Ezayi 13 - Cebaara Bible 2010

Babilɔni kwɔ́ɔmi

¹ Joogbanna Babilɔni kéeli na, yanyaagee Amɔsi jáaw Ezayi nyaa lè.

² Ye dìrapo yìrige nyanbewaʔa na, ye yákpogèle wáa be ma, ye be kán ní kɔ́yi ní, koro ga pye be sɔ̀lɔ bi jée mɛ́ɛyi fɔ̀ɔlɔ kpaanweegéle ni.

³ Mii n syɛɛnrɛ joo n gbàn bele má be yaʔa kɔlɔ̀ na mii ma lè, mii n wɔ́ɔ̀ mii nànniribèle yeri mii fundanʔari kéele na, poro bele be fundaanri kpéʔele mii séew kéele na lè.

⁴ Syɛɛnnɛʔɛmɛ kafulogo i yirigi nyanbeleyi na n syɛɛnfelegaa wóʔo wíri, gee gi nɛʔɛ lè. Fànyaa syɛɛnfeleye yi kpóʔoro lè, yoro kàfulogo. Yawe wi lè Nyɛ̀ʔɛni Sùlasiibéle Kafɔlɔ, wi i kapɛɛnkɔyi sɛʔɛ kapɛɛnni kánma na.

⁵ Pe i yìrigí táleelire ma ni maa, nyɛ̀ʔɛgèle láʔala ma yaà, Yawe ní wi fundanʔari falipye-yarira a wɔʔɔyɔ taʔa tári myɛ na.

⁶ Yaa nyaan yaa peele, níì cán Yawe cángi n nùuni, ki i maa àmɛɛ kálagigbɔɔlɔ nyɛ, lee li yìri Séew Myɛ Kafɔlɔ ma lè.

⁷ Koro na, kɔ́yi myɛ fànʔa i kwóo, nǎnbèle myɛ fúnyo i yirigi be ni.

⁸ Fyáakpɔɔrɔ n be cò. Fɔ̀rɔgɔ ní yaagbɔɔmɔ n be cò. Pe a kùru àmɛɛ fícɛnnɛ gáà fícɛnnɛfɔlɔ yìrige lè. Pe a ra peyɛɛ wéle ní fûnnyaʔamiya ní. Pe yɛɛcɔɔgèle a nyɛ́nɛgɛ àmɛɛ naà nyɛ lè.

⁹ Wéle, Yawe cángi gi maa gee, nyinimɛ o gi ni í, cangbanga, ní fundanʔagbɔɔrɔ, ní kayaagbɔʔɔ canʔa gii, gee ki a ba tári kàriga lè wowaara ní, gee ki a ba kapeebyebèle kwɔ́ɔ lè.

¹⁰ Níì cán nyɛ̀ʔɛni ŋɔ́ripiigéle ní ŋɔrisyɔɔnw a ní ba nyaa í, cángi a ba kàri yébilimɛ bi séli ki làrivololi ni, yégi a ní fílige í.

¹¹ Mii a dulunyanw wɔʔɔ bi yɛlɛ ní wi péemi ní, bi syɛɛnpeebèle sàra be kolomi kéele na. Mii a nɛ̀ɛnyɛnɛgi fɔ̀ɔlɔ kpɔ́ɔmɔ kwɔ́ɔ, bi wɔ́ɔ syɛɛnjanmabèle nɛ̀ɛgbɔʔɔgɔ tìrige.

¹² Mii a gi yaʔa nǎnbèle í taama bɛɛn bi sɔ̀lɔ tɛɛtelew na, syɔɔn ye taaganmi í gbàn bi sɔ̀lɔ Ofiiri tɛ́ɛw taala na.

¹³ Gee bee na mii a nyɛ̀ʔɛgèle cúngo, tári a cɛ̀lɛ bi yiri di tɛ́ɛgi ni, Nyɛ̀ʔɛni Sùlasiibéle Kafɔlɔ Yawe fundanʔagbɔɔri báriga ni, ní wi fundanʔari di sórogi lè, toro cángi na.

¹⁴ Lǎli bee ni pe a pye móō wogaà wii, wee yarigaa nɛnɛ lè, si wɔ́ɔ pye móō bànaʔaɔ fun bàala bɛɛ, pe myɛ nibin nibin a lúru kári be syɛ̀ɛnnɛ ma, pe myɛ nibin nibin a fàn kári be tarà ma.

¹⁵ Bele myɛ pe ga nyaa lè, pe a be síbele fúrugu. Bele myɛ pe ga taa n cò lè, ŋɔséew a be kpóo cáan.

¹⁶ Pe a ra be yireŋɔribèle kpúmɔn bàā tɔ́nʔɔnɔ tári na be nyɛnɛ̀ na, pe a be kpáayi yárira koli, sáā be cébèle kɔ́ri bàā sìnɛ́ fànʔa na.

¹⁷ Wéle, mii i Mɛdi ye yìrigí bi wáa be na, poro bele be lè pe o wálifiiw córo í, tɛ́ɛw si wɔ́ɔ o nyɛ be yanidaanmaga í.

¹⁸ Poro a be sedeyi tɛ́ʔɛ bi wojáribèle ŋɔɔn bi cáan tári na, pe a nyinimɛ taa sàánnyɛɛngèle na í, pe nyapiigèle a tée pìíbèle nyaa nyinimɛ wòolo ní í.

¹⁹ Babilɔni wi lè fǎnyi fèrere, wi lè Kalide ye kpɔ́ɔmi nìnbwɔɔrɔ, wi a pye àmɛɛ Sodɔmi ní Gomɔri nyɛ, yee Kolocɔlɔɔ kálagi lè.

²⁰ Syɔɔn faala a ní tɛ́ɛn wi ni í, wi a kòro syɛ̀ɛnnɛ fun bàā syée nya yìrigèle myɛ syɛ̀ɛnnɛ nínge ni. Arabuo a ní wi fànikpaʔa kóri yaà í, bànaʔabèle a ní yaweere tɛɛ̀syɔnʔɔ sámaga yaà í.

²¹ Fìími tára yaweere a wi pye di tɛɛkòrogo, zàngbuloweeyi a wi kpáayi nyìn, sòʔolow a ra kòró yaà, sikepɔbèle a ra yegi yaà.

²² Kàsoloyi a ra nyaan wi kpaakpoloyi ni, gbàáyi í da fúlo wi fànʔafɔ-gbaacanyi ni. Wi lǎli n nùuni, wi cányi ga níì nɛʔɛ í.