Ɛsitɛri 3 - Cebaara Bible 2010

Haman n tìgi Maridosye na

¹ Kérigèle bee kàdoʔo ma a fànʔafɔw Asyerusi Haman kpɔ́ʔɔ, wi lè Hamedata jáaw, wi pye lè Agagi wówaa. Fànʔafɔw maa Haman lúrugo ǹjogi ni n sɔ̀lɔ kùndigisanbèle myɛ na pe da nùuni fànʔafɔw na lè.

² Fànʔafɔw falipyebèlē myɛ pe da ni tɛ̀ɛ́n fànʔafɔ-gbaagi kpaaweele na lè, pe maa ni yégunri cáan ní i tíri ni tuun ni Haman kpɔ̀ʔɔrɔ́, níì cán fànʔafɔw wi da koro joo n gbàn. Kàjáa Maridosye da fɔ̀lɔ ni yégunri cáan wàlá ni tíri ni tuun í.

³ Fànʔafɔw falipyebèlē pe da ni tɛ̀ɛ́n fànʔafɔ-gbaagi kpaaweele na lè a poro Maridosye pye: «Syɛ́ɛnri fànʔafɔw joo n gbàn lè nyàʔá na mɔ di cée?»

⁴ Pe maa ni nyuu ní wi ní kéeli bee na canʔa o canʔa, kàjáa wi ga lóʔo be ma í. A be si kɔ́ baa kéeli bee joo Haman ma, si gi wéle kapye Maridosye wi da poro pye lè, woro i nyɛ Zyefuo, wi a sèʔé kòro wi kánmi na.

⁵ A Haman ga gi nyaa Maridosye ga fɔ̀lɔ ni yégunri cáan wàlá ni tíri ni tuun ni woro kpɔ̀ʔɔrɔ́ í, a wi fúngi tanʔa gbanʔama.

⁶ Bi kɔlɔ̀ taʔa Maridosye nibin na, a wi koro nyaa a gi cɛ́rɛ. Pe si maa Maridosye syɛɛnfelegi tɛ̀ɛn wi na. Koro na Haman da ni caa bi Asyerusi fǎngi tɛ́nɛmɛ Zyefubéle myɛ kpóo, pe lè Maridosye syɛɛnfelegi.

⁷ Yɛ́ɛli yezelige ki lè Nisan yégi, fànʔafɔw Asyerusi fǎngi yɛ̀ʔɛlɛ kɛɛ ní siin wólo na, a be Puriw wáa, gee bee n jo pe n gɔ̌nw wáa Haman yɛ́ʔɛ ma, cányi myɛ, ní yéyi myɛ kéele na, a wi too yeye kɛɛ ní siin wógi na, ki lè Adari yégi.

Haman n Zyefubèle kpóo-mí-kwɔ́ɔlɔ kéele cɔɔnri

⁸ A Haman fànʔafɔw Asyerusi pye: «Syɛɛnfelegaa i nyɛ n màʔa mɔ fǎngi tátɛɛyɛ myɛ ni, gee kánma bi wàli lè, pe i nyɛ tɛ́ɛyi myɛ ni n nyáʔami syɛɛnfeleyi myɛ ni. Pe làlwaw ga pínɛ ní syɛɛnfelegaa faala wóo ní í. Pe o táanri fànʔafɔw làlwaw na í. Bi be yaʔa beè sági yɛɛ̀nyinge na, gee bee a yafyɛn nyɔɔ fànʔafɔw na í.

⁹ Ki ga yɛlɛ fànʔafɔw ma, ki n yɛlɛ wi be kálagili kéele sɛ́bɛ. Mii a wálifiio tɔ́nibéle sirakele ní dabata kaan fǎngi wáli kacɔɔnribèlē ma pe wi le fànʔafɔw wáli tɛɛkɔngɔ ni.»

¹⁰ A fànʔafɔw wi kabeli vèʔeo wòlo n kaan Zyefubèle kàsiitun-nyɛ́nnɛ Hamedata jáaw Haman ma wi pye lè Agagi wówaa.

¹¹ A fànʔafɔw Haman pye: «Wáliw n yaʔa mɔ ma, n fàra syɛɛnfelegi bee na, gee ga mɔ dɛ́nɛ lè, koro kpéʔele gi na.»

¹² A be fǎngi sɛ́bɛkanbéle yeri yɛ́ɛli yezelige canya kɛɛ ní taanri wógi na. Syɛ́ɛnree Haman joo n gbàn lè, a be toro myɛ sɛ́bɛ n tórigo fànʔafɔw syɛɛnkpolobéle, ní tátɛɛyi myɛ nibin nibin guvɛrinɛɛribéle, ní syɛɛnfeleyi kùndigibéle ma, ní tátɛɛyi myɛ nibin nibin ma yi sɛ́bɛri ni, ní syɛɛnfeleyi myɛ nibin nibin ma yi syɛ́ɛnri ni. Pe maa wi sɛ́bɛ fànʔafɔw Asyerusi mɛ́ɛgi na, níì fɛ̀ɛ́w taʔa wi na ní fànʔafɔw kábɛɛlɛ veʔeo ní.

¹³ A be sɛ́bɛbèle kaan tundun-jólogobèle pèle ma pe sa be kaan fànʔafɔw tátɛɛyɛ myɛ nibin nibin ma, a gi jo Zyefubèle myɛ n yɛlɛ pe be kwɔ́ɔ láʔa yaà, pe be kpóo bi be kálagi yirige yaà canʔa nibin, wojáribèle, ní wolɛɛbèle ní, n fàra pìíbèle ní cébèle na. Gee bee í pye yeye kɛɛ ní siin wógi canya kɛɛ ní taanri wóʔo na, ki lè Adari yégi, pé be yáriri fuguri bi láa.

¹⁴ A be sɛ́bɛw bee syɛɛnnijanra sɛ́bɛ n tórigo tátɛɛyi myɛ ma, n gi tɛ̀ɛn syɛɛnfeleyi myɛ na jàngó yi yiyɛɛ zámaga yaʔa cángi bee yɛ́ʔɛ na.

¹⁵ A tundun-jólogobèle yiri n kári kelekele n yɛlɛ ní fànʔafɔw kajoolo ní. A kéeli bee jáari Suzi ni, ki lè fàngegi. Fànʔafɔw ní Haman si maa tɛ́ɛn ni gbo. Suzi kěgi maa pye nyatinmɛ.