Ɛsitɛri 4 - Cebaara Bible 2010

Maridosye n Ɛsitɛri nyɛ́ɛri wi kàa joo gi ni

¹ Lǎli ni Maridosye baa ki myɛ cán gee gi kpéʔele lè, a wi wi búroyi sulugu níì gɔ̀nvaʔaga le, níì cɔnʔɔ wo wiyɛɛ na, ní i syée kěgi nínge ni, wi funbɛɛnrɛtɔw si i sùpiigi wáa.

² A wi kári fwɔɔ n sáà yére fànʔafɔw kpaʔa kpaaweele na. Níì cán gɔ̀nvaʔaga levɔlɔ da yɛlɛ bi sɔ̀lɔ́ jée fànʔafɔw kpaʔa kpaaweele ni í.

³ Fànʔafɔw kajoolo ní wi sɛ́bɛw ga nan tátɛʔɛ o tátɛʔɛ ní tɛʔɛ̀ o tɛʔɛ̀ na, ki n pye kùu káyaagbɔʔɔ Zyefubèle ma. Pe n súnw le sáā nyaan da peele. Pe saamaw n ni sìnɛ́ gɔ̀nvaʔayi na cɔ́ɔngi ni.

⁴ Ɛsitɛri falipye-pìcaabèle, ní wi falipye-nànbèle be wòlo lè, a poro baa syɛ́ɛnri bee joo Ɛsitɛri ma, a gi tɔ̀nɔ n pye fànʔafɔjew ma funjurugoro. A wi buroyo tórigo Maridosye ma koro ga pye wi sa yee bee le wi gɔ̀nvaʔagi sìndɛʔɛ ni. Kàjáa wi ga fɔ̀lɔ í.

⁵ Lǎli bee ni a Ɛsitɛri Hataki yeri. Bele fànʔafɔw da wòlo lè, níì be yaʔa pe i báara wi ma lè, poro wàa wi pye. A wi wi tun Maridosye ma jàngó bi gi cán gee gi yaà lè, ní gee na wi koro pye lè.

⁶ A Hataki yiri n kári Maridosye ma kěgi kadàlaga ma fànʔafɔw kpaʔa kpaaweele yɛ́ʔɛ ma.

⁷ A Maridosye jée ki myɛ ni n joo n tɛ̀ɛn wi na, gee gi woro taa lè, ní wɔ́ɔ̀ wáliw nyɔ́ɔ tɛ̀ɛn, wee Haman jo woro a le fànʔafɔw lɔ́rɔ tɛɛkɔngɔ ni Zyefubèle kéele na jàngó pe be kpóo lè.

⁸ Fànʔafɔw sɛ́bɛ syɛ́ɛnrɛ ti sáà jáari Suzi ni lè, pe kwɔ́ɔ-mí-yirigeli kéele na, a wi wɔ́ɔ̀ sɛ́bɛw bee wàa kaan wi ma níì jo wi sa wi tɛ̀ɛn Ɛsitɛri na, wí joo wi tɛ̀ɛn wi na bi gi joo gbàn wi ma wi kári fànʔafɔw ma wi sa wi nyɛ́ɛri gbanʔama wi nyɔɔ woro syɛɛnfelegi na.

⁹ A Hataki lúru n pan n baa Maridosye syɛ́ɛnri joo n tɛ̀ɛn Ɛsitɛri na.

¹⁰ A Ɛsitɛri gi joo n gbàn Hataki ma níì jo wi sa Maridosye pye:

¹¹ «Fànʔafɔw falipyebèlē myɛ, ní wi tátɛɛyi syɛ̀ɛnnɛ myɛ n gi cán ncan syɔɔn o syɔɔn wi ga kári fànʔafɔw ma n sáà yére fungoma kàcooli ni lè, nàɔn yoo, cɔlɔɔ yoo, bi gi taa pe ga wi yeri í, pe n wi kpóo. Koro i nyɛ làlwanijanw pe myɛ kéele na. Fwɔɔ fànʔafɔw ga wi fǎngi tɛɛ̀ kàgbeele fìin wee na lè woro wi a yaʔa sìngbóo ni. Mii si na, ki canya toko ní kpɔrigɔ wi wee, pe ga ní kɔ́ɔ̀ mii yeri mii í kári yaà fànʔafɔw tɛ́ʔɛ ma í.»

¹² A be sáà Ɛsitɛri syɛ́ɛnri joo n tɛ̀ɛn Maridosye na.

¹³ A Maridosye tun be sa Ɛsitɛri yari: «Mɔ a kɔ́ ra gi sɔ̀ngí àmɛɛ mɔ nyɛ lè fànʔafɔw kpaʔa ni mɔ nibin a syɔɔ Zyefubèle myɛ ni í.

¹⁴ Mɔ ga kòro pyèrio kéeli naa na, dɛ̀ɛmɛni ní syɔɔli a yìri kàbangaa na bi nan Zyefubèle na. Mɔ ní mɔ tóow kpaʔa wòolo ní, yele si a kùu. Wìí syɔ́ɔn wi gi cán kapye lǎli naa kéele na ban mɔ baa pye fànʔafɔjew í?»

¹⁵ A Ɛsitɛri tun pe sa Maridosye yari:

¹⁶ «Da syée mi sa Suzi Zyefubèle myɛ kpóʔoro ye súnw le mii kéeli na. Yele a kɔ́ lìi í, yele a kɔ́ gbaa í canya taanri fúngo ni n cányi pínɛ yébiliyi ni. Mii ní mii falipye-pìcaabèle a wɔ́ɔ súnw le kánmi bee na. Koro kàdoʔo ma mii a jée yaà fànʔafɔw ma, àlí àmɛɛ làlwaw bee wíre i yaà lè, ki ga yére mii í kùu yoo, mii a kùu.»

¹⁷ Gee myɛ Ɛsitɛri joo n gbàn Maridosye ma lè a wi kári n sáà gi kpéʔele.