Ɛsitɛri 1 - Cebaara Bible 2010

Fànʔafɔw Asyerusi lìigbɔɔli kéele

¹ Asyerusi lǎli ni gee naa kpéʔele. Asyerusiw bee maa pye fǎngi na n séli Ɛndi na fwɔɔ n sáà nan Etyopii tári na. Tátɛɛyɛ togoye kɔrɔni ní kɔrɔsiin wi da ni kàragí.

² Lǎli bee ni fànʔafɔw Asyerusi maa pye wodɛ́ɛɔn ní wi fǎngi fàngolo na Suzi ni, ki pye lè fàngegi,

³ wi fǎngi yɛɛdaanri wólo na, a wi lìigbɔɔlɔ sámaga wi kùndigibèle ní wi falipyebèle myɛ ma, ní Pɛrisi ní Mɛdi ye sùlasiibèle ma, n fàra tátɛɛyi mɛ́ɛyɛ fɔɔlɔ, ní guvɛrinɛɛribèle na.

⁴ A wi wi fǎngi lɔ́rɔ nìjanra tɛ̀ɛn be na n fàra wi fǎngi kpɔʔɔjànra na n canya saʔa kwɔ́ɔ, gee bee n joo canya togoye kpanjɛrɛ fúngo ni.

⁵ A cányi bee ga kwɔ́ɔ, a fànʔafɔw lìigbɔɔlɔ sámaga kàfugi na fànʔafɔ-gbaagi nángwɔɔ ni, canya kɔrɔsiin fúngo ni, syɛ́ɛnbèle myɛ ma n wogbolobèle pínɛ woyilibèle ni, be pye lè Suzi ni ki lè fàngegi.

⁶ Kulɛɛri fànibēle n pye yaà, woviibéle, ní kɔ́luruna cére wòolo á pe be pwɔɔ maribiri kàdɛnɛrɛ gàángéle na, wálifiio vèʔebēle na, ní lɛn mɛ́ɛngéle ní, gele ge pye lè woviigéle, ní wonyɛɛngéle, á be tɛɛ̀ ní wálifiio yasinɛyɛ taʔa tɛɛwɔlɔgɔgɔ na, gee gi pye lè pɔrifiiri, ní maribiri, ní nakiri, ní maribiriwɔɔɔ kadɛnɛrɛ wóʔo.

⁷ A be i yagbaari kaangi tɛ́ɛw yagbaagéle féleye saʔa ni, làa ga pínɛ ní làa ní í, á fànʔafɔw si i dùvɛɛnw kaangi n yɛlɛ ní fànʔafɔw kɔ́lɔ sánʔaganma ní.

⁸ Kajooli maa pye paa gbo ŋàʔanaga fun ni, níì cán fànʔafɔw maa gi joo n gbàn wi kpáagi falipyebèlē kundigibéle myɛ ma níì jo paa syɛ́ɛnbèle myɛ nibin nibin kaangi bi yɛlɛ ní gee ní be caa lè.

⁹ A fànʔafɔjew Vasitii wɔ́ɔ̀ lìigbɔɔlɔ sámaga cébèle ma fànʔafɔw Asyerusi fànʔafɔ-gbaagi ni.

Fànʔafɔjew Vasitii yaʔali kéele

¹⁰ Canya kɔrɔsiin wógi na, n fànʔafɔw Asyerusi yaʔa dùvɛɛnw gbaala fundaanra na, wi falipyenǎnbèle kɔrɔsiin pe da wòlo lè, pe lè Mehuman, ní Bizita, ní Haribona, ní Bigita, ní Abagita, ní Zetari, ní Karikasi, a wi poro tun

¹¹ níì jo pe sa fànʔafɔjew Vasitii yeri wi fànʔafɔ-nyùndɔnni tɔ́n wi ba wi nìjanri tɛ̀ɛn syɛ́ɛnbèle, ní kùndigibèle na, níì cán wi maa tɔ̀nɔ n nyɔɔ.

¹² Kàjáa a fànʔafɔjew Vasitii cée, wi ga fɔ̀lɔ n pan n yɛlɛ ní fànʔafɔw syɛ́ɛnrɛ ní wi da joo n gbàn nǎnbèle má pe da wòlo lè, a be sáà joo wi ma lè í. A fànʔafɔw fúngo tɔ̀nɔ n tanʔa gbanʔama, a wi fúngi tɔ̀nɔ n yìri n baa sɔ̀lɔ.

¹³ A fànʔafɔw sícilibèle nyaa n joo, poro bele be làrigèle cán lè, níì cán kánmi bee na fǎngi kèlē da ni sɔ̀lɔ́ bele má làlwaw kèlē, ní kútiiw kèlē cánna nyɛ lè, pe da ni kòró wi taana lè,

¹⁴ poro ní Karisyena, ní Syetari, ní Adimata, ní Tarisiisi, ní Merɛsi, ní Marisena, ní Memukan, be pye lè Pɛrisi, ní Mɛdi ye kùndigibèle kɔrɔsiin pe da sogi fànʔafɔw na lè, poro bele be pye lè fǎngi tɛɛ̀tɛ́nɛzeliye ni.

¹⁵ Ní baa jo: «Bi yɛlɛ ní làlwaw ní, gìí wo yɛlɛ wo kpéʔele fànʔafɔjew Vasitii na àmɛɛ wi syɛ́ɛnri cée, dee fànʔafɔw Asyerusi joo n gbàn nǎnbèle ma be wòlo lè a be sáà joo wi ma lè?»

¹⁶ A Memukan gi joo fànʔafɔw, ní kùndigibèle nyɛ́nɛ na níì jo: «Fànʔafɔjew Vasitii kakologi a yére fànʔafɔw nibin na í, kàjáa ki a nan kùndigibèle myɛ, ní syɛ́ɛnbèle myɛ na pe nyɛ fànʔafɔw Asyerusi tátɛɛyi myɛ ni lè.

¹⁷ Kánmee na fànʔafɔjew gi kpéʔele lè, cébèle myɛ a gi lóʔo, sáā be nǎnbèle faari. Pe a ra gi nyuu si jo: ‹Fànʔafɔw Asyerusi maa jo be pan ní fànʔafɔjew Vasitii ní wi ba yére woro yɛ́ʔɛ ma, kàjáa wi ga fɔ̀lɔ n pan í.›

¹⁸ Lǎli naa ni Pɛrisi kùndigibèle càbala, ní Mɛdi ye kùndigibèle càbala a gi lóʔo, gee fànʔafɔjew kpéʔele lè, si wɔ́ɔ ra syɛ́ɛnri wonijanra nyuu pe nǎnbèle ma. Gee bee a tɔ̀nɔ́ pye faʔara ní fundanʔagbɔɔrɔ.

¹⁹ Ki ga yɛlɛ fànʔafɔw ma, wo a fǎngi kajoolaa jáari, si li sɛ́bɛ Pɛrisi, ní Mɛdi ye làlwaw sɛ́bɛ ni jàngó li a ní kɔ́ kàri í, bi gi tɛ̀ɛn Vasitii ga yɛlɛ wi ní ba yére fànʔafɔw Asyerusi yɛ́ʔɛ ma í, fànʔafɔw si wi fǎngi syɔɔ wi ma bi kaan wi cenyɛnwaa ma, wee wi sɔ̀lɔ wi na lè.

²⁰ Lǎli ni pe ga kajooli bee lóʔo, lee fànʔafɔw a jáari lè wi fǎngi tɛ́ɛyɛ myɛ ni, gee gi kpɔ́ʔɔ lè, cébèle myɛ a ra be nǎnbèle kpɔ́ʔɔgi, n wogbolobèle fàra woyilibèle na.»

²¹ A syɛ́ɛnri bee fànʔafɔw ní kùndigibèle dɛ́nɛ. A fànʔafɔw gi kpéʔele n yɛlɛ ní gee ní Memukan joo lè.

²² A wi sɛ́bɛbéle tórigo wi fǎngi tátɛɛyɛ myɛ ma. Wi maa tátɛɛyi myɛ sɛ́bɛbéle sɛ́bɛ n yɛlɛ ní be sɛ́bɛganmi ní, ní syɛ́ɛnbèle myɛ ma be syɛ́ɛnri ni, níì jo nǎnbèle myɛ n yɛlɛ bi pye be kpáayi nyúngo na, sáā nyuu be syɛɛnfeleri ni.