanna, sólomi lɔ̀ʔɔ fìimɛ tára kéele na. Amɛɛ káfalakpoloyi wòrogulo kàbangi forogi lè, yi i yìrigí fìími tára ma, ti lè fyáakpɔɔri tára.

² Yawelebeʔe n tɛ̀ɛn mii na, syɛɛnco-mí-kaanw i syɔɔn jànváa gàlagipyew i gàlagíw kpéʔele. Ye lúgu yaa syée Elami ye! Ye tɛ́ɛn kěgi taana kapɛɛnni kánma na, Mɛdi ye! Mii a cɛ́ɛnmi myɛ kwɔ́ɔ.

³ Koro na mii sárigèle i mii yáa gbanʔama. Yayaaya i mii có, àmɛɛ fícɛnnɛ cɔlɔɔ yáa, wee wi a see lè. Gee mii lúro lè, ki i mii fúngi nyáʔami. Gee mii nyaagi lè, ki i fyáakpɔɔrɔ wáa mii na.

⁴ Mii fúngi n curugo, fyáakpɔɔri n fànʔa taa mii na. Yébiligi mii da ni yèʔeri lè Kolocɔlɔɔ n gi kàriga mii ma fyáakpɔɔrɔ yébilige.

⁵ Pe n lìíli tɛ́ʔɛ n kwɔ́ɔ, kpaàwelew i kɔ̀rɔsíi. Pe i líi, pe i gbo. Fànʔafɔbiigèle, ye yìri ye yére! Ye tunmɔzige-yárigi tíre ní sìnmɛ ní!

⁶ Níì cán kánmi naa na Kàfɔw gi joo mii ma níì jo: «Da syée, sa kɔ̀rɔsiifɔlɔ télege, gee wi ga nyaa lè, fwɔɔ wi gi joo.

⁷ Wi ga syɔɔnyɔ nyaa siin-ziin yiyɛɛ daana, syɔɔnfànbēle nibin nibin si i nyɛ yi na, ní bele be tɛ́ɛn jòfanibēle na lè, ní bele be lúgu fàlibaaya na lè, ki n yɛlɛ wi wi líiyi cáan, wáā kɔ̀rɔsíi gbanʔama.»

⁸ A kpaàwelew yákpoli wáa níì jo: «Kàfɔw, mii i nyɛ mii kpaàwele-tɛ́ɛgi kpaataʔaga na canbogi myɛ ni, mii i nyɛ mii tɛɛ̀yéreli ni yébiliyi myɛ ni.

⁹ Wéle, syɔɔnyɔ yi maa yee siin-ziin, syɔɔnfànbēle nibin nibin si i nyɛ yi na peyɛɛ daana!» A kpaàwelew níì gi joo níì jo: «Ki n too, ki n too, Babilɔni n too, gi kolocɔlɔbèle niwiriye myɛ n cɛnɛ n cáan tári na.»

¹⁰ Ee mii syɛ́ɛnbèle, yele bele be sàn àmɛɛ yaliipyá nyɛ mii kàsyɔɔgi na lè, gee mii lóʔo Nyɛ̀ʔɛni Sùlasiibéle Kafɔlɔ Yawe ma lè, wi lè Isirayɛli ye Kolocɔlɔw, mii n gi joo yele ma.

Sán yébiligi nan?

¹¹ Joogbanna Duma kéeli na. Pe i yákpoli wáa Seyiiri ni, ni mii yeri, níì jo: «Kpaàwelew, sán yébiligi nan? Kpaàwelew sán yébiligi nan?»

¹² A kpaàwelew jo: «Nyíngi nyɔ́ɔ i maa, a yébiligi wɔ́ɔ i maa. Yele ga ni caa bi yíbege kpéʔele, ye yíbege kpéʔele. Ki n yɛlɛ ye kàri, yaa maa.»

Dedan ní Kedaari wovan-mí-syɔɔbèle

¹³ Joogbanna Arabii kéeli na. Yele Dedan ye kùsɛɛbèle taaniya, yele a syɔ́ɔn Arabii sìnbirigi ni.

¹⁴ Ye ba lɔ̀ʔɔ kaan be ma, bele na lògbaalaagi nyɛ lè. Yele Tema tári syɛ̀ɛnnɛ, ye wovan-mí-syɔɔbèle fàra ní yaliire ní.

¹⁵ Níì cán ŋɔséebèle na be fé, ŋɔséew na wi yiri n kwɔ́ɔ kpàfogi ni lè, ní sedegi na be kíle n kwɔ́ɔ lè, ní kapɛɛnni wɔʔɔyɔ na.

¹⁶ Níì cán Kàfɔw n syɛ́ɛnri naa joo mii ma níì jo: «Yɛɛlɛ nibin ga níì kwɔ́ɔ, àmɛɛ sàra-na-falipyeo yɛ̀ʔɛlɛ nyɛ lè, Kedaari nìjanri myɛ a kwɔ́ɔ.

¹⁷ Sedeŋɔɔ-sànbalibèle be lè Kedaari yòdaʔayi wòolo, poro a ní kòro saʔa í, fwɔɔ cɛɛri.» Níì cán Yawe wi lè Isirayɛli ye Kolocɔlɔw, woro wi gi joo.