Ɛsitɛri 8 - Cebaara Bible 2010

¹ Cángi bee wonijanga, a fànʔafɔw Asyerusi Haman kpáagi kaan fànʔafɔjew Ɛsitɛri ma, Haman wi pye lè Zyefubèle kàsiitun-nyɛ́nnɛ, á Maridosye baa pye fànʔafɔw taana, níì cán Ɛsitɛri maa gi tɛ̀ɛn àmɛɛ woro ní Maridosye nyɛ lè.

² Lǎli bee ni a fànʔafɔw wi vèʔew wòlo n kaan Maridosye ma, wee wi da nɛnɛ n syɔɔ Haman na lè. A Ɛsitɛri si wɔ́ɔ̀ Maridosye télege Haman kpáagi nyúngo na.

Fǎngi làlwa wi télege Zyefubèle nyɔɔmɔ na lè

³ Ɛsitɛri ga gi yaʔa koro na í, a wi níì tìgi n too wi tɔ́lɔyi taana níì syɛ́ɛnri láa n wi nyɛ́ɛri gbanʔama ní nyatinmɛ ní wi nyinimɛ taa jàngó kapeegee Haman da ni caa bi kpéʔele Zyefubèle na lè, wi lè Agagi wówaa, wi gi sàa.

⁴ A fànʔafɔw fǎngi tɛɛ̀ kàgbeele fìin Ɛsitɛri na, a Ɛsitɛri yìri n yére fànʔafɔw yɛ́ʔɛ ma.

⁵ Níì jo: «Kapye ki n yɛlɛ fànʔafɔw ma, kapye mii n kpɔʔɔrɔ taa wi ma, kéeli bee ga yɛlɛ fànʔafɔw ma, á mii kéeli wɔ́ɔ̀ mɔ dɛ́nɛ, sɛ́bɛbèle bele Agagi wów Hamedata jáaw Haman sɛ́bɛ lè n tórigo Zyefubèle kpóolo kéele na lè, pe lè fànʔafɔw tátɛɛyɛ myɛ ni, sɛ́bɛwaa n wɔ́ɔ̀ yɛlɛ wi sɛ́bɛ bi kajooli bee sàa.

⁶ Wɔʔɔgi ki a too mii syɛ́ɛnbèle na lè, mɛ̀ɛ́ mii a gbǎn gi nyaa si gi kpàraco? Ba mɛ̀ɛ́ mii a gbǎn mii naridulugi wòolo kwɔ́ɔ-mí-yirigele nyaa si pyèri bi sɛ́ɛ?»

⁷ A fànʔafɔw Asyerusi fànʔafɔjew Ɛsitɛri, ní zyefuw Maridosye pye: «Wéle, mii n Haman kpáagi kaan Ɛsitɛri ma, woro si na, pe n wi cɔ̀rɔ cɔ̀rɔli tiige na àmɛɛ wi kɔ́gi taʔa Zyefubèle na lè.

⁸ Yele si na, yariga o yariga ki yele dɛ́nɛ lè Zyefubèle nyɔɔmɔ kéele na, ye koro sɛ́bɛ wɔ́ɔgēle fànʔafɔw mɛ́ʔɛ na, yé fǎngi fɛ̀ɛ taʔa wi na. Níì cán sɛ́bɛwee wi sɛ́bɛ n kwɔ́ɔ lè fànʔafɔw mɛ́ʔɛ na, níì fǎngi fɛ̀ɛ taʔa wi na, wi syɛ́ɛnri a ní gbǎn sàa í.»

⁹ A be fǎngi sɛ́bɛkanbéle yeri cángi bee wonijanga, gi pye lè yedaanri wógi canya toko ní taanri ki lè Sivan yégi. Syɛ́ɛnree Maridosye joo lè, a be dee bee myɛ sɛ́bɛ n tórigo Zyefubèle, ní tátɛɛyi kàfɔɔlɔ, ní guvɛrinɛɛribèle, ní kùndigibèle myɛ ma, n séli Ɛndi tátɛɛyi myɛ na n sáà nan Etyopii na, tátɛɛyɛ togoye kɔrɔni ní kɔrɔsiin ma. Tátɛɛyi myɛ nibin nibin wòolo maa sɛ́bɛ n yɛlɛ ní be sɛ́bɛganmi ní, a syɛɛnfeleyi myɛ nibin nibin wòolo sɛ́bɛ be syɛ́ɛnri ni, a Zyefubèle wóo sɛ́bɛ be sɛ́bɛganmi na ní be syɛ́ɛnri ni.

¹⁰ Sɛ́bɛbèle maa sɛ́bɛ fànʔafɔw Asyerusi mɛ́ɛgi na, níì fǎngi fɛ̀ɛ taʔa taʔa be na. A pe be kaan tundun-jólogobèle pèle ma, bele be fànʔafɔw syɔ́ɔnyɔ fé lè, yee yi cólogo lè, a be kári.

¹¹ A fànʔafɔw kologo kaan kěyi myɛ Zyefubéle ma be peyɛɛ gbóʔoro bi kapɛɛnni kpúmɔn bi peyɛɛ zyɔɔ kùúw ma, páā syɛ́ɛnmi tɔ́nʔɔnɔ, paa be kúu, bele myɛ pe ga yìri be kurugo bi keele taʔa be na lè syɛɛnfeleyi wàlá kapɛɛnkpumɔnbéle kabiya, ní tátɛɛyi syɛ̀ɛnnɛ ni, paa be kúu pe ní be pìíbèle, ní be cébèle, páā be yáriri koo.

¹² Gee bee n yɛlɛ gi kpéʔele canʔa nibin ni, fànʔafɔw Asyerusi tátɛɛyi myɛ ni, yeye kɛɛ ní siin wógi canya kɛɛ ní taanri wóʔo na, yégi bee gi lè Adari yégi.

¹³ Pe maa sɛ́bɛw bee syɛɛnnijanra sɛ́bɛ n tórigo tórigo tátɛɛyi myɛ ma syɛɛnfeleyi myɛ ma, a gi pye làlwa, jàngó Zyefubèle í peyɛɛ zámaga yaʔa cángi bee yɛ́ʔɛ na, bi be gɔ̀lɔ́w wòlo pe nigoobèle na.

¹⁴ A tundun-jólogobèle lúgu fànʔafɔw syɔ́ɔnyɔ na, yee yi cólogo lè n kári kelekele fànʔafɔw tundunro na. A làlwaw bee sɛ́bɛ syɛ́ɛnrɛ wɔ́ɔ̀ jáari yaà Suzi ni, ki lè fàngegi.

¹⁵ A Maridosye yiri yaà fànʔafɔw tɛ́ʔɛ ni, ní fànʔafɔ-búroyo ní, yi pye lè kɔ́luruna cére fàni wóyo, ní woviiye, n fàra tɛɛ̀ fànʔafɔ-nyùndɔngbɔʔɔ, ní lɛn fàninyɛɛɔn búrogbɔʔɔ na. A Suzi kěgi syɛ̀ɛnnɛ myɛ tɔ̀nɔ i muguri, ní i fundaanra kpéʔele.

¹⁶ A gi tɔ̀nɔ n pye Zyefubèle ma nyɛ́ʔɛnɛmɛ, ní fundaanra, ní mugurumɔ, ní fàndaara.

¹⁷ Fànʔafɔw tundunro, ní wi làlwaw sɛ́bɛ ga nan tátɛʔɛ o tátɛʔɛ, ní kàʔa o kàʔa, ní tɛʔɛ o tɛʔɛ na, ki n pye Zyefubèle ma fundaanra, ní mugurumɔ, ní lìigbɔɔlɔ, ní fɛ́tii canʔa. A tátɛɛyi syɛɛnfeleyaa saʔa yiyɛɛ kàriga Zyefubéle, níì cán pe maa fyáa Zyefubèle na.