Ezayi 14 - Cebaara Bible 2010

Wonɛnɛ-mí-yirigebèle lúrubanna

¹ Yawe a tɔ̀nɔ́ nyinimɛ taa Zyakɔbi na, wi a ní Isirayɛli pìíbèle nyɛ́nɛ wòlo, si be télege pe tári ni. Nibɔnbèle a fàra be na, si peyɛɛ pínɛ Zyakɔbi kpáagi wòolo ni.

² Syɛɛnfeleyi a ba be láa si lúru pan ní be ní be tári ma, Isirayɛli kpáagi wòolo si be taa kɔrigɔ Yawe tásaligi na, pe pye àmɛɛ pulonànbēle ní pulocabala nyɛ lè. Bele pe da be cò n kári púlori na lè, bele bee a ba pye be pulobèlē, bele pe da be fǎngi gbàn be na lè, pe a ba bele bee kùru.

Babilɔni fànʔafɔw kwɔ́ɔmɔ

³ Cángee na Yawe ga mɔ ŋɔ́n n daa lè mɔ fɔrɔgi, ní mɔ fíige màʔani, ní pulogbanri na di taʔa mɔ na lè,

⁴ lǎli bee ni mɔ a ŋúnugi naa ŋùu Babilɔni fànʔafɔw na, si jo: Hàán! Wee wi da ni fǎngi gbàngí syɛ́ɛnbèle na lè, wi n kwɔ́ɔ, fǎngi ní o gbàngí syɛ́ɛnbèle na í.

⁵ Yawe n syɛɛnpeebèle sàbinnɛ, ní fǎngi fɔ̀ɔlɔ kagbeegéle kabagi.

⁶ Woro wee fundanʔagbɔɔrɔtɔw wi da ni syɛɛnfeleyi kpúmɔn lè kuruyo na, sìnlaʔa ni, woro wee wi da ni syɛɛnfeleyi kàragí lè ní fundanʔara ní, ní i yi wɔʔɔ tɔʔɔlɔmɔ fun.

⁷ Tári myɛ n ŋɔ́ndaala taa, ní i nyɛ sági. Pe i ŋúu ní fundaanra yákpowáara ní.

⁸ Alí siipirɛ tíiri, ní Liban sɛdiri tíiri i fundaanra kpéʔele mɔ kéeli na, níì jo: «Nlaa mɔ too lè, tiikpumɔɔn ní o lúru ni maa wolo kurugo í.»

⁹ Kúbèle tɛɛkòrogo táàmaw i cúngu yaà mɔ kéeli na bi yìrí ba mɔ pandɔw fàra. Ki i kúbèle yìrigí mɔ kéeli na, poro bele myɛ pe da pye lè tári wogbolobèlē, ki i syɛɛnfeleyi fànʔafɔɔlɔ myɛ yìrigí be fàngorigèle na.

¹⁰ Pe myɛ i syɛ́ɛnri lée ni gi nyuu mɔ ma níì jo: «Mɔ wɔ́ɔgēle, mɔ i nyɛ fànʔa fun àmɛɛ wolo nyɛ lè, mɔ n baa pye wolo félege.»

¹¹ Mɔ kpɔ́ɔmi n ŋɔrigɔ n wáa kúbèle tɛɛkòrogo ni, n fàra mɔ dangbogèle yákpogéle na. Fyɛɛnrɛ di nyɛ mɔ yasinɛgi, fyɛɛnrɛ di nyɛ mɔ yatɔ́ngi.

¹² Hàán! Nyìndaliŋɔni, nyǐnjerigi pyà, mɔ n yìri nyɛ̀ʔɛni na n baa too naa! Mɔ wee wi fànʔa taa syɛɛnfeleyi na lè, pe n mɔ cáan tári na.

¹³ Mɔ maa ni gi nyuu miyɛɛ fúngi ni níì jo: «Mii a lúgu nyɛ̀ʔɛni na, mii a mii fàngoli yìrige li pye Kolocɔlɔɔ ŋɔripiigèle ǹjoʔo ni, mii a tɛ́ɛn syɛɛnkpoʔolomi nyanbelege njoʔo ni, solomɔkulo kàbangi na yaà píri.

¹⁴ Mii a lúgu fàfaanyi ǹjoʔo ni, mii a pye àmɛɛ wee nyɛ wi lè Pe Myɛ Nyúngo na.»

¹⁵ Kàjáa pe n mɔ ŋɔrigɔ n wáa kúbèle tɛɛkòrogo ni, weecurugi nɔ́ʔɔ na.

¹⁶ Bele be mɔ nyaagi lè, pe i be nyapiigèle sámagi ni nii mɔ ni, ní i mɔ kéeli sɛʔɛ kɔ̀rɔsíi na, ní i gi nyuu níì jo: «Nǎnwee wi da ni tári cúngu lè, woro lé wi nyɛ wee, woro wee wi da ni fǎnyi fúugu lè,

¹⁷ ní i dulunyanw kàragí fìimɛ tára ní i wi kěyi jee, wi si da ni wi kàsolebèle yaari í?»

¹⁸ Syɛɛnfeleyi fànʔafɔɔlɔ myɛ i ŋɔ́ngi ni daagi ní kpɔʔɔrɔ ní, pe myɛ nibin nibin pe nyanya ni.

¹⁹ Kàjáa mɔ na, pe n mɔ yirige mɔ nyángi ni n wáa léelige, àmɛɛ káganbiige nyɛ, gee gi pee lè, pe n syɛ̀ɛnnɛ tɛ́ʔɛ n mɔ tɔ́n, bele be kpóo lè, bele be síbele n kpóo ní ŋɔsée ní lè n wáa weʔe ni, kàdɛnɛrɛ na, mɔ i nyɛ àmɛɛ kpóō nyɛ, wee be tánʔana lè.

²⁰ Mɔ ga tɔ́n ní be ní nyanga ni í, níì cán mɔ n mɔ tári kálagi, mɔ n mɔ syɛ́ɛnbèle kpóo, syɛɛnpeebèle syɛɛnfelege mɛ́ʔɛ a ní yeri nyáana í.

²¹ Ye jaafɔbèle kpóobeele kéele cɔɔnri be tóobèle kolomɔ kéele na, jàngó pe a ní kɔ́ yìri bi tári syɔɔ taa í, si di tɛ́ɛyi myɛ tɔ́n ní kèkpoloyi ní í!

²² Yawe wi lè Nyɛ̀ʔɛni Sùlasiibéle Kafɔlɔ, wi n jo: «Mii a yìri be kánmi na, mii a Babilɔni mɛ́ɛgi, ní wi wogorobèle, ní wi pìíbèle, ní wi yòdaʔayi kwɔ́ɔ yirige yaà,» Yawe wi jo nya.

²³ «Mii a wi pye kéremisyoogèle tɛɛkòrogo, ní fariga tɛ́ʔɛ, mii a wi pɛ́ɛ bi yirige yaà ní kálagili kàbɛʔɛ ní,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

Fǎngi gbànna myɛ kwɔ́ɔmɔ

²⁴ Yawe wi lè Nyɛ̀ʔɛni Sùlasiibéle Kafɔlɔ, wi n kàli níì jo: «Ki a tɔ̀nɔ́ kpéʔele bi yɛlɛ ní gi ní àmɛɛ ki da pye mii fúngi ni lè, gee mii kɔ̀rirɔ n tímana lè, ki a kpéʔele.

²⁵ Mii a Asirii ye wów tɔ́nʔɔnɔ mii tári ni, mii a wi tánʔana mii nyanbeleyi na. Wi zúuw a láʔa be na, wi túgori a láʔa be fókaannyunyi na.»

²⁶ Gee gi kɔ̀rirɔ n tímana tári myɛ kánma na lè koro gi gee bee, kɔ́gi gi gee wozánʔaga ní syɛɛnfeleyi myɛ kánma na.

²⁷ Yawe wi lè Nyɛ̀ʔɛni Sùlasiibéle Kafɔlɔ, woro wi gi kɔ̀rirɔ n tímana, wìí si wi a gi sàa? Wi n wi kɔ́gi sánʔa, wìí si wi a gi kùru wi na?

Filisitini ye sàmina kéele

²⁸ Fànʔafɔw Akazi yɛɛguuli na joogbanni naa taa.

²⁹ Filisitini tápow, mɔ a kɔ́ ra fundaanra kpéʔele àmɛɛ kàgbeeli kabi, lee li da ni mɔ kpúmɔn lè í! Níì cán màátɔn a yiri wàbiga ni. Ki fíingi a pye diragɔn-yìrio.

³⁰ Lǎli bee ni fɔ̀rɔgɔfɔbèle wozelibèlē a gbǎn ra nàʔá, fɔ̀ngɔfɔbèle a tɛ́ɛn ŋɔ́ndaala na, kàjáa mii a mɔ ninri kpóo ní kateʔe ní. Pe a mɔ wogorobèle kpóo.

³¹ Kpàánweele, da nyaan maa peele! Kèkpɔʔɔ, da yákpoli wáa! Filisitini tápow, da cɛ̀lɛ́. Níì cán wírige i yìrigí solomɔkulo ma ni maa, wi kapɛɛnkpumɔnwaa nibin a tée fɔ̀n taanigólogi ni í.

³² Syɛɛnlurugodìí ti a kaan syɛɛnfelegi naa tundunbéle ma? Ti a jo: «Yawe n Siyɔn télege, a wi syɛ́ɛnbèle fɔ̀rɔgɔfɔɔlɔ i tɛɛlaraga taagi yaà.»