Ezayi 10 - Cebaara Bible 2010

Bele be Yawe fundanʔari yìrigí lè

¹ Wɔʔɔli a pye bele na be làlwapeew télegi lè, ní bele na be kolomi làlwa kèlē sɛ́bɛ lè,

² koro ga pye bi cée kútiiw cerile na foomɔfɔbèle ma, ní i kútiisinw kàragí ni kolomɔ kaangi mii syɛ́ɛnbèle bele ma be lè foomɔfɔbèle, jàngó bi lɔgucebèle kpéʔele pe yacoro, círibèle si pye pe yataara.

³ Nyàʔá yele a pye kpúmɔnri canʔa na, ní kálagi-gbɔ́ɔli li a yìri léelige bi pan lè? Wìí má yele a fàn bi kári koro ga pye bi syɔɔlɔ taa, ní sán yele a yele lɔ́ri yaʔa?

⁴ Yafyɛn a ní kòro í, kapye bi yeyɛɛ kùru ní wojobèle ní ban í, ní kapye bi too ní wogboobèle ní ban í. Alí koro ní gi myɛ ní, wi fundanʔari ga láʔa í, wi kɔ́gi sèʔé i nyɛ wozánʔaga ní.

Asirii ye n láʔagologi sɔ́lɔgɔ

⁵ Wɔʔɔlɔ a pye Asirii ye wów na, wi lè mii fundanʔari sàbinnɛ! Kàgbeeli li nyɛ wi kɔ́gi ni lè, li i nyɛ mii fundanʔagbɔɔri yáriga.

⁶ Mii n wi tórigo Kolocɔlɔɔ yɛ́ʔɛnaa-sìnvyaa syɛɛnfelege kánma na, syɛ́ɛnbèle be mii fúngi taanri lè, mii n wi súguru n wáa bele bee na, wi sa yáriri fuguri si lɔ́ri koli, si syɛ́ɛnbèle tánʔana àmɛɛ kàlari-kóloyi fáriga nyɛ lè.

⁷ Kàjáa gee bee o nyɛ wi sɔ̀nguri í, wi o gee bee tímana wi fúngi ni í. Níì cán kálagila kéele li nyɛ wi fúngi ni bi syɛɛnfele-nɛʔɛyɛ kálagi bi kwɔ́ɔ.

⁸ Níì cán wi n jo: «Mii kùndigibèle myɛ wɔ́ɔ o nyɛ fànʔafɔɔlɔ ì?

⁹ Kalino o nyɛ sèjira ní Karikemisyi ní ì? Ba Hamati ní Aripadi o nyɛ sèjira ì? Ba Samarii ní Damasi o nyɛ sèjira ì?

¹⁰ Amɛɛ mii gbàn n kɔlɔ̀ taʔa yasunyi fǎnya na, yoro yee ǹdedanya yi da sɔ̀lɔ Zyerusalɛmi ní Samarii wóyi na lè,

¹¹ gee mii kpéʔele Samarii ní wi yasunyi na lè, mii a wɔ́ɔ gee bee félege kpéʔele Zyerusalɛmi ní wi yariyaa niwiriyi na ì?»

¹² Kàjáa lǎli ni Kàfɔw ga kwɔ́ɔ wi fáliw myɛ na lè, Siyɔn nyanbelegi na, ní Zyerusalɛmi ni, wi a wɔʔɔlɔ taʔa Asirii fànʔafɔw na, wi fúngi nɛ̀ɛgbɔʔɔgɔ yasanra, ní wi nɛ̀ɛnyɛnɛgi kpɔ́ɔmɔ wéleganma kéele na.

¹³ Níì cán wi n jo: «Mii kɔ́gi fànʔa báriga ni mii gi kpéʔele, ní mii sícilimi báriga ni, níì cán mii i nyɛ kacaɔn. Mii n syɛɛnfeleyi láʔagoloyo ŋɔrigɔ n lége yaà, mii n yi fuguri n yi lɔ́ri syɔɔ, níì fànʔafɔbèle cáan àmɛɛ nànnirio gi kpéʔele lè.

¹⁴ Mii n kɔ́gi taʔa syɛɛnfeleyi lɔ́rɔ na àmɛɛ be kɔlɔ̀ nii féjɛɛn-zyàara ni lè, ní àmɛɛ be féjɛɛn-jɛ̀nɛ koli, gele ge yaʔa lè, ànbée mii tári myɛ koli, yala ga fókanʔa nyɛ́ʔɛ í, wàlá n nyɔɔ múgu í, wàlá n fúlo í.»

¹⁵ A kpanaga i kiyɛɛ gbɔ́ʔɔgi lé wee na wi báara ní gi ní lè? Ba tiicɛnɛ-síi i wiyɛɛ gbɔ́ʔɔ lé wee na wi báara ní wi ní lè? Ki a pye móō sàbinnɛ li li yìrigefɔw fíigi, móō kotinnɛ i wàa yìrigí wee wi lè wi o nyɛ tiige í.

¹⁶ Gee bee na Nyɛ̀ʔɛni Sùlasiibéle Kafɔlɔ wi lè Yawe, wi a waʔara yáama cáan wi kapɛɛnkpumɔn-nànniriyi na. Ki a cò naà wi mɛ́ɛyɛfɔbèle nínge ni àmɛɛ naà gáà cò yarigaa na lè.

¹⁷ Isirayɛli Gbɛ̀ɛ́nmi a ba kàri naà, wi Wojanw si kàri naanyìnge, gee ki a wi wúuri, ní wi wúuri tiipiiye sórigo kwɔ́ɔ lè canʔa nibin ni.

¹⁸ Ki a wi kɔ́ligi ní wi tíiri secanya sórigo kwɔ́ɔ péw, gee bee n jo céri ní pǐli. Ki a pye móō yáawee wi waʔa lè gbanʔama.

¹⁹ Wi kɔ́ligi tiisanra a córomɔ dɛ́nɛ, àlí pyà a gbǎn di córo.

Isirayɛli wogorobèle

²⁰ Cángi bee na, Isirayɛli wogorobèle, ní Zyakɔbi kpáagi wozyɔɔbéle a ní peyɛɛ daʔa pe kpúmɔnfɔw na í, pe a peyɛɛ daʔa Yawe na ní tágala ní, wi lè Isirayɛli ye Wojanw.

²¹ Wogorobéle a lúru pan, pe lè Zyakɔbi wogorobèle, Séew Kolocɔlɔɔ ma.

²² Ee Isirayɛli, àlí mɔ syɛ́ɛnbèle ga nɛʔɛ n pye àmɛɛ sólomi lɔ̀ʔɔ nyɔ́ɔ táminyɔɔ nyɛ lè, pe wogorobéle cɛɛri yagana pe a lúru pan. Kálagili n kɔ̀rirɔ n tímana, li a sínni kaan li nɛʔɛ gbanʔama.

²³ Kálagili li kɔ̀rirɔ n tímana lè, Yawe wi lè Nyɛ̀ʔɛni Sùlasiibéle Kafɔlɔ, wi a li kpéʔele foro tári myɛ ni.

Ye a kɔ́ ra fɛ̀ɛgí Asirii ye na í

²⁴ Gee bee na Kàfɔw Yawe wi lè Nyɛ̀ʔɛni Sùlasiibéle Kafɔlɔ, wi n jo: «Ee mii syɛ́ɛnbèle, yele ye nyɛ lè wodɛ́ɛnbéle ní Siyɔn ni, ye a kɔ́ fyáa Asirii ye wów na í! Wi i yele kpúmɔn ní sàbinnɛ ní, ní i wi kotinni yìrigí yele kánmi na àmɛɛ Ezyipiti ye da ni gi kpéʔele lè.

²⁵ Kàjáa làla cɛɛri li kòro, mii fundanʔagbɔɔri si kwɔ́ɔ yele kàbangi na, mii fúngi si yìri wi kurugo bi wi kálagi.»

²⁶ Yawe wi lè Nyɛ̀ʔɛni Sùlasiibéle Kafɔlɔ, wi a sapili yìrige wi kánmi na móō lǎli ni wi Madyan ye kpúmɔn Orebi fálagi na lè, wi kàgbeeli i nyɛ sólomi lɔ̀ʔɔ ǹjoʔo ni, wi i li yìrigí àmɛɛ ki da pye Ezyipiti ni lè.

²⁷ Cángi bee na wi túgori a láʔa yele fókaannyunyi na, wi zúuw a láʔa yele yátiiyi na. Sǐnmi a zúuw kabi.

Nigoow nùuninɔ kéele Zyerusalɛmi na

²⁸ Wi n nan Ayati na, wi n foro Migurɔn ni, wi n wi túgori yaʔa Mikimasi ni.

²⁹ Pe n sɔ̀lɔ nyanbeleyi lariga kóbile ni. Geba ni be tìrige n syɔ́ɔn! Arama i cɛ̀lɛ́, Gibeya wi lè Sawuli wógi, ki i fé.

³⁰ Galimi calipili, da sùpiigi wáa, Layiisya, ki n yɛlɛ mi líiyi cáan! Anatɔti, wɔʔɔli a pye mɔ na!

³¹ Madimena i caragi, Gebimi ye i fé ni tɛɛsyɔɔlɔ caa.

³² Níjanʔa tiimaa wi a yére Nɔbi ni, wi si i wi kɔ́gi nyáʔana Siyɔn calipili nyanbelege kánma na, ki lè Zyerusalɛmi dǎndamagi.

³³ Wéle, Kàfɔw Yawe wi lè Nyɛ̀ʔɛni Sùlasiibéle Kafɔlɔ, woro wi káganbiigèle nyáma ni láari lè ní fundanʔara ní, yi wogboloyi n cɛnɛ, á yi wodɔnɔyi si tìrige n cáan táàma.

³⁴ Wi i kɔ́ligi tiinuunuro kpúmɔn ni cáan ní kpanaga ní, Liban si i tuun Séew Fɔ́lɔ kúruyo láara ni.