Ezayi 11 - Cebaara Bible 2010

Yɛɛ̀nyingi fànʔa kéele

¹ Káganbile a folo bi yiri Izayi tiinyungi na, tiifiinvɔ́ngɔ i yirigi ki nǐnri na.

² Yawe Pǐli a tɛ́ɛn wi na, li lè sícilimi, ní kérigèle cánna Pile, ní yarili, ní fǎngi Pìle, ní cánni, ní Yawe yɛ́ɛgi fyáara Pile.

³ Yawe yɛ́ɛgi fyáara kéele a wi dɛ́nɛ gbanʔama. Wi a ra kútiiw nyuu bàā yɛlɛgi ní wi nyaani yagana ní í, wi a ra kérigèle cɛnɛ bàā yɛlɛgi ní wi líiweeli wolóʔogo yagana ní í.

⁴ Kàjáa wi a ra foomɔfɔbèle kútii nyuu ní sínnɛ ní, màámi fɔ̀ɔlɔ be lè tári ni, bàā bele bee kèlē cɛnɛ kányɛɛgi na. Wi a tári kpúmɔn ní fǎngi kàgbeele ní li lè wi syɛ́ɛnri, si syɛɛnpeew kpóo ní wi nyɔɔwari káfalaga ní.

⁵ Sínni a pye sɛntiiri wi sárigèle ni, kányɛɛgi a pye sɛntiiri wi cèsiinyunyi na.

⁶ Gbàʔā a pínɛ da kòró ní bàpile ní, sèdyɔn a pínɛ da sìnɛ́ ní sikepiige ní. Náapiige, ní càarabiige, ní sìnmɛ yaweele a pínɛ da kòró, nìgɔcaripiige sáā di nàʔá.

⁷ Nìcáʔa ní ursicaʔa a pínɛ da líi, pe pìíbèle a pínɛ da sìnɛ́. Càaraw sáā nyàági káa àmɛɛ nɔ̀ɔ nyɛ lè.

⁸ Yireŋɔriɔ a ra kɔ̀nʔɔ́ wàmɔrigɔ wéele nyɔ́ɔ na, pìíwee wi láʔa yíremi na lè, woro a wi kɔ́gi le màátɔn tɛɛlaraga ni.

⁹ Yarigaa faala a ra kapeʔe wàlá kálagila kpéʔele mii nyanbejǎngi tɛ́ɛgaa faala ni í. Níì cán Yawe cánni a tári nyìn, àmɛɛ lǒgi sólomi lɔ̀ʔɔ fúngo nyìn lè.

¹⁰ Cángi bee na Izayi nǐngi a foló yìri bi yére àmɛɛ dìrapo nyɛ lè syɛɛnfeleyi ma, woro syɛɛnfeleyi a ra caa, wi tɛɛtɛ́nɛgi a pye nìjanra.

Wojo-mí-káribèle lúrubanna

¹¹ Cángi bee na Kàfɔw a ní wi kɔ́gi sánʔa bi wi syɛ́ɛnbèle wozanbèlē nyúnyo syɔɔ, poro bele pe a kòro lè púlori wòolo ni, Asirii ní Ezyipiti ni, ní Paturɔsi, ní Etyopii, ní Elami, ní Syineyari, ní Hamati, ní sólomi lɔ̀ʔɔ nínge tátɛɛgéle ni.

¹² Wi a dìrapo yìrige syɛɛnfeleyi ma, wi a Isirayɛli wovanbèle kpóʔoro peyɛɛ na bi Zyuda wojarigabèle yìrige tári kàbanya sicɛrɛ ma bi kpóʔoro.

¹³ Efirayimi nyabɛɛnni a kwɔ́ɔ láʔa yaà, Zyuda nigoobèle a kwɔ́ɔ yiri yaà. Efirayimi a ní nyabɛɛnnɛ taa Zyuda kéeli na í, Zyuda si a ní fɔ̀rɔgɔ taʔa Efirayimi na í.

¹⁴ Pe a foo too Filisitini ye dǎndamayi na canʔajeemɛ kabangi na, pe a pínɛ canʔafolomɔ kabangi syɛɛnfelege kɔ́lɔ yárira fuguri bi láa, pe a be fǎngi cíbele Edɔmi, ní Mowabi na, Amɔn ye si peyɛɛ gaan be ma.

¹⁵ Yawe a Ezyipiti sólomi lɔ̀ʔɔ kwɔ́ɔ péw, wi a wi kɔ́gi nyáʔana cábigi na ní wi nyɔ́ɔgi káfalaga fànʔa ní, bi gi wálagi bi pye cabikɔyɔ kɔrɔsiin, wi a gi yaʔa syɛ́ɛnbèle í da cábigi bee jeligi taʔalayi ní sìnwòlo ni.

¹⁶ Kogbɔʔɔ a wòlo wi syɛ́ɛnbèle bele má be kòro lè, poro bele pe a kòro Asirii ni lè, àmɛɛ kàa da wòlo Isirayɛli ye ma cángee na be yiri Ezyipiti tári ni lè.