Ezayi 17 - Cebaara Bible 2010

Damasi ní Isirayɛli fǎnyi tìgile kéele

¹ Joogbanna Damasi kánmi na. «Wéle, àlí Damasi a ní pye kàʔa í, ki a pye gurubɛɛtooro.

² Aroyɛɛri kěyi n yaʔa, yi n kaan yaweeri ma. Ti n yi kpéʔele di tɛɛkòrogi, wàa faala o di tɔ́ɔrɔ í.

³ Efirayimi kènirigi, ní Damasi fǎngi, ní Sirii wogorobèle n kwɔ́ɔ. Ki a pye àmɛɛ Isirayɛli pìíbèle nìjanra nyɛ lè,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

⁴ «Cángi bee na Zyakɔbi nìjanri a cɛ́rɛ, sǐnmi a yiri wi ceri ni.

⁵ Ki a pye àmɛɛ yaliilaaɔ yaliire lée ni kpóʔoro lè, ní i yaliikanyi cɛnɛ ní wi kɔ́gi ní, ki a pye mɔ a jo pe i yaliikɔrɔ caa Erefa ye jǐnlɔgi ni.

⁶ Yaliikanya cɛɛri yi a kòro yaà, ki a pye àmɛɛ pe gáà olivye tíige nyàʔara lè, si olivyesanya siin wàlá taanri yaʔa yaà gi fínaani na, si olivyesanya sicɛrɛ wàlá kagunɔ yaʔa gi káganyi na,» Yawe, Isirayɛli ye Kolocɔlɔw wi jo nya.

⁷ Cángi bee na syɔɔn a ra wi Faanfɔw wéle, wi a wi nyapiigèle le Isirayɛli Wojanw ni.

⁸ Sáriga-wòlo-yafaanyee yi lè wi kɔ́yi yasamagaya wi yɛ́ɛgi a ní pye yee bee ni í, Asyera tiikóriyi ní cángi kpɔ̀ʔɔrɔlɔ gàángéle wi kabegèle sámaga lè, wi a ní da dee bee wéle í.

⁹ Cángi bee na wi kèniriyi a yaʔa bi pye àmɛɛ kɔligɔ ní nyanbelege ǹjoʔo nyɛ lè, yee be yaʔa lè Isirayɛli ye yɛ́ʔɛ ma, ki a tɔ̀nɔ́ pye kálagila.

¹⁰ Níì cán mɔ n fɛ̀ʔɛ mɔ syɔɔli Kolocɔlɔɔ na, mɔ ga sɔ̀ngi n taa fálagi na gi lè mɔ tɛɛlaragi í. Koro na mɔ kínidɛnɛgɛ tɛɛ̀falaya fála, níì yacɔ́rɔ-nibɔnrɔ cɔ́rɔ yaà.

¹¹ Cángee na mɔ di cɔ́rɔ lè, a di fìin mɔ nyɛ́nɛ na, nyǐngi nyɔ́ɔ na, a mɔ luguri fyɛ́ɛnrɛ kpéʔele. Kàjáa lìíli n kólogo yaliiri làrilaala ni, tiinmɛ o nyɛ kapeegi bee na í.

Syɛɛnfeleyi kaanama

¹² Ee, syɛɛnfele-nɛʔɛyɛ kaanama, yi i kaana àmɛɛ sólomi lòyo kaanama nyɛ lè, syɛɛnfeleyi kunumɔ, yi i kunu àmɛɛ lòkpoloyi kunumɔ nyɛ lè.

¹³ Syɛɛnfeleyi yi kunu àmɛɛ lòkpoloyi kunu lè, wi i syɛɛngbanra nyuu yi ma, a yi i fé ni syée léelige àmɛɛ nyanbeleyi káfalaga nyàā suweʔe lée ni syée lè, ní àmɛɛ káfala-sìnjinnɛ cíbige yìrigí ni syée lè káfalakpɔʔɔ yɛ́ʔɛ ma.

¹⁴ Ki ga pye cângwɔɔgi nyɔ́ɔ na, wéle, ki n pye fyáakpɔɔrɔ, sáni nyǐngi í tali lè, pe n kwɔ́ɔ! Bele be wolo kɔ́lɔ yáriri koli lè, koro gi nyɛ be lɛɛli, bele be wolo fuguri lè, koro ki a pye be na.