Ɛsitɛri 7 - Cebaara Bible 2010

Haman faʔali ní wi kùúw kéele

¹ A fànʔafɔw ní Haman kári fànʔafɔjew Ɛsitɛri tɛ́ʔɛ ma sa lìigbɔɔli lìi.

² Canziin wógi bee na wɔ́ɔgēle, n be yaʔa dùvɛɛnw gbaala na, a fànʔafɔw níì Ɛsitɛri pye: «Nyàʔá mɔ caa bi nyɛ́ɛri fànʔafɔjew Ɛsitɛri? Ki a kaan mɔ ma. Nyàʔá mɔ caa gi kpéʔele? Alí kapye fǎngi tíla mɔ caa, ki a taa.»

³ A fànʔafɔjew Ɛsitɛri wi yari: «Kapye mii n kpɔʔɔrɔ taa mɔ ma, ee fànʔafɔw, ki ga yɛlɛ fànʔafɔw ma, gee mii nyɛ́ɛri lè, koro gi nyɛ mii sìíw í syɔɔ, ní gee mii caa lè koro gi nyɛ mii syɛ́ɛnbèle sìi.

⁴ Níì cán pe n wolo pára, mii ní mii syɛ́ɛnbèle, koro ga pye pe wolo kɔnɔgi bi wolo kpóo kwɔ́ɔ nyinimɛ fun. Pe ga maa wolo pára wolo í pye pulonànbēle ní pulocabala, mii mǎà dée joo í, níì cán nyùngo a dée pye gi na mii í fànʔafɔw fɔ̀rɔ ní kéeli bee ní í.»

⁵ A fànʔafɔw Asyerusi fànʔafɔjew Ɛsitɛri pye: «Wìí wi nyɛ syɔ́ɔnw bee? Sán wi nyɛ, wee wi wi nyǔngi waʔa níì kéeli bee félege tímana lè?»

⁶ A Ɛsitɛri wi yari: «Wolo kàsiitun-nyɛ́nw, wi lè nígoow, woro wi nyɛ Haman, wi lè syɛɛnpeew bee.» A Haman syɔɔ n kùu tábi fyáakpɔɔri báriga ni fànʔafɔw, ní fànʔafɔjew nyɛ́nɛ na.

⁷ A fànʔafɔw fúngo tanʔa gbanʔama, a wi yìri terire n yiri lìigbɔɔli tɛ́ʔɛ ni n sáà jée fànʔafɔ-gbaagi nángwɔɔ ni, á Haman kòro yaà ni fànʔafɔjew Ɛsitɛri nyɛ́ɛri jàngó woro sìíw í syɔɔ. Níì cán wi maa gi nyaa àmɛɛ fànʔafɔw gi tímana n kwɔ́ɔ bi kapeʔe pye woro na lè.

⁸ A fànʔafɔw níì yìri yaà fànʔafɔ-gbaagi nángwɔɔ ma n baa jée lìigbɔɔli tɛ́ʔɛ ni. Koro n gi taa yasinɛgee na Ɛsitɛri da pye wozinɛ-zánʔaɔ ní lè, Haman maa pye gee bee na wodoo-dɛ́ɛɔn ní. A fànʔafɔw yákpoli wáa níì jo: «Pé ní too lé fànʔafɔjew na bi caa mii nyɛ́nɛ na kpáagi naa ni?» Syɛ́ɛnri bee tɛ́nɛ̀ yiri fànʔafɔw nyɔ́ɔ ni lè a be Haman yɛ́ɛgi tɔ́n ní fàni ní.

⁹ Haribona wi da pye bele ni pe da wòlo lè a woro gi joo fànʔafɔw nyɛ́nɛ na níì jo: «Cɔ́ɔ! Cɔ̀rɔli tíige Haman da sámaga n yérige wi kpáagi ni, gee tɔnɔganma pi da pye lè mɛ́tiribéle toko ní kagunɔ, koro gee wi da sámaga Maridosye kánmi na, woro wee jóomɔ pi da nyɔɔ fànʔafɔw na lè, ki i yaà.» A fànʔafɔw jo: «Ye sa wi cɔ̀rɔ gi na.»

¹⁰ Cɔ̀rɔli tíigee Haman da sámaga Maridosye kánmi na lè, a be Haman cɔ̀rɔ gi na. Lǎli bee ni a fànʔafɔw fundanʔagbɔɔrɔ kwɔ́ɔ.