Ezayi 15 - Cebaara Bible 2010

Funbɛɛnrɛ ŋúnugo Mowabi kéeli na

¹ Joogbanna, Mowabi kánmi na. Ari-Mowabi n kálagi yébilige nibin ni! Kiiri-Mowabi n kálagi yébilige nibin ni!

² Pe i lúru ni syée kpɔ̀ʔɔrɔli kpaʔa, ní Dibɔn sáriga-wòlo-tɛ́ɛyi ma bi sa ra nyaan yaà. Mowabi i nyaan ni peele Nebo ní Medeba kéeli na, nyǔnyi myɛ n kùnu, bàʔajɔɔbèle myɛ n cɛnɛ.

³ Pe n gɔ̀nvaʔaya le buroyo wi kàlari-kóloyi ni. Pe myɛ nibin nibin i nyaan ni peele ni nyatinmɛ yirigi pe kpáayi ǹjoyo, ní kadàlayi na.

⁴ Hɛsyibɔn, ní Eleyale i sùpiigèle wáa, a be yákpogèle i lúro fwɔɔ Yahasi ma, koro na Mowabi kapɛɛnkpumɔnbèle i sùpiigèle wáa, zɔ̌nbèle i cɛ̀lɛ́ be na.

⁵ Mii fúngi i yakpoli wáa Mowabi kéeli na, woro wee wovan-mí-syɔɔbéle be fé ni syée lè fwɔɔ n sa ni nangi Sowari na, n sa ni nangi fwɔɔ Egilati-Syelisyiya na. Ncan pe i nyaan ni Luyiti dǎndamagi lúru. N be yaʔa Horonayimi kólogi na, pe i sùpiigèle wáa gàlagíw kéele na.

⁶ Níì cán Nimirimi lóyi n waʔa. Nyàági n waʔa, nyàápungi n kálagi, wara ní o yaà í.

⁷ Gee bee na pe i di koli, dee di kòro be ma lè, ni be kɔlɔ̀ yáriri tugu ni syée Sɔli tíiri lòcoologo jelige na.

⁸ Níì cán sùpiiwáara i Mowabi láʔagoloyi máari. Wi sùpili i nangi fwɔɔ Egilayimi na, li i nangi fwɔɔ Beyɛri-Eliimi na.

⁹ Dimɔn lóyi n nyìn sìsyaanw na, mii a ní wɔʔɔyaa fàra Dimɔn má yee na, Mowabi wóbèle be syɔɔ lè, mii a càaraɔ tórigo poro kánmi na, bele kánma na be kòro wi tári ni lè.