Efɛzi ye 6 - Cebaara Bible 2010

Pìíbèle ní be seefɔbèle kéele

¹ Pìíbèle, ki n yɛlɛ yele í da lúro yele seefɔbèle ma Kàfɔw ni, níì cán gee bee gi sín.

² Tundunzelidi na Kolocɔlɔɔ nyɔɔfaliga taʔa lè, toro di nyɛ: «Maa mɔ tóow ní mɔ nɔ́ɔw kpɔ̀ʔɔrɔ́

³ koro ga pye mɔ í kòro yɛɛ̀nyinge na, mɔ siiw si tɔnɔ tári na.»

⁴ Tofɔbèle, ki ga yɛlɛ yele í wɔ́ɔ kɔ́ yele pìíbèle fúnyo kaan yaa taanri í. Kàjáa yele ga ni be gbóo yaa be sàmí, yáā be tama Kàfɔw kèlē ni.

Púlobèle ní be kàfɔbèle kéele

⁵ Púlobèle, bele be nyɛ lè yele kàfɔbèle céri kàbaan na, ki n yɛlɛ yaa lúro be ma. Yaa gee bee kpéʔele ní fyáara, ní cɛ̀lɛlɛ ní, yaa lúro be ma ní funviire ní, àmɛɛ yele lúro lè Kirisi ma.

⁶ Ki ga yɛlɛ yele í da báara pe nyaani yagana kéele na í, ki pye mɔ a jo syɛ́ɛnbèle kanidaangéle yele kpéʔele í, fwɔɔ gi pye àmɛɛ yele nyɛ lè Kirisi púlobéle ni Kolocɔlɔɔ nyɛ́nɛ kéeli kpéʔele ní yele fúnyi myɛ ní.

⁷ Yaa báara be ma ní funjànya ní, ki a kɔ́ pye mɔ a jo syɛ̀ɛnnɛ má yele báara í, fwɔɔ Kàfɔw ma.

⁸ Ye gi cán syɔɔn o syɔɔn a wi kacànbyeri sàra taa Kàfɔw ma, a wi i nyɛ puloo yoo, a wi náa i nyɛ wɔ́rɔɔ yoo.

⁹ Yele bele si ye nyɛ lè púlobèle kàfɔɔlɔ, ki n yɛlɛ yaa kérigèle bee wonijangéle kpéʔele yele púlobèle ma syɛɛngbanra sinjoo ni be ma. Ye gi cán poro ní yele Kàfɔw i yaà nyɛ̀ʔɛni na, wi si o syɔɔnwaa yirigi wàa ni í.

Tágafɔbèle kapɛɛnkpumɔn-yárira kéele

¹⁰ Gee gi syɛɛnsanri kwɔ́ɔ lè, àmɛɛ yele nyɛ lè Kàfɔw ni, ki n yɛlɛ ye nìrimɛ le yeyɛɛ ni wi séekpɔɔw fànʔa báriga ni.

¹¹ Ki n yɛlɛ ye Kolocɔlɔɔ kapɛɛnkpumɔn-yáriri myɛ le yeyɛɛ na koro ga pye yele í fànʔa taa bi gbǎn yére bi Dàzɔɔnw ní wi sícilibeemi sige.

¹² Níì cán syɛ́ɛnbèle ní ban wolo gbɛ̀ɛ́w cáan í, fwɔɔ fànʔafɔbèle, ní séekpɔɔw fɔ̀ɔlɔ, ní dulunyanw naa yébilimɛ fànʔafɔɔlɔ, ní nyɛ̀ʔɛni tɛ́ɛyɛ madenɛʔɛmɛ ní wo wi cáan.

¹³ Gee bee na gi yɛlɛ yele í Kolocɔlɔɔ kapɛɛnkpumɔn-yáriri myɛ láa koro ga pye cânbeegaa ga baa nan yele í fànʔa taa bi gbǎn yére, yele ga fànʔa taa kérigèle myɛ na, yele a sámaga yére.

¹⁴ Gee bee na gi yɛlɛ yele í sámaga yére, kányɛɛgi si pye yele na àmɛɛ sɛntiiri nyɛ lè yele sárigèle ni, sínni si pye yele na àmɛɛ kapɛɛnkpumɔn-búrogo nyɛ lè,

¹⁵ yele taʔalayi si pye yele n sámaga n kwɔ́ɔ bàā yɛɛ̀nyingi syɛɛnjóocànra nyuu ní fundaanra ní.

¹⁶ N fàra dee bee myɛ na ki n yɛlɛ yele í tunmɔzige-yárigi láa ki nyɛ lè tágali, gee ní yele a gbǎn Wobeew ŋáaya sige lè, yi lè náagi wóyo.

¹⁷ Ki n yɛlɛ yele í túnmɔri ǹdɔngɔ tɔ́n ki nyɛ lè syɔɔli, yé Pìicǎnni ŋɔsée láa wi lè Kolocɔlɔɔ syɛ́ɛnri.

¹⁸ Ki n yɛlɛ yaa nyɛ́ɛrigboloyi féleye myɛ nyɛ́ɛri Kolocɔlɔɔ ma làrigèle myɛ ni Pìicǎnni ni. Ki n yɛlɛ ye kòro nyɛ̀nɛ na yáā nyɛ́ɛri ní lòmaana ní Kolocɔlɔɔ syɛɛncanbèle myɛ kéele na.

¹⁹ Ki si n yɛlɛ ye wɔ́ɔ yaa nyɛ́ɛri mii kéeli na jàngó Kolocɔlɔɔ í da nyɔɔsyɛɛnri kaangi mii ma koro ga pye mii í da Syɛɛnjóocǎnri kalarala nyuu da tèé ní nànzorodo ní.

²⁰ Amɛɛ mii nyɛ lè tunduɔn, á be mii pwɔɔ Syɛɛnjóocǎnri bee kéele na, yaa nyɛ́ɛri jàngó mii í da nyuu ní nànzorodo ní, kánmee na mii yɛlɛ bàā nyuu lè.

Fòosanw kéele

²¹ Wolo senyɛn-nidaanmaw Tisyiki wi lè tágala falipyeo Kàfɔw kólogo ni, woro a sa mii kérigèle myɛ tɛ̀ɛn yele na koro ga pye yele í gi cán gee mii kpéʔele naa lè.

²² Kéeli bee tiimaa na mii wi tórigo yaà yele ma jàngó yele í wolo kérigèle cán, woro si wɔ́ɔ yele kɛɛlɛ.

²³ Ki n yɛlɛ Tofɔw Kolocɔlɔɔ ní Kàfɔw Zyezu Kirisi í fûnnyingi ní tàmagi kaan wolo senyɛnbèle ma bi fàra tágali na.

²⁴ Bele be bàngwɔɔ tàmagi le ní wolo Kàfɔw Zyezu Kirisi ní lè, ki n yɛlɛ Kolocɔlɔɔ í kpɔ́ʔɔri kaan bele bee myɛ ma!