Efɛzi ye 3 - Cebaara Bible 2010

Fáliwee wi kaan Pɔli ma lè syɛɛnfeleyi wozanya kéele na

¹ Gee bee na mii Pɔli wi nyɛ lè Kirisi Zyezu kàsoleo yele syɛɛnfeleyi wozanya kéele na,

² mii i gi sɔ̀ngí yele n gi lóʔo n kwɔ́ɔ àmɛɛ Kolocɔlɔɔ wi kpɔ́ʔɔri kàlifáa mii ma lè yele kéeli na.

³ Yanyaʔa báriga ni mii kalarali bee cán n yɛlɛ ní gi ní àmɛɛ mii li sɛ́bɛ lè syɛɛnkanya cɛɛri ni.

⁴ Yele ga ni dee bee wéle yele a gbǎn gi nyaa àmɛɛ mii Kirisi kalarali cán lè.

⁵ Kolocɔlɔɔ da li tɛ̀ɛn booma syɛ́ɛnbèle na í, àmɛɛ wi baa li tɛ̀ɛn lè wi pìitunjanbèle, ní wi kanyaajoobèle na tɔ́ɔliw ni Pìicǎnni báriga ni lè í,

⁶ kalarali bee li nyɛ ncan syɛɛnfeleyi wozanya n baa pye Zyefubèle kɔriliinyɛ̀nnɛ, níì cenijanra taa, ní wɔ́ɔ̀ pye be pínɛnyɛ̀nnɛ Kolocɔlɔɔ nyɔɔfaligi ni, gee gi taa lè Kirisi Zyezu ni Syɛɛnjóocǎnri báriga ni.

⁷ Mii n baa pye Syɛɛnjóocǎnri falipyeo n yɛlɛ ní yakaangi ní ki nyɛ lè Kolocɔlɔɔ kpɔ́ʔɔri, dee wi kaan mii ma lè n yɛlɛ ní wi séew falipyeganma ní.

⁸ Wi n kpɔ́ʔɔri bee kaan mii ma, mii wi lè Kolocɔlɔɔ syɛɛncanbèle myɛ wobile, koro ga pye mii í da Kirisi córomɔ fun lɔnɛʔɛri syɛɛnjóocànra nyuu syɛɛnfeleyi wozanya ma,

⁹ mii si wɔ́ɔ ra kalarali fáli kpéʔele bi li yirige gbɛ̀ɛ́nmi na, Kolocɔlɔwee wi yáriri myɛ faan lè, wi maa kalarali bee làriga wi fúngi ni nlaa yaà làridɔɔnnɔ ni,

¹⁰ koro ga pye woro í ba wi síciligbɔɔmi tɛ̀ɛn tɔ́ɔliw ni nyɛ̀ʔɛni fànʔafɔɔlɔ, ní nyɛ̀ʔɛni séekpɔɔɔ fɔɔlɔ na Egiliziw báriga ni,

¹¹ n yɛlɛ ní wi kwɔ́ɔmɔ fun kakɔrirɔli ní, wolo Kàfɔw Kirisi Zyezu bárigaw ni.

¹² Amɛɛ wolo nyɛ lè Kirisi ni, koro gi gi kaan a wolo gbàn n nùuni Kolocɔlɔɔ na ní nànzorodo ní, fyáara fun ni, tágali báriga ni Kirisi na.

¹³ Gee bee na mii i yele nyɛ́ɛri jàngó yele a kɔ́ mii wɔʔɔli kéele yaʔa li yele fɔ̀rɔ yele fúnyi ni í, lee li tuun mii na lè yele kéeli na. Loro li nyɛ yele kpɔ́ɔmi sábabu.

Kirisi tàmagi kéele

¹⁴ Gee bee na mii i kpùmɔnɔ́ Tofɔw yɛ́ʔɛ ma,

¹⁵ wee má nyɛ̀ʔɛni ní tári narigbaaya myɛ yi mɛ́ɛyi taagi lè.

¹⁶ Mii i wi nyɛ́ɛri jàngó wi Pǐli í fànʔa kaan yele ma yele í nìri yele fúnyi ni bi yɛlɛ ní wi nìjangbɔɔri lɔnɛʔɛrɛ ní,

¹⁷ koro ga pye Kirisi í kòro yele fúnyi ni tágali báriga ni, yele si nìnre wáa bi sámaga yére tàmagi ni.

¹⁸ Kánmi bee na yele ní Kolocɔlɔɔ syɛɛncanbèle myɛ a fànʔa taa bi gi cán àmɛɛ Kirisi tàmagi kpɔ́ʔɔganma, ní ki níngi tɔnɔganma, ní ki ǹjogi tɔnɔganma, ní ki cùruganmi nyɛ lè,

¹⁹ jàngó yele í wi tàmagi bee cán bi gi taa ki n kpɔ́ʔɔ n sɔ̀lɔ syɔɔn cánni na, yele fúnyi si nyìn Kolocɔlɔɔ nyìnganmi myɛ na.

²⁰ Wee si wi a gbǎn kérigèle myɛ kpéʔele lè gbanʔama bi sɔ̀lɔ wolo nyɛ́ɛriyi ní wolo sɔ̀nguri myɛ na n yɛlɛ ní séew ní, wee ní wi báara lè wolo fúnyi ni,

²¹ wee bee na nìjangbɔɔri yɛlɛ Egiliziw ni, ní wɔ́ɔ̀ yɛlɛ wi na Kirisi Zyezu ni làrigèle myɛ ni kwɔ́ɔmɔ fun. Amiina.