Ezayi 19 - Cebaara Bible 2010

Ezyipiti ye curugoli kéele

¹ Joogbanna, Ezyipiti kánmi na. Wéle, Yawe n lúgu fàfaan-cólogogo na ni maa Ezyipiti ma. Ezyipiti kolocɔlɔ-fáanabèle i cɛ̀lɛ́ wi yɛʔɛ̀ ma, zɔ̀nviigi i Ezyipiti ye kɔɔn.

² «Mii a Ezyipiti ye yìrige bi wáa peyɛɛ na, pe myɛ nibin nibin a ra be senyɛ̀nnɛ, ní be tàannyɛ̀nnɛ túngu, kěyi a ra túngu ní yiyɛɛ ní, fǎnyi a ra túngu ní yiyɛɛ ní.

³ Ezyipiti bárigaw a kwɔ́ɔ wi fúngi ni, mii a wi katimanagèle kálagi. Pe a ra kolocɔlɔ-fáanabèle, ní kúyibebèle, ní sàndoobèle, ní kacánbèle yíbe.

⁴ Mii a Ezyipiti ye le kàfɔgbaɔn kɔ́lɔ ni, fànʔafɔ-danʔaɔ a tɛ́ɛn pe nyúngi na.» Kàfɔw Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

⁵ Lǒgi a kwɔ́ɔ yiri sólomi lɔ́ʔɔ ni, cábigi a tìgi bi waʔa.

⁶ Cábiyi núngo a ra yirigi, Ezyipiti cábiyi a tìgi bi waʔa. Nyɛ́nɛri ní lònyɔɔw nyàā a fána.

⁷ Niili cábigi nyɔ́ɔ nyàā, ní Niili cábigi nyɔ́ɔ yafálara myɛ a waʔa! Ti a cariga bi kwɔ́ɔ, ti a ní nyaa í.

⁸ Cɔ̀ɔwaabèle a ra cɛ́ɛn, bele myɛ be mɛ̀ʔɛgèle cáan Niili cábigi ni lè, poro a pye kùu káyaʔa na, ní bele be cɔ̀ɔ́w wáa lǒyi ni lè, pe fúnyi a curugo.

⁹ Bele be lɛn fugurugwɔɔw càaná lè, ní i fànifiiw tíin, pe fúnyi a nyáʔami.

¹⁰ Kpɛ̀ɛra-tiinbèle n fɔ̀rɔgɔ taa, á sàra-na-falipyebèle myɛ fúnyo curugo.

¹¹ Sowan fànʔafɔbiigèle tɔ̀nɔ́ i nyɛ nilabalabéle, Faraɔnw sícìlibēle be lè wi yarifɔbèle, pe i nidolimɔ yarila kpéʔele. Kanmìí na yele wàa a gbǎn gi joo Faraɔnw ma si wi pye: «Mii i nyɛ sícìlibēle jáa, ní fànʔafɔlɛɛbéle yodaʔaga?»

¹² Sán si be nyɛ, bele be lè mɔ sícilibèle? Ki n yɛlɛ be kalaragèle tɛ̀ɛn mɔ na, si mɔ yaʔa mɔ í gi cán, gee Nyɛ̀ʔɛni Sùlasiibéle Kafɔlɔ Yawe kɔ̀rirɔ n tímana lè Ezyipiti kánmi na.

¹³ Sowan fànʔafɔbiigèle i nyɛ nilabalabéle, Nɔfi fànʔafɔbiigèle i keyɛɛ váana, ki syɛɛnfeleyi kùndigibéle i Ezyipiti ye pùuní.

¹⁴ Yawe n yɛɛwɔɔ̀ pìle tìrige n cáan be níngi ni, koro ga pye bi Ezyipiti ye yaʔa be pùuni be kapyeri myɛ ni, àmɛɛ singbaadiɔn fági ni máari, ní i tùgú lè.

¹⁵ Gee nyùngo, ní nanga, ní sɛʔɛwara, ní nyɛnɛrɛ kpéʔele lè, Ezyipiti a ní fànʔa taa gee bee kàa na baa kpéʔele í.

Ezyipiti nyɛ̀ʔɛnaw kéele

¹⁶ Cángi bee na, Ezyipiti ye a pye àmɛɛ càbala nyɛ lè, pe a ra cɛ̀lɛ́ sáā fɛ̀ɛgí Nyɛ̀ʔɛni Sùlasiibéle Kafɔlɔ Yawe kɔ́gi nyáʔanana kéele na, lǎli ni wi a gi yìrige be kánmi na lè.

¹⁷ Zyuda tári a pye fyáakpɔɔrɔ yáriga Ezyipiti ye ma, ti mɛ́ɛgi ga yeri Ezyipiti ye a fyáa Nyɛ̀ʔɛni Sùlasiibéle Kafɔlɔ Yawe kakɔrirɔli na poro kánmi na.

¹⁸ Cángi bee na kèye kagunɔ a pye Ezyipiti tári ni, yee yi a ra Kanaan ye syɛ́ɛnri nyuu lè, sáā kɛ̀ɛ́ Nyɛ̀ʔɛni Sùlasiibéle Kafɔlɔ Yawe mɛ́ɛgi na, ki kàa nibin a da yiri Iri-Haherɛsi.

¹⁹ Cángi bee na sáriga-wòlo-yafanʔa a pye Yawe ma Ezyipiti tári nínge ni, ní kàdɛnɛgɛ gàánnaa Yawe ma láʔagologi nyɔ́ɔ na.

²⁰ Ki a pye Nyɛ̀ʔɛni Sùlasiibéle Kafɔlɔ Yawe ma fɛ̀ɛ ní séera Ezyipiti tári ni, lǎli ni pe ga yákpogèle wáa Yawe kurugo lè fǎngi gbànvɔɔlɔ kéele na, wi a syɔɔfɔlɔ tórigo be ma, wee wi a ba fàra be na lè bi be syɔɔ.

²¹ Lǎli bee ni Yawe a wiyɛɛ dɛ̀ɛn Ezyipiti ye na, Ezyipiti ye a Yawe cán cángi bee na, sáā wi kpɔ̀ʔɔrɔ́ ní sáriga-wòlori, ní yakaanri ní, pe a ra nyɔɔfaliyi kpéʔele Yawe ma sáā yi wóo.

²² Lǎli bee ni Yawe a Ezyipiti ye kpúmɔn, kàjáa wi ga be kpúmɔn, wi a be pɔʔɔ, pe a kàri Yawe ma, woro wee wi a lóʔo be ma lè, si be pɔʔɔ.

²³ Cángi bee na kogbɔʔɔ a wòlo bi séli Ezyipiti na bi kári sa nan Asirii na, Asirii ye a ra syée Ezyipiti ma, Ezyipiti ye í ra syée Asirii ma. Ezyipiti ye ní Asirii ye a ra Yawe kpɔ̀ʔɔrɔli fáli kpéʔele.

²⁴ Cángi bee na Isirayɛli a pye taanri wów, bi taʔa Ezyipiti, ní Asirii na, bi pye dùba yáriga tári myɛ ni.

²⁵ Yawe wi lè Nyɛ̀ʔɛni Sùlasiibéle Kafɔlɔ, wi a dùbaw taʔa be na si jo: «Dùbaw í pye mii syɛ́ɛnbèle Ezyipiti ye, ní Asirii ye na pe lè mii kɔ́yi fáli, ní Isirayɛli ye na pe lè mii kɔ́rigi!»