Ɛsitɛri 6 - Cebaara Bible 2010

Ki n pye ŋàʔanaga Haman í Maridosye kpɔ́ʔɔ

¹ Yébiligi bee ni a ŋúnɔmi pɛ́ɛ fànʔafɔw na. A wi be pye paa maa ní sɔ̀ngudaari kèlē sɛ́bɛ ní wi lè fǎngi kèlē sɛ́bɛ, a pe baa wi wéle fànʔafɔw yɛ́ʔɛ ma.

² A pe gi nyaa yaà fànʔafɔw nànbēle siin pe da wòlo lè, pe lè Bigitan ní Terɛsyi, Maridosye maa be tɛ̀ɛn níì jo pe i caa bi kɔlɔ̀ taʔa fànʔafɔw Asyerusi na. Kpàánweeli kɔ̀rɔsiifɔbèle pèle siin be pye.

³ A fànʔafɔw jo: «Nyàʔá kpɔʔɔvelere si wo da taʔa Maridosye na kéeli bee na?» Syɛ́ɛnbèle bele pe da ni báara fànʔafɔw ma lè, a poro wi yari: «Wo ga téè yafyɛn kpéʔele wi ma í.»

⁴ A fànʔafɔw jo: «Wìí si wi yaà wee kàcooli ni?» Haman wi da pan n baa yére kàcooli ni, fànʔafɔ-gbaagi kàfugo ma kacoolo ni, koro ga pye bi ba fànʔafɔw pye wi gi yaʔa pe Maridosye cɔ̀rɔ cɔ̀rɔli tíige na gee wi da sámaga wi kéeli na lè.

⁵ A fànʔafɔw syɛ̀ɛnnɛ jo: «Haman wi yaà kàcooli ni woyéreo ní.» A fànʔafɔw jo: «Ki n yɛlɛ waa jǐn naa.»

⁶ A Haman jée. A fànʔafɔw wi pye: «Nyàʔá gi yɛlɛ bi kpéʔele syɔɔnwaa ma, wee fànʔafɔw caa bi kpɔ́ʔɔ lè?» A Haman i gi nyuu wiyɛɛ fúngi ni níì jo: Wìí fànʔafɔw a ní da caa bi kpɔ́ʔɔ sɔ̀lɔ mii na?

⁷ A Haman fànʔafɔw pye: «Syɔ́ɔnwee lé fànʔafɔw caa bi kpɔ́ʔɔ lè?

⁸ Ki n yɛlɛ be fànʔafɔ-búrogaa láa, gee fànʔafɔw le n kwɔ́ɔ lè ní syɔɔngaa, gee na fànʔafɔw tɛ̀ɛ́n lè, koro gee nyúngo ni fànʔafɔ-nyùndɔnnɔ nyɛ lè,

⁹ pé búrogi, ní syɔ́ɔngi kaan fànʔafɔw syɛɛnkpɔɔwaa ma, wi lè mɛ́ʔɛfɔwaa, wi búrogi le nǎnw bee na, wee fànʔafɔw caa bi kpɔ́ʔɔ lè, si wi lúrugo syɔ́ɔngi na bàā syée kěgi kadàlaga ma, sáā yákpoli wáa wi yɛʔɛ̀ ma bàā gi nyuu si jo: ‹Syɔ́ɔnwee fànʔafɔw caa bi kpɔ́ʔɔ lè, gee naa gi yɛlɛ bi kpéʔele wi ma.› »

¹⁰ A fànʔafɔw Haman yari: «Kɔlɔ̀ wári mi búrogi láa, ní syɔ́ɔngi ní, àmɛɛ mɔ gi joo lè, mi sa gi kpéʔele kánmi bee na Maridosye ma wi lè Zyefuw, wi nyɛ lè wodɛ́ɛɔn ní fànʔafɔw kpaʔa kpaaweele na. Gee mɔ joo lè, mɔ a kɔ́ li làa yaʔa í.»

¹¹ A Haman tɔ̀ʔɔ̂ búrogi láa n fàra syɔ́ɔngi na, níì búrogi le Maridosye na, níì wi lúrugo syɔ́ɔngi na níì nyaari n màʔa ní wi ní kěgi kadàlaga na ní i yákpoli wáa wi yɛʔɛ̀ ma ni gi nyuu níì jo: «Syɔ́ɔnwee fànʔafɔw caa bi kpɔ́ʔɔ lè, gee naa gi yɛlɛ bi kpéʔele wi ma.»

¹² A Maridosye lúru n sáà tɛ́ɛn fànʔafɔw kpaʔa kpaaweele na, á Haman tɔlɔyɔ wári n lúru n kári wi kpaʔa ma. Wi maa tɔ̀nɔ n pye funbɛɛnrɛ na níì wi nyúngi tɔ́n.

¹³ Gee myɛ gi sáà pye Haman na lè, a wi baa gi joo n tɛ̀ɛn wi céw Zerɛsyi na, ní wi tàannyɛnbèle myɛ na. A wi yarifɔbèle, ní wi céw Zerɛsyi wi pye: «Kapye Zyefu-syɛɛnfelegi wówaa wi nyɛ Maridosyew bee, woro wee yɛ́ʔɛ ma mɔ tooli séli lè, mɔ a gbǎn fànʔa taa wi na í. Mɔ a tɔ̀nɔ́ too wi yɛʔɛ̀ ma gi kòro nya.»

¹⁴ N be yaʔa jooli na ní wi ní, fànʔafɔw nànbēle be wòlo lè, a poro kàri n nan, ní baa Haman kɔ́ri n kári kelekele Ɛsitɛri lìigbɔɔli tɛ́ʔɛ ma wi da sámaga lè.