Ezayi 20 - Cebaara Bible 2010

Ezayi i nyaari ni máari cepyá ní taʔalaya fun

¹ Yɛ́ɛlee na Asirii fànʔafɔw Sarigɔn sùlasiibèle kàfɔgbɔɔɔ tun lè Asidɔdi kánmi na, a wi sáà nan gi na n kapɛɛnni kpúmɔn ní gi ní, n gi syɔɔ n taa lè,

² lǎli bee ni Yawe maa gi joo Amɔsi jáaw Ezayi ma níì jo: «Da syée, gɔ̀nvaʔagi sánʔa mɔ sárigèle ni, mí mɔ táʔalayi wòlo mɔ tɔ́lɔyi na.» A wi gi kpéʔele kánmi bee na, ní i nyaari cepyá, ní taʔalaya fun.

³ Yawe n jo: «Kánmee na mii falipyew Ezayi nyaari lè cepyá, ní taʔalaya fun, koro a pye yɛ̀ʔɛlɛ taanri fúngo ni, bi pye fɛ̀ɛ ní bìngaara Ezyipiti, ní Etyopii kéeli na,

⁴ kánmi bee na Asirii fànʔafɔw a pèle koli Ezyipiti ye ni, si wɔ́ɔ pèle cò Etyopii ye ni bi kári, gee bee n jo wojáribèle, ní wolɛɛbèle. Pe a kári cepyá, ní taʔalaya fun, ní níjeegèle ní womúgu-yaʔagéle ní, koro a fɛ̀ɛrɛ wáa Ezyipiti ye na!

⁵ Kánmi bee na fyáara ní fɛ̀ɛrɛ a be taa Etyopii kéeli na wi lè pe sɔ̀ngumi tɛɛtaʔaga, ní Ezyipiti kéeli na, wee ní pe peyɛɛ gbɔ́ʔɔgi lè.

⁶ Bele be nyɛ lè wodɛ́ɛnbéle ní lógbew naa na, poro a gi joo cángi bee na si jo: ‹Wéle, wee naa wi da tɔ̀nɔ n pye wolo sɔ̀ngumi tɛɛtaʔaga, ní wolo tɛɛlaragi jàngó bi wolo dɛ̀ɛmɛ, bi wolo syɔɔ Asirii fànʔafɔw ma! Mɛ̀ɛ́ si wolo a gbǎn syɔɔ bi sɛɛ?› »