Ezayi 12 - Cebaara Bible 2010

Syɔɔfɔw Kolocɔlɔɔ sòololi

¹ Mɔ a gi joo cángi bee na si jo: «Mii i bariga kaangi mɔ ma, ee Yawe! Níì cán mɔ fúngi maa tanʔa mii kurugo, mɔ fundanʔari si n kwɔ́ɔ mii kàbangi na, mɔ n mii kpɛʔɛlɛ.

² Ye mii syɔɔli Kolocɔlɔɔ wéle wee, mii sɔ̀ngumi n tɛ́ɛn, mii a ra fɛ̀ɛgí í. Níì cán Yawe, Yawe tiimaa wi nyɛ mii bárigaw, ní mii ŋúnugi. Woro wi nyɛ mii syɔɔli.»

³ Yele fundaanratɔw a ra lǒgi kóori syɔɔli pùnweegéle ni.

⁴ Cángi bee na yele a gi joo si jo: «Yaa Yawe kpɔ̀ʔɔrɔ́. Yaa wi mɛ́ɛgi yeri, yaa wi kakpolo-kpèleyi kéele nyuu syɛɛnfeleyi nínge ni, yaa gi tèé ncan wi mɛ́ɛgi n kpɔ́ʔɔ.

⁵ Yaa Yawe kpɔ̀ʔɔrɔli ŋúnuyo ŋúu, níì cán wi n kacàngboloyo kpéʔele, tári myɛ n yɛlɛ bi koro cán.

⁶ Yaa fundaanra, ní mugurumɔ yákpogéle wáa, yele bele ye nyɛ lè Siyɔn ni! Níì cán Isirayɛli ye Wojanw wi nyɛ yele níngi ni lè, wi n kpɔ́ʔɔ.»