Ezayi 16 - Cebaara Bible 2010

Mowabi i dɛ̀ɛmɛnɛ caa Zyerusalɛmi ma

¹ Ye bàpili tórigo tári fànʔafɔlɔ ma bi yìri Sela ma bi sɔ̀lɔ fìími tára ni bi ba nan Siyɔn calipili nyanbelege na.

² Amɛɛ féjɛɛn-nyaari-mí-màʔana nyɛ lè, ní àmɛɛ féjɛɛnbiiye nyɛ, yee be nɛnɛ n yirige zyàara ni lè, ànbée Mowabi calipiigèle a pye Arinɔn cábigi nyɔ́ɔ na.

³ «Lálii kaan, kàa joo mi ceri, mɔ nyínmi tɔ́n wolo na cânvulɛɛli làla ni, ki pye àmɛɛ yébilige nyɛ lè, wovanbèle làriga, wee wi fé bi syɔɔ lè, mɔ a kɔ́ wi le kɔlɔ̀ ni í.

⁴ Mowabi wovanbèle yaʔa be tɛ́ɛn ní mɔ ní! Pye be má tɛɛlaraga kálagifɔw yɛ́ʔɛ ma! Níì cán wee wi gi gbàngí lè koro gi nyɛ wi kwɔ́ɔmi. Yáriri fuguri-mí-láala a kwɔ́ɔ, bele be tári tánʔana lè pe a kwɔ́ɔ láʔa yaà.

⁵ Fàngoli a báriga funjǎngi báriga ni, wàa a tɛ́ɛn li na ní funvii ní Davidi fànikpaagi ni, wi a pye kútiijooo, wee má kútiisinw kéele a kpɔ́ʔɔ lè, wi fúngi a wári sínni kpéʔelele na.»

Zyerusalɛmi a gbǎn yafyɛn nyɔɔ Mowabi na í

⁶ Wolo n Mowabi nɛ̀ɛnyɛnɛgi kéele lóʔo, nɛ̀ɛnyɛnɛgee gi kpɔ́ʔɔ n sɔ̀lɔ lè, wi kpɔ́ɔmi, ní wi nɛ̀ɛnyɛnɛgi, wi fundanʔagbɔɔri, ní wi gbanzan nɛ̀ɛgbɔʔɔgi jóomɔ.

⁷ Gee bee na Mowabi ye a ra nyaan bàā peele Mowabi kéeli na, pe myɛ nibin nibin a ra nyaan bàā peele. Yele a ra cɛ́ɛn Kiiri-Haresɛti ɛrɛzɛn kàgbalari kéele na, si tɔ̀nɔ́ pye báriga fun.

⁸ Níì cán Hɛsyibɔn sìnbiriyi i waari, Sibima ɛrɛzɛn ségi, koro gee ɛrɛzɛngbaɔn wi da ni syɛɛnfeleyi kàfɔɔlɔ cáan lè. Wi káganyi maa cabara fwɔɔ n nan Yayezɛɛri na, yi maa fóo n jée fìími tára ni. Wi káganyi maa tɔnɔ n sólomi lɔ̀ʔɔ sɔ́lɔgɔ.

⁹ Koro na mii i nyaan Sibima ɛrɛzɛn ségi kéele na àmɛɛ Yayezɛɛri nyaan gi kéeli na lè, mii a yele kaan yele í gbaa mii nyatinmi na, Hɛsyibɔn, ní Eleyale, níì cán kapɛɛnnɛ sùpile i wáa mɔ ségi yaliire, ní mɔ yaliilaari na.

¹⁰ Fundaanri ní mugurumi n kwɔ́ɔ tíiri séye ni. Ŋúnuyo ní fundaanra ní o nyɛ ɛrɛzɛn séyi ni í! Ɛrɛzɛncɔɔw ní o duvɛɛn sámagi pɛ́ɛyi ni í! Mii n fundaanri yákpowáara kwɔ́ɔ.

¹¹ Gee bee na mii fúngi yárira i cɛ̀lɛ́ Mowabi kéeli na àmɛɛ kɔ̀rí nyɛ lè, a mii fúngi i cɛ̀lɛ́ Kiiri-Herɛsi kéeli na.

¹² Pe a ba Mowabi nyaa waa wiyɛɛ vɔ̀rɔgí sáriga-wòlo-tɛ́ɛyi ni. Wi i jǐn ni nyɛ́ɛri wi kpɔ̀ʔɔrɔli kpaʔa ni, wi si a yafyɛn taa í.

¹³ Toro di nyɛ syɛ́ɛnri, dee Yawe da joo yaà lè booma ni Mowabi kéeli na.

¹⁴ Tɔ́ɔliw ni, Yawe n syɛ́ɛnri naa joo níì jo: «Yɛ̀ʔɛlɛ taanri fúngo ni, àmɛɛ sàra-na-falipyeo yɛ́ɛgéle nyɛ lè, Mowabi nìjaanri a pye yafaʔaga. Syɛ́ɛnmi nɛʔɛnɛ ní gi myɛ ní, pe wogorobèle a pye yapiipiile ní kanyɔɔnɔ fun.»