Ezayi 18 - Cebaara Bible 2010

Sàmina Etyopii tundungbolobèle ma

¹ Ee tára, beè fókaanya fúlo lè, mɔ wi lè Kusyi cábiyi jelige na.

² Mɔ wee wi tundungbolobéle tórogi lè sólomi lɔ̀ʔɔ na, lònyɔɔw nyàā kɔ́rɔbéle ni, be syée lǒyi ǹjoyo ni lè! Yaa syée, yele tundun-jólogobèle, syɛɛnfelegi ma, gee syɛ̀ɛnnɛ be tɔnɔ lè, á be céri wɔlɔgɔ, syɛ́ɛnbèle ma, be nyɛ lè fyáara yáriya nlaa be nyɛ beè lè, séekpɔɔɔ syɛɛnfelege gii, gee gi yáriri myɛ tɔ́nʔɔnɔ lè, koro gee tára cábiya palapala lè.

³ Yele bele myɛ ye nyɛ lè wodɛ́ɛnbéle ní dulunyanw ni, yele bele ye nyɛ lè tári syɛ́ɛnmɛ, dìrapow ga yìrige nyanbeleyi na, yaa wi wéle, tòmaagi ga wìi, yaa gi lúro.

⁴ Níì cán Yawe n gi joo mii ma kánmi naa na níì jo: «Mii o cúngu í, ní i sámagi ni wéle sìnnyɛʔɛ ni àmɛɛ gbɛ̀ɛ́nmi káfugo nyɛ, gee gi fílige lè, ní àmɛɛ nìgolowirige kásaga nyɛ, gee gi tɔ́ngi yaliilaa-làla káfugo ni lè.»

⁵ Sáni ɛrɛzɛnw làrijɛnɛnɛ í nan lè, lǎli ni wi ga fyɛ́ɛn lè, á wi fyɛ́ɛnri baa kàri n pye ɛrɛzɛn, wee wi lɛɛ lè, wi a wi tíriri cɛnɛ ní kɔnigɔ ní, bi wi kágangboloyi cɛnɛ láʔa yaà.

⁶ Pe myɛ a pínɛ bi yaʔa kaàjɔɔ-féjɛɛnri ma di nyɛ lè nyanbeleyi na, ní tári yaweere ma. Kaàjɔɔ-féjɛɛnri a ra be jóori wɔ̀ɔ́gi làla ni, tári yaweere myɛ sáā be káa wéeri làla ni.

⁷ Lǎli bee ni pe a ra maa ní yakaanya ní Yawe ma, wi lè Nyɛ̀ʔɛni Sùlasiibéle Kafɔlɔ, yee yi a ra yìrigí lè syɛ́ɛnbèle ma, bele be tɔnɔ lè, á be céri wɔlɔgɔ, bele be nyɛ lè fyáara yáriya nlaa be nyɛ beè lè, séekpɔɔɔ syɛɛnfelege gii, gee gi yáriri myɛ tɔ́nʔɔnɔ lè, koro gee tára cábiya palapala lè. Pe a kári ní yakaanyi bee ní bi sa nan Nyɛ̀ʔɛni Sùlasiibéle Kafɔlɔ Yawe mɛ́ɛgi tɛ́ʔɛ na, ki lè Siyɔn nyanbelegi.