Ɛsitɛri 2 - Cebaara Bible 2010

Ɛsitɛri n baa pye fànʔafɔjaa

¹ Kérigèle bee kàdoʔo ma àmɛɛ fànʔafɔw Asyerusi fundanʔagbɔɔri baa kwɔ́ɔ lè, a wi sɔ̀ngi n taa Vasitii kéeli na, gee wi da kpéʔele lè, ní gee ki da joo n ceri wi kéeli na lè.

² Nìgɔcaribèle pe da ni báara fànʔafɔw ma lè, a poro jo: «Nàngeele sinján pìcaala n yɛlɛ be caa fànʔafɔw ma, bele be nyɔɔ lè cama.

³ Fànʔafɔw n yɛlɛ wi fali kaan pèle ma wi fǎngi tátɛɛyɛ myɛ ni, poro í nàngeele sinján pìcaacǎnbèle myɛ kpóʔoro Suzi fàngegi ni, cébèle kpaʔa ni, pé ba be yaʔa Hege kɔ́yi ni, wee fànʔafɔw wòlo lè, níì wi cáan wi pye cébèle kpaàweleo, páā be céri nìjanra sìnmɛ kaangi be ma.

⁴ Pìcaawee kéele ga baa fànʔafɔw dɛ́nɛ lè, wee bee si pye fànʔafɔjew Vasitii sìndɛɛgi ni.» A kéeli bee fànʔafɔw dɛ́nɛ, a gi wɔ́ɔ̀ kpéʔele nya.

⁵ Zyefunànwaa maa pye yaà Suzi ni, ki lè fàngegi, pe i wi yiri Maridosye, wi pye lè Yayiiri jáaw, Yayiiri wi lè Syimeyii jáaw, Syimeyii wi lè Kisyi jáaw, wi pye lè Bɛnzyamɛ yòdaʔagaa.

⁶ Syɛ́ɛnbèle bele Babilɔni fànʔafɔw Nebukadinezari da cò Zyerusalɛmi ni n kári lè ní Zyuda fànʔafɔw Yekonya ní, wi maa pye bele bee wàa.

⁷ Woro si wi da Hadasa gbóo, wi lè Ɛsitɛri, wi pye lè wi tóow senyɛnnɛ pyà. Tofɔlɔ wàlá nafɔlɔ da níì pye wi na í. Pìcaaw bee si maa tɔ̀nɔ n nyɔɔ cetínnɛ na. Lǎli ni wi tóow ní wi nɔ́ɔw kùu lè, a Maridosye wi láa n kpéʔele woro tiimaa pyà.

⁸ Lǎli ni be fànʔafɔw kajoolo ní làlwa kéeli jáari lè, a be fala n pìcaala saʔa kpóʔoro Suzi ni, ki lè fàngegi, níì be kàlifáa Hegayi ma. A be wɔ́ɔ̀ kári kánmi bee na ní Ɛsitɛri ní fànʔafɔ-gbaagi ma n sáà wi kàlifáa cébèle kpaàweleo ma wi lè Hegayi.

⁹ A pìcaaw kéele tɔ̀nɔ n wi dɛ́nɛ, a wi i funjànga kpéʔele ní wi ní. Céri nìjanra sìnmɛ, ní lìíli lɛɛlɛ li yɛlɛ bi kaan wi ma lè a wi toro kaan wi ma kelekele, n fàra fànʔafɔ-gbaagi falipye-pìcaala kɔrɔsiin na pe da yɛlɛ bi kaan wi ma lè, níì wi lége ní wi falipye-picaabèle ní cébèle kpaʔa tɛɛcàndelege ni.

¹⁰ Ɛsitɛri si da wi syɛɛnfelegi ní wi kpaʔa wóbèle tɛ̀ɛn í. Níì cán Maridosye maa wi pye wi a kɔ́ be tɛ̀ɛn í.

¹¹ Canʔa o canʔa Maridosye maa ni nyaari ni sɔ̀lɔ́ cébèle kpaʔa kpàánweele nyɔ́ɔ na, koro ga pye bi gi cán kapye Ɛsitɛri n cólogo, si wɔ́ɔ gi cán kánmee na pe wi náari lè.

¹² Pìcaabèle maa ni peyɛɛ zámagi yeye kɛɛ ní siin fúngo ni bi yɛlɛ ní gee ní gi sɛ́bɛ cébèle sámaga-nyɔɔnɔ kéele na lè. Yezeliyi kɔrɔni maa pye be ma paa peyɛɛ zámagi ní míiri sǐnmi ní, yezanyee kɔrɔni si pye paa peyɛɛ zámagi ní nùndaanni yáriraa ní, n fàra cébèle nìjanra sinmɛ na. Koro kàdoʔo ma a fànʔafɔw Asyerusi kpáagi jéele nan pìcaabèle myɛ nibin nibin na.

¹³ Lǎli ni pìcaaw ga ni syée fànʔafɔw tɛ́ʔɛ ma lè, gee myɛ wi ga ni caa lè ki n kaan wi ma jàngó wi yìri cébèle kpaʔa ma bi kári ní gi ní fànʔafɔ-gbaagi ma.

¹⁴ Cângwɔɔgi nyɔ́ɔ na wi a kári yaà, ki ga pye nyǐngi nyɔ́ɔ na, wi n lúru n yiri bi jée cébèle kpaasiin wóʔo ni bi pye Syasyigazi kɔ́yi ni, woro wee pe da wòlo lè níì wi cáan wi pye kpaàweleo. Pìcaaw bee si a ní lúru jée fànʔafɔw kpaʔa ni í fwɔɔ wi kéeli ga fànʔafɔw dɛ́nɛ gbanʔama a wi wi mɛ́ɛgi yeri.

¹⁵ Lǎli ni si fànʔafɔw kpaʔa jéele baa nan lè Maridosye tóow senyɛnnɛ Abisyayili pìíw Ɛsitɛri na lè, wi ga yafyɛn nyɛ́ɛri n fàra dee na Hegayi da nyɛ́nɛ wi ma lè í, woro wee pe da wòlo lè, níì wi cáan a wi pye cébèle kpaàweleo. Ɛsitɛri kéeli maa tɔ̀nɔ n wi nyaafɔbèle myɛ dɛ́nɛ.

¹⁶ A pe baa Ɛsitɛri láa n kári fànʔafɔw Asyerusi ma, fànʔafɔ-gbaagi ma yɛ́ɛli yeye kɛɛ wógi na, ki lè Tebɛti yégi, koro n pye wi fǎngi yɛ́ʔɛlɛ kɔrɔsiin wólo na.

¹⁷ A Ɛsitɛri kéeli fànʔafɔw dɛ́nɛ n sɔ̀lɔ cesanbèle myɛ wólo na, a wi kacànna ní kpɔʔɔrɔ taa fànʔafɔw ma n sɔ̀lɔ nàngeele sinján pìcaasanbèle myɛ na. Lǎli bee ni a wi fànʔafɔ-nyùndɔnni tɔ́n Ɛsitɛri nyǔngi ni n wi kpéʔele fànʔafɔjew Vasitii sìndɛɛgi ni.

¹⁸ A fànʔafɔw lìigbɔɔlɔ sámaga Ɛsitɛri kéeli na, wi kùndigibèle, ní wi falipyebèle myɛ ma, níì ŋɔ́ndaala kaan tátɛɛyi wòolo ma, níì wi kɔ́gi sánʔa n yakaannɛʔɛrɛ kaan n yɛlɛ ní fànʔafɔw kɔ́lɔ sánʔaganma ní.

¹⁹ Lǎli ni pe pìcaabèle kpóʔoro lè tɔziin wógi na, Maridosye maa pye wodɛ́ɛɔn ní fànʔafɔ-gbaagi kpaaweele na.

²⁰ Ɛsitɛri da sèʔé kɔ́ɔ̀ wi kpaʔa wóbèle ní wi syɛɛnfelegi tɛ̀ɛn í, n yɛlɛ ní gi ní àmɛɛ Maridosye da gi joo n gbàn wi ma lè. Ɛsitɛri maa kòro ni lúro Maridosye ma àmɛɛ wi da ni lúro wi ma lǎli ni wi da ni wi gbóo lè.

Maridosye n nyɔɔkuunro kéele cán

²¹ Cányi bee ni n Maridosye yaʔa wodɛ́ɛɔn ní fànʔafɔ-gbaagi kpaaweele na, a fànʔafɔw kpaàwelebèle pèle siin fúnyo tɔ̀nɔ n baa tanʔa, pe lè Bigitan, ní Terɛsyi. A pe i kanmaa caa bi kɔlɔ̀ taʔa fànʔafɔw Asyerusi na.

²² A Maridosye baa kéeli bee cán. A wi li joo n tɛ̀ɛn fànʔafɔjew Ɛsitɛri na, a Ɛsitɛri kéeli bee joo fànʔafɔw ma Maridosye mɛ́ɛgi na.

²³ A be kéeli bee sɛʔɛ n wéle n gi nyaa kányɛʔɛ. A be syɛ́ɛnbèle bee siin cɔ̀rɔ tiige na. A kéeli bee sɛ́bɛ fǎngi kèlē sɛ́bɛ ni fànʔafɔw nyɛ́nɛ na.