Ezayi 2 - Cebaara Bible 2010

¹ Amɔsi jáaw Ezayi yanyaagi, Zyuda, ní Zyerusalɛmi kéeli na.

Syɛɛnfeleyi myɛ panna kéele Zyerusalɛmi ma

² Canzanyi ni, Yawe kpɔ̀ʔɔrɔli kpaʔa nyanbelege a ba pye nyanbeleyee ǹjoyo ni, ki a ba yìri bi pye dǎndamayi nyúnyo ni, syɛɛnfeleyi myɛ a kabi da syée yaà.

³ Syɛɛnfele-nɛʔɛyɛ a ra syée yaà, sáā gi nyuu si jo: «Yaa maa wo lúgu wo kári Yawe nyanbelegi ma, Zyakɔbi Kolocɔlɔw kpaʔa ma, koro ga pye wi sa wolo tama wi kóloyi na, wolo sáā táanri wi kobiigèle ni.» Níì cán Siyɔn má làlwaw a yìri, Zyerusalɛmi má Yawe syɛ́ɛnri a yìri.

⁴ Wi a pye kútiijooo syɛɛnfeleyi nínge ni, bàā syɛɛnfele-nɛʔɛyɛ kele cɛnɛ. Pe a be ŋɔséebèle kpúmɔn bi kàriga nìteye, bi be tàbaabèle kàriga kátangèlē. Syɛɛnfelegaa a ní ŋɔsée yìrige kàa kánma na í, wàa a ní da kapɛɛnnɛ tama í.

⁵ Yele Zyakɔbi kpáagi wòolo, yaa maa wo ba ra táanri Yawe gbɛ̀ɛ́nmi na!

Yawe cángi gi lè kútiiw canʔa

⁶ Mɔ n tɔ̀nɔ n mɔ syɛ́ɛnbèle yaʔa, pe lè Zyakɔbi kpáagi wòolo, níì cán pe n nyìn canʔafolomɔ wóbèle kalɛɛgéle na, ní cɛ́lɛfɔbèle na àmɛɛ Filisitini ye nyɛ lè, á pe wɔ́ɔ̀ bɛ̀ɛ ní táraa nikwɔɔ wòolo ní.

⁷ Pe tári n nyìn wálifiiw ní tɛ́ɛw na, kwɔ́ɔmɔ o nyɛ pe lɔ́ri na í, pe tári n nyìn syɔ́ɔnyi na, kwɔ́ɔmɔ o nyɛ be wòtorobèle na í.

⁸ Pe tári n nyìn yasunyi na. Pe i tíri ni tuun be kɔ́yi yakpéʔelere yɛ́ʔɛ ma, pe kabegèle fáli yɛ́ʔɛ ma.

⁹ Wee wi lè syɔɔn, wi n kùru, syɔɔn n tìrige táàma, mɔ a kɔ́ be kùsulugi syɔɔ í!

¹⁰ Jée fálaweeyi ni, mí làra támiigi ni Yawe fyáakpɔɔri, ní wi kpɔ́ɔmi nìjaanra darigala na.

¹¹ Syɔɔn nɛ̀ɛgbɔʔɔgi wélege nyúngo a ba jùngu, syɛ́ɛnbèle nɛ̀ɛnyɛnɛgɛ si faʔa. Yawe nibin pe a ba ra kpɔ́ʔɔgi cángi bee.

¹² Níì cán Yawe wi lè Nyɛ̀ʔɛni Sùlasiibéle Kafɔlɔ, wi n canʔa tɛ́ʔɛ nɛ̀ɛnyɛnɛgi fɔ̀ɔlɔ myɛ, ní kpɔ́ɔmi fɔ̀ɔlɔ myɛ kánma na, ní yariga o yariga kánmi na ki kiyɛɛ yìrigí ǹjoʔo ma lè, ki si a ba tìrige táàma.

¹³ Ní Liban sɛdiri tíiri myɛ kánma na di tɔnɔ lè n yìri ǹjoʔo ma, ní Basyan syɛni tíiri myɛ kánma na,

¹⁴ ní nyanbe-nyundɔnɔyi myɛ, ní dǎndama-tɔ́nɔyi myɛ kánma na.

¹⁵ Ní kpaataʔa-tɔ́nɔyi myɛ, ní tòniriyi myɛ kánma na.

¹⁶ Ní Tarisiisi kɔ́rɔbèle myɛ, ní bàtocàn-dèlebèle myɛ kánma na.

¹⁷ Syɔɔn nɛ̀ɛgbɔʔɔgi a ba faʔa. Syɛ́ɛnbèle nɛ̀ɛnyɛnɛgɛ a ba tìrige táàma. Yawe nibin pe a ra kpɔ́ʔɔgi cángi bee.

¹⁸ Yasunyi myɛ a ba kwɔ́ɔ láʔa yaà.

¹⁹ Lǎli ni Yawe ga yìri bi tári cúngo lè, syɛ́ɛnbèle a ra jǐn fálaweeyi, ní tári wéeye ni bi léeli Yawe fyáakpɔɔri, ní wi kpɔ́ɔmi nìjanra darigala na.

²⁰ Cángi bee na yasunyee syɔɔn sámaga ní wálifiiw, ní tɛ́ɛw ní, ní i tíri ni tuun yi yɛʔɛ̀ ma lè, wi a yee bee wáa tǔbèle, ní kɔɔnɔyi ma.

²¹ Lǎli ni Yawe ga yìri bi tári cúngo lè, syɛ́ɛnbèle a ra jǐn fála-yabalayi, ní fálaweeyi ni bi léeli Yawe fyáakpɔɔri, ní wi kpɔ́ɔmi nìjanra darigala na.

²² Ye láʔa yele sɔ̀ngumi taʔala na syɔɔn na, woro wee fínaagéle ni ŋɔ́ngara nyɛ lè yagana, níì cán nyàʔá wi a gbǎn nyɔɔ?