Efɛzi ye 4 - Cebaara Bible 2010

Amɛɛ céri nyɛ lè nibin

¹ Gee bee na mii i yele nyɛ́ɛri, mii wi lè Kàfɔw kàsoleo, níì jo kéelee na Kolocɔlɔɔ yele yeri lè, yele í da táanri da yɛlɛgi ní lee bee ní.

² Ki n yɛlɛ yaa màámi ní funjǎngi myɛ kpéʔele, yáā fûnnyingi ní kpàracogi kpéʔele ní yeyɛɛ ní tàmagi ni.

³ Amɛɛ Pìicǎnni yele pínɛ nibin lè, yaa ŋàʔaná gbanʔama, ye pínɛnyɛnnɛgi bee cò cama bɛ̀ɛ́li báriga ni, lee li yele pwɔɔ yeyɛɛ na lè.

⁴ Céri i nyɛ nibin, a Pìicǎnni i nyɛ nibin àmɛɛ Kolocɔlɔɔ wɔ́ɔ̀ yele yeri lè sɔ̀ngumi tɛɛtaʔaga nibin na ki nyɛ lè yele kayeli nyúngo.

⁵ Kàfɔw i nyɛ nibin, a tágali i nyɛ nibin, a batɛmiw i nyɛ nibin,

⁶ a Kolocɔlɔɔ wɔ́ɔ i nyɛ nibin wi lè tágafɔbèle myɛ Tóo, woro wi nyɛ pe myɛ nyúngo na, ní i nyɛ pe myɛ nínge ni, ní i nyɛ pe myɛ fúnyo ni.

⁷ Wi si n kpɔ́ʔɔri kaan wolo myɛ nibin nibin ma n yɛlɛ ní Kirisi yakaangi kpɔ́ʔɔganma ní.

⁸ Koro na gi jo: «Wi lúgu ǹjogi ni lè, a wi pulobèlē kɔ́ri n kári níì yakaanya kaan syɛ́ɛnbèle ma.»

⁹ Dee si di joo lè níì jo: «Wi n lúgu,» nyàʔá gi nyɛ gi kɔ́rɔw? Ki o nyɛ ncan wi n wɔ́ɔ̀ tìgi táàma n jée tári tɛɛcuruyo ni wii ì?

¹⁰ Wee wi tìgi lè, woro wonijanw wi wɔ́ɔ̀ lúgu nyɛ̀ʔɛgèle myɛ ǹjoʔo ma, koro ga pye wi yáriri myɛ nyìn.

¹¹ Wi n pèle kaan poro í pye pìitunbéle, níì pèle kaan pe pye kanyaajoobéle, pèle si pye Syɛɛnjóocǎnri joofɔɔlɔ, pèle si pye bànaʔabēle ní tamafɔɔlɔ.

¹² Wi n koro kpéʔele jàngó bi Kolocɔlɔɔ syɛɛncanbèle nyɔɔ bi foro, koro ga pye poro í da Kolocɔlɔɔ fáliw kpéʔele, kàa sáā taari Kirisi céri na,

¹³ bi taa wolo myɛ í ba pye nibin tágali ni, si wɔ́ɔ Kolocɔlɔɔ Jáaw sámaga cán, si pye wolɛɛbèlē tágali ni bi nyɔɔ foro àmɛɛ Kirisi nyɔɔ n foro lè.

¹⁴ Kánmi bee na wolo a ní kòro pìími ni, tamaveleyi káfalaya í ra wolo fíigi sáā wolo lée ra wáa da máari í bi yɛlɛ ní syɛ́ɛnbèle námara, ní be sícilibeemi ní bi syɔɔn pùuní lè í,

¹⁵ fwɔɔ wolo í da kányɛɛgi nyuu ní tàmaga ní wáā leegi bi taa wolo í ba nyɔɔ foro àmɛɛ Kirisi nyɛ lè, wi lè céri nyúngo.

¹⁶ Woro wi céri tɛ́ɛyɛ pínɛ n sogi yiyɛɛ na ti tɛɛsogiyi dɛ̀ɛmɛnɛ báriga ni, koro ga pye céri í da tiyɛɛ zámagi, sáā kpɔ́ʔɔgi bi yɛlɛ ní ti tɛ́ɛyi myɛ nibin nibin báaraganma ní tàmagi ni.

Sìifɔnw kéele Kirisi ni

¹⁷ Gee bee na mii i dee naa nyuu ní i di séeraw kpéʔele Kàfɔw ni, koro gi nyɛ yele a ní kɔ́ ra táanri àmɛɛ syɛɛnfeleyi wozanya táanri ni yɛlɛgi ní pe sɔ̀ngubeeri ní lè í.

¹⁸ Pe fúnyi i nyɛ yébilimɛ, pe kanaa-sìnjánmi ní be zɔ̀nniribèle báriga ni be kòro nibɔɔnnɔ sìíw kàbaan na, wee Kolocɔlɔɔ kaangi lè.

¹⁹ Pe ga níì fɛ̀ɛrɛ cán í, pe n peyɛɛ gaan cecaabeeri ní nànjaabeeri ma jàngó bàā kanɔnʔɔri féleye myɛ kpéʔele sìndín ni.

²⁰ Yele si na, tánʔaganmi bee félege na ban Kirisi yele tama í.

²¹ Kapye yele n Zyezu syɛ́ɛnri lóʔo kányɛʔɛ ni, á wi yele tama n yɛlɛ ní kányɛɛgi ní ki nyɛ lè woro ni,

²² ye gi cán ki n yɛlɛ yele í yele kanlɛɛmi yaʔa, pi da pye lè yele booma tánʔaganmi, kanlɛɛmi bee pi da kálagi lè ki laànitaagi báriga ni gi syɔɔn fáana ni pùuní lè,

²³ yé yele pìígèle ní yele fúnyi yaʔa yi kàri wovɔnyɔ ní,

²⁴ yé kanvɔnmɔ le yeyɛɛ na, bee Kolocɔlɔɔ kpéʔele lè pi woro wómi wíri sínni, ní funviiri ni ti yìrigí lè kányɛɛgi ma.

²⁵ Gee bee na gi yɛlɛ yele í jànvaaw yaʔa, syɔɔn o syɔɔn n yɛlɛ yele ni waa kányɛʔɛ nyuu wi syɛɛnnyɛnnɛ ma. Níì cán wolo i nyɛ woyɛɛ céri tɛ́ɛyɛ.

²⁶ Ki ga yɛlɛ yele fundanʔari í kɔ́ yele kaan yele í kapeele kpéʔele í. Ki ga yɛlɛ cángi í jée bi yele yaʔa funbɛɛnrɛ na í.

²⁷ Yele a kɔ́ tɛɛ̀jeʔe yaʔa Dàzɔɔnw ma í.

²⁸ Wee wi yúu lè, ki ga yɛlɛ wi ní da yúu í, fwɔɔ gee gi pɔ́rɔ lè, ki n yɛlɛ waa báara ní wi tiimaa kɔ́yi ní wáā kacàngēle kpéʔele koro ga pye wee màko ga pye yárigee na lè, kàa í pye wi ma bi gbǎn kaan syɔ́ɔnw bee ma.

²⁹ Ki ga yɛlɛ syɛɛnpeeraa faala í kɔ́ yiri yele wàa nyɔ́ɔ ni í, fwɔɔ syɛɛntaanra, dee ti a gbǎn ti lóʔofɔbèle kɛɛlɛ lè, sáā kàa fàrá be na tágali kólogo ni bi yɛlɛ ní be màkonyɔɔri ní.

³⁰ Ki ga yɛlɛ yele wàa í kɔ́ Kolocɔlɔɔ Pìicǎnni kanibɛɛnnɛ kpéʔele í, níì cán loro li nyɛ Kolocɔlɔɔ fɛ̀ɛ́w, wee wi taʔa yele na lè bi taa syɔɔli canʔa í ba nan.

³¹ Ki si n yɛlɛ yele í dìgiri, ní fundanʔari, ní funbɛɛnri, ní kàfulogi, ní mɛ́ɛkalagiri myɛ yirige yeyɛɛ níngi ni n fàra funbeeyi myɛ na.

³² Ki n yɛlɛ yele í da kérigèle nyɔɔgi yeyɛɛ na, sáā fúnyi nyíngi yeyɛɛ kurugo, yáā yeyɛɛ kùsulugi syoo àmɛɛ Kolocɔlɔɔ yele kùsulugi syɔɔ lè Kirisi ni.