Ɛsitɛri 5 - Cebaara Bible 2010

Ɛsitɛri kárili kéele fànʔafɔw ma

¹ A ki ga pye candaanri wógi na, a Ɛsitɛri wi fànʔafɔ-búroyi le n sáà jée n yére fànʔafɔ-gbaagi fungoma kàcoolo ni fànʔafɔ-gbaagi yɛ́ʔɛ ma. Fànʔafɔw si i nyɛ wodɛ́ɛɔn ní wi fǎngi fàngolo na fànʔafɔ-gbaagi ni, kpaaweeli zìnmɛ na.

² Lǎli ni fànʔafɔw Ɛsitɛri nyaa woyéreo ní kàcooli ni lè, a wi fɔ̀lɔ wi na. A fànʔafɔw fǎngi tɛɛ̀ kàgbeele fìin Ɛsitɛri na, lee li pye wi kɔ́gi ni lè, a Ɛsitɛri nùuni yaà n sáà tánga fǎngi kàgbeele fínaana na.

³ A fànʔafɔw wi pye: «Nyàʔá gi yaà, fànʔafɔjew Ɛsitɛri? Nyàʔá mɔ caa bi nyɛ́ɛri? Mii a gi kaan mɔ ma, àlí bi taa sa nan fǎngi tíla na!»

⁴ A Ɛsitɛri wi yari: «Ki ga yɛlɛ fànʔafɔw ma, ki n yɛlɛ fànʔafɔw í pan níjanʔa ní Haman ní lìigbɔɔli ma, lee mii sámaga wi ma lè.»

⁵ A fànʔafɔw jo: «Ye sa Haman kɔ́ri wi pan kelekele koro ga pye Ɛsitɛri kayeli í foro.» Lìigbɔɔlee Ɛsitɛri da sámaga lè, a fànʔafɔw ní Haman baa kári lìíli bee tɛ́ʔɛ ma.

⁶ N be yaʔa dùvɛɛnw gbaala na, a fànʔafɔw Ɛsitɛri pye: «Nyàʔá mɔ caa bi nyɛ́ɛri? Ki a kaan mɔ ma. Nyàʔá mɔ caa gi kpéʔele? Alí kapye fǎngi tíla mɔ caa, ki a taa.»

⁷ A Ɛsitɛri fànʔafɔw yari: «Gee lé mii a nyɛ́ɛri lè, gee lé mii caa gi kpéʔele lè?

⁸ Kapye fànʔafɔw n fɔ̀lɔ mii na, á gi yɛlɛ fànʔafɔw ma bi gi kaan mii ma, gee mii a nyɛ́ɛri lè, ní gee mii caa gi kpéʔele lè, ki n yɛlɛ fànʔafɔw í pan ní Haman ní lìigbɔɔli ma, lee mii a sámaga be ma lè. Nyɛ̀ʔɛna mii a syɛɛnlurugori kaan fànʔafɔw ma, bi yɛlɛ ní wi syɛ́ɛnri ní.»

Haman n cɔ̀rɔlɔ tíige sámaga Maridosye kéeli na

⁹ A Haman yiri yaà fundaanra na cángi bee na, ní i muguri. Kàjáa a Haman wéle n Maridosye nyaa fànʔafɔw kpaʔa kpaaweele na. Wi si ga yìri í, wi ga téè nyɛ́ʔɛ wi yɛʔɛ̀ ma í. A Haman fúngi tanʔa gbanʔama Maridosye kurugo.

¹⁰ Kàjáa wi maa wiyɛɛ fúngi sùlu níì kári kpaʔa ma, ní baa tun a be sáà wi tàannyɛnbèle yeri n fàra wi céw Zerɛsyi na.

¹¹ A Haman baa wi bìngaataa-lɔ́ri kéele joo n tɛ̀ɛn be na, n fàra wi pìinɛʔɛri kéele na, ní kánmee myɛ na fànʔafɔw woro lúrugo ǹjoʔo ma lè, n woro kpɔ́ʔɔ n sɔ̀lɔ kùndigibèle ní fǎngi falipyebèlē myɛ na.

¹² A wi níì be pye: «Fànʔafɔjew Ɛsitɛri n lìigbɔɔlɔ sámaga, wi ga syɔɔn faala yeri n fàra fànʔafɔw na í, kapye mii nibin ban í. Alí wi n níì mii yeri níì jo mii ní fànʔafɔw í ní kári yaà woro ma nyɛ̀ʔɛna.

¹³ Gee bee si sèʔé o nyɛ mii ma yafyɛn í, àmɛɛ mii Zyefunǎnw bee, Maridosye nyaagi lè wodɛ́ɛɔn ní fànʔafɔw kpaʔa kpaaweele na.»

¹⁴ A wi céw Zerɛsyi ní wi tàannyɛnbèle myɛ wi pye: «Ki n yɛlɛ be cɔ̀rɔlɔ tíige sámaga bi yérige, ki tɔnɔganmi í pye mɛ́tiribéle toko ní kagunɔ, nyɛ̀ʔɛna nyǐngi nyɔ́ɔ na, mí sa fànʔafɔw pye wi Maridosye yaʔa pe wi cɔ̀rɔ gi na. Koro kàdoʔo ma mɔ si kári fundaanra na ní fànʔafɔw ní lìigbɔɔli ma.» A syɛ́ɛnri bee Haman dɛ́nɛ. A wi cɔ̀rɔlɔ tíige sámaga n yérige.